ТАШТЫПТАҒЫЛАРНЫҢ КӦҢНІН КӦДІРГЕННЕР
30.12.2016
Хабарлар
Республиканың хакас ипчілернің «Алтынай» халых пірігізінің Таштып аймаандағы пӧлии 15 чыл тоғын парир.
Халғанӌы туста Таштыптағы «Алтынайнаң» Нина Бурнакова устапча. Ол - тынағдағы ӱгретчі, айтыс пілбес кізі. Пірігістің араласчыларының санында ӱгретчілер, культура тоғынӌылары, имҷілер паза пасхазы даа.
- Піс хысхы, часхы, чайғы, кӱскӱ тиңнес кӱннерін иртірчебіс. Кӱнге, отха пазырып, Ӧӧркілердең чирібіс пай ползын, чоныбыс хазых, ынағ чуртазын тіп сурынчабыс. Пу улуғ кӱннерні тиктең нимес иртірчебіс. Пістің чон хас-хаҷаннаң Чир-чайааннаң пілізіп, аннаң тіл алызып чуртаҷаң нооза, - чооғынаң ӱлесче Нина Сергеевна.
Чапсых тоғазығларның пірсі - пу чылда Валентина Татарованың Таштыпсар кил парғаны. Часхызын ол, библиотека тоғынҷыларынаң, хакас тілі ӱгретчілерінең тоғазып, позының «Хакас чирі - ызых чир» календарьынаңар чоох апарған. Анда пирілген танығлар пістің чонның сағызында халарға кирек.
Таштыптағы культура туразында ирткен тоғазығда ідӧк ырҷы Ираида Ахпашева аалҷы полған. Ираида Ахпашева, Ах, Хара Ӱӱс чонның тахпахтарын толдырып, чыылысханнарның кӧңнілерін кӧдірген.
Ол аарласнаң хакас чонның саблығ композиторын Георгий Челбораковты адаан. Таштыптағы «Кӱн арии» ансамбльнаң хада Ираида Ахпашева Олег Токояковтың «Чиит ӧӧреме» сарынын толдырған. Ідӧк таштыптағыларға наа сарынны истерге ӱлӱс тӱскен: Тамара Маганакова Валентина Татарованың «Хызыл иир» кибелізіне кӧг пас салған. Валентина Кирилловна чонға позының кибелістерін хығырған.
Автор :
Юлия МАЙТАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде