ОРЫНДАҒЫ ПОС УСТАНЫС ЧӦБІНІҢ САЛТАРЛАРЫ ПАЗА ПӦГІННЕРІ
07.12.2016
Хабарлар
Хакасияның правительство туразында орындағы пос устаныс чӧбі теестегі чыылиин иртірген. Ӱзӱріге читі сурығ сығарылған. Чыылығны апарған орындағы пос устаныс чӧбінің кнес орынӌызы, Хакасия пазының орынӌызы Владимир Крафт. Аның тоғызында министерство-ведомстволарның паза муниципапьнай пӱдістернің кізілері араласханнар.
Хакасияның экономика министрi Татьяна Паульның искірии 2015 чылның салтарларына чарыдылған. 2008 чылдаң пасти министерство город-аймахтарның тоғызын паалапча. Мониторинг 9 кӧстегҷе иртірілче. Министерствоның специалисттері кӧрчелер, хайди муниципалитеттерде экономика тиліпче, наа чурт пӱдірілче бе, ӱгредіг, спорт, культура саринаң киректер хайди парча.
Ағаа хоза, министерство, сурастырығ иртіріп, чон аймахтардағы паза городтардағы ӱлгӱлернің тоғызын хайди паалапчатханын сыныхтапча. Сурастырығ ікі оңдайнаң иртірілчеттір, социология паза Интернет пастыра. Аның салтарларын піліп аларға хынығ полған.
Социология сурастырии хоостыра орындағы ӱлгӱлернің тоғызын иң пӧзік Ағбанның (65,6 %) паза Орджоникидзе аймааның (62,5 %) чуртағӌылары паалапчаттырлар. Че Интернет пастыра кізілер пасха оңдайнаң нандырғаннар. Мында иң артыхтарның санында Сорығ (83,1 %) паза Шира аймаа (73,6 %). Владимир Крафттың таниинаң, Интернет пастыра иділген сурастырығ най пӧзік саннар кӧзітче, аннаңар оларға киртінерге аар. Россияның законодательствозынӌа 2017 чылдаң сурастырығ Интернет пастыра ла иділер. Че орындағы пос устаныс чӧбінің кізілері Хакасияда аны хайди даа хоза социология оңдайынаң иртір турарға чарадығ алғаннар.
2015 чылда городтарның аразында прайзынаң чахсы Саяногорск тоғыныбысхан, ікінӌі орынға Ағбан сыххан. Аймахтарның аразында чиңісчі Таштып аймаа полыбысхан, ікінӌі орында -пиидегілер. Чиңісчілерге грант ахчазы читірілер. Пастағы орын алғаннарға 360 муң салковай пирілер, ікінҷі орындағыларға - 240 муң салковай.
Анаң сӧс республиканың муниципальнай пӱдістер ассоциациязының директоры Наталья Соколикке пирілген. Ол Хакасияда муниципальнай пӱдістер право полызиин хайди алчатханын чарытхан. Соколиктің таниинаң, город-аймахтарның сидіксіністер чох полза, аал чӧптері право полызиинаң толдыразынаң тузалан полбинчаттырлар. «КонсультантПлюс» паза «Гарант» программалар турғызарға чахсы компьютер паза маңат тоғынчатхан Интернет кирек.
Аал чӧптерінің техника аларға ахча чоғыл, Интернетнең дее сидіксіністер пар полтыр. Ідӧк аалдағыларға тоғыс хоостыра тӧреміл юрист полызии кирек, аймахтар администрацияларында хабазарға хынминчаттырлар. Крафттың чооғынаң, аймахтарға штатсар хоза юрист алып аларға чарир, ол, тізең, аал чӧптеріне полызар.
Хакасияның хазых хайраллаӌаң министрі Наталья Коганның искіриин прайзы ситкіп искен. Тиксі Россияда имӌілер чидіспинче, оларның санын ӧскірерге пӧгініп, хазнада аймах программалар тоғынча. Ол программаларӌа Хакасиязар 2012 чылдаң сығара 500-че кізі тоғынарға килген, че республикада ам даа 375 имӌі киректелче.
Пу сурығны министерство пӧгібізерге кӱстенче. Амды 277 студентнең чӧптезіг иділген. Олар, ӱгредиин тоозыбысса, пеер тоғынарға килерлер. Аймахтардаңар чоохтаза, 4 чыл аразына аалдағы имнег тураларынзар 200 имӌі істенерге парыбысхан. Н.Коганның таниинаң, пірее аймахтарда чиит специалисттер чурт чох ирееленче, аннаңар чӧптезіг тоозылған соонда олар городсар айланарға сағынчалар. Кӧзідімге, Шира аймаанзар 20 кізі тоғынарға килген, 7-зі нандыра парыбысхан. Олох туста Асхыс чирінзер килген 32 имҷідең 3 ле халарға ынабиндыр. Асхыстағылар чиит специалисттерге чир участогын пирерге кӱстенчелер. Наталья Васильевна муниципалитеттердең имҷілерге чурт суриин пӧгерге полыс пирерге сурынған.
Хакасияның чонға тоғыс тапчаң хазна комитедінің кнезі Ирина Ахметова муниципальнай пӱдістернең хада апарылчатхан тоғыстаңар чоохтап пирген. Ӱгренңілерні аймах профессияларнаң таныстырчалар, ідӧк оларға чайғызын тоғыс таап пирерге полысчалар. Че идінҷектер тоғыс тапчаң кіннерге удур парарға тың на хынминчаттырлар. Кӧзідімге, пӱӱл Ағбанда олғаннарға муниципальнай службаларда ла тоғыс таап пирерге оңдай полған.
Культура министрінің орынӌызы Лариса Киштеева искіриинде кадрлар суриина теелген. Республиканың культура учреждениелер тоғынӌыларының узын кӧдірерге пӧгініп, пӱӱл оларға аймах ӱгредіг курстары паза семинарлар иртірілгеннер. Тиксі алза, культура саринаң город-аймахтарда кирек хомай парбинчаттыр, че культура министерствозын ааллардағы библиотекаларда фонд нааӌылалбинчатханы сағыссыратча.
Халғанҷызын республиканың национальнай паза территориальнай политика министрi Дмитрий Тодышев чоох тутхан. Ол орындағы пос устаныс чӧбінің салтарларын искірген. 2016 чылда ікі чыылығ иртірілген, анда прай пӧгінген сурығлар ӱзӱрілген, оларны хоостыра чарадығлар алылған. Орындағы пос устаныс чӧбінің теестегі чыылии 2017 чылда апрельде иртер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде