ПЕРИНАТАЛЬНАЙ КІННІҢ ПӰДІРИИНЕ УЛУҒ ХАЙЫҒ САЛЫЛЧА
14.10.2016
Хабарлар
ХАЛҒАНҶЫ ЧЫЛЛАРДА ХАКАСИЯДА СОЦИАЛЬНАЙ ОБЪЕКТТЕР ИЛЕЕДЕ ПӰДІРІЛЧЕЛЕР. ПЕРИНАТАЛЬНАЙ КІН ОЛАРНЫҢ САНЫНДА.
ПӰӰЛ ПУ ОБЪЕКТ ТУЗАЛАНЫСХА ПИРІЛЕРГЕ КИРЕК. ПЕРИНАТАЛЬНАЙ КІН «ХАКАС РЕСПУБЛИКАНЫҢ ХАЗЫХ ХАЙРАЛЛИРЫН ТИЛІДЕРІ 2020 ЧЫЛҒА ТЕЕРЕ» ПРОГРАММАНЫҢ «ІҶЕ ПАЗА ПАЛА ХАЗИИН ХАЙРАЛЛИРЫ» ПОДПРОГРАММАЗЫ ХООСТЫРА ПӰДІРІЛЧЕ. АННАҢАР ХАКАСИЯНЫҢ ПАЗЫ ВИКТОР ЗИМИН ПУ ПӰДІРІГЕ КӦП ХАЙЫҒ САЛЧА ПАЗА СЫБЫРА СЫНЫХТАҒДА ТУТЧА.
ПУ КӰННЕРДЕ ВИКТОР ЗИМИН ПЕРИНАТАЛЬНАЙ КІННІҢ ПӰДІРИИ ХООСТЫРА ТЕЕСТЕГІ ШТАБ ЧЫЫЛИИН ИРТІРГЕН. ПЕРИНАТАЛЬНАЙ КІННІҢ ПӰДІРИИ - ОЛ ПІСТІҢ РЕСПУБЛИКАНЫҢ ИҢ ТАНЫҒЛЫҒ ПАЗА ӦӦН ОБЪЕКТТЕРІНІҢ ПІРСІ.
ПЕРИНАТАЛЬНАЙ КІН ПӰДІРИИНДЕ ХАРАА-КӰНӦРТЕ 600 КІЗІ ТОҒЫНЧА. АМҒЫ ТУСТА ІСТІНДЕГІ ТОҒЫСТАР ИДІЛЧЕЛЕР ПАЗА КИРЕК ИМНЕГ ОБОРУДОВАНИЕЗІ АЛЫЛЧА. ТОҒЫС ГРАФИК ХООСТЫРА ПАРЧА.
Хакасияның пазы Виктор Зимин ӧӧн подрядчик «Монолитстрой» 000-ның устағҷыларынаң, перинатальнай кіндегі тоғыстарны кӧрглеен соонда, имнег оборудованиезін ағылар тусты ӱзӱрген, хазых хайраллаҷаң министерство объектті тузаланысха хаҷан кирер тустаңар чоох парған.
- Перинатальнай кінні пӱдірер чарадығны алып аларына кӧп кӱс хорат салғабыс. Пӱӱнгі кӱнге илееде тоғыс иділ парған. Амғы тустың пӧгіні - объектті тузаланысха пирібізері, - теен Виктор Зимин.
Хакасияның пазы перинатальнай кінні пӱдірчеткен подрядчикке, пӱдірігні тузында тоозарға маңнанчатханы ӱчӱн, улуғ алғызын читірген. Хакасияның пӱдіріг паза чурт-коммунальнай хоных министрі Сергей Можаровтың чооғынаң, амғы туста перинатальнай кінде тоғысчылар істіндегі тоғыстарны апарчалар, тураның хырын керамогранитнең чаапчалар. Тураа чылығ пиреріне кӧп хайығ салылча. Имнег оборудованиезі 1 миллиард 46 муң салковайға алыларға кирек. Амды 760 миллион салковайға 1090 имнег оборудованиезі алылған. Оларны турғызар тоғыс пасталча.
- Имнег оборудованиезін турғызарының ӧӧн кирексінізі - ол оборудованиенең тоғынар имнег тоғынҷыларын ӱгредері. Пістің андағ тоғынҷылар пар. Олар пасха кіннерде ӱгренгеннер. Кирек кӧстеглерҷе специалисттерні тимнирі тоозылды, олар перинатальнай кін тимде поларын сағыпчалар. Перинатальнай кінзер кӧзер график тимнелген. Пӱдіріг тоозылза, ӱс неделя аразына перинатальнай кінзер кӧзібізерге кирекпіс, -теен Хакасияның хазых хайраллаҷаң министрi Наталья Коган.
Виктор Зиминнің чооғынаң, перинатальнай кін пӱдіриин тузында тоозыбызар ӱчӱн маңзырирға чарабас. Ол хайди даа чылығ паза истіг поларға кирек. Аннаңар пӱдіріг тоғызы пір-ікі неделяа соонаң толдырылза даа, хайтпас. Анда істенер имнег тоғынҷыларына, тоғысха паза имнег оборудованиезіне кӧнік парар ӱчӱн, кӧмес тус пирерге кирек. Январьның ортызынзар пастағы пациенттер кірерлер.
Объекттің пӱдірии 3,5 азыра миллиард салковайға тур парар, ол санда пӱдіріг-монтаж тоғызы - 1916826 салковайға. Имнег оборудованиезіне 1060043 салковай хорадылар. Прай 4023 имнег оборудованиезі алылар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде