РОССИЯНЫҢ САБЛЫҒ ПИЛОДЫН ХУМАРТХЫЛААННАР
15.11.2016
Хабарлар
Ирткен тынағ кӱннерінде Ағбан пилтірінде олаңай кӱресче Россияның саблығ пилоды Пётр Аткниннің хумартхызына чарыдылған региональнай марығ ирткен. Марыға спортсменнер Кемеров облазынаң, Хызылчар крайынаң, Новосибирск облазынаң, Тува Республикадаң килгеннер.
Турнир азылғанда, командалар парады ирткен. Араласчылар спортзалда стройға турыбысханнар. Парадты апарып, Хакасияның чон артизі Герман Танбаев Пётр Алексеевичтiң чуртас чолынаңар чоохтап пирген. Пётр Алексеевич Аткнин Ағбан пилтірі аймааның Чарков аалында 1953 чылда 27 апрельде тӧреен. Ол Россия Федерациязының саблығ пилоды, Хакасияның Ӧӧркі Чӧп депутады полған. Пётр Аткнин Хакасияның тархынында улуғ іс артыс салған. Аның пастаанынаң кӧп проекттер тоғынчалар. Пётр Алексеевич кӱреске хынған. Аның тренері Николай Чурдиков полған.
Ағбан пилтірі аймааның пазы Елена Егорова, чоох тудып, прайзын марығ пасталғанынаң алғыстаан. Аның чооғынаң, Пётр Алексеевичтің оолғы Максим Аткнин пабазының чолынӌа парча.
Ідӧк марығ араласчыларынзар Хакасияның Ӧӧркі Чӧп кнезінің орынҷызы Сергей Комаров, Хакасияның культура министрі Светлана Окольникова, Хакас чонның Улуғлар чӧбі президиумының кізізі Анатолий Сунчугашев айланғаннар. Оларның чооғынаң, Пётр Аткнин Хакасияның саблығ оолғы полған. Аны композиторлар, писательлер, артисттер, кӧгҷілер сағысха кирчелер. Пётр Алексеевич сын арғыс полған. Светлана Окольникова марығ араласчыларына пос чирінің турыстыра кізізі паза сын арғызы поларға алғаан.
Алғыстас сӧстері соонаң марығ пасталыбысхан. Ол ікі кӱн изере ирткен. Марығда 290 оол-хыс араласхан. Спортсменнер, кибіске сығып, устарын хатығ харбазығда кӧзіткеннер. Хакасияның илееде кӱресчізі «ыырҷыларын» ізестіг чиңен. Таштыптағы кӱресчі Руслан Канзычаков, Ағбаннаң килген «ыырҷызы» Дмитрий Сибиряковты учаландырыбызып, ізестіг чиңіс тутхан. Асхыс аймаа командазының кӱресчізі Алексей Миягашев Ағбан командазындағы Дмитрий Ахпашевті, саннарнаң азып, утып алған.
Асхыс аймаанаң 30-ча кізі араласхан. Команданың улуғ тренері Виктор Бурнаков полча.
- Мин, Асхыс командазының улуғ тренері полып, пу турнирде ікінӌі чылы араласчам, - чоохтапча Виктор Пиксенович. - Пу марығда араласчатхан регионнар саны ӧсче. Турнир кӱреснең айғазып пастапчатханнарға уғаа тузалығ. Мында оларның устары, ӧзіп, тыыпча.
Пастағы кӱнде чиңіс тутханнар, марығның финалына сығып, ікінӌі кӱнінде медальлар ӱчӱн марығласханнар. Сыйыхтығ орыннарға турысхан спортсменнерге медальларның тиксі 19 комплектi читірілген.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде