ӦКІСТЕРГЕ ХОЗА АХЧА КИРЕКТЕЛЕР
13.01.2017
Хабарлар
Хакасияның Ӧӧркі Чӧп президиумы 11 январьдағы чыылиинда 8 сурығ кӧрібіскен. Сурығларның пірсі ӧкіс палаларға теелген. Чыылығны Оӧркі Чӧп кнезі Владимир Штыгашев апарған.
Ӧӧн сурығлар санында «Ӧкіс палаларға, іҷе-паба хайии чох халған палаларға социальной хабазығ пирердеңер» Хакас Республика Законынзар алызығлар кирердеңер» закон проекті полған. Хазых хайраллирынӌа паза социальнай политикаӌа комитеттің устағӌызы Владимир Костюш, пу сурығны чарыдып, республика законынзар алызығлар федеральнай закон алыс парғаны хоостыра кирілчеткенін таныхтаан. Кӧзідімге, социальнай хабазығ алар праволығ ӧкіс палаларның санынзар наа аттығ категория кирілген - ӱгредіг тузында іӌе-пабазын ікізінең алай чалғыс іӌезін (пабазын) чідір салған палалар.
Ідӧк амғы законӌа ӧкіс палаларға хазна полызии субъекттің бюджедінең пирілче, че ол полызығ сині бюджетте кӧрілген ахчанаң палғалыстығ полча. Чарыда чоохтаза, полған субъект (регион) ӧкіс палаларға ахчаны пос оңдайли позытча: кем-де кӧп, кем-де асхынах арах. 159 № федеральнай законзар кирілген алызығларӌа, тізең, ӧкіс палаларға хазна полызии, тикке азырир, тикке кип-азах, ӧдік паза тӧзек-частых пирер нормалар хоостыра, толдыразынаң пиріл турарға кирек.
Владимир Костюштың искіриинең, 2017 чылның 1 январьына Хакасияда 3039 ӧкіс пала санға алылған. Хазна полызиин толдыразынаң пирҷең нормаларға кіргені 641 миллион 772 муң салковай кирексир. Республиканың 2017 чылға бюджедінде, тізең, пу пӧгіннерге 343 миллион 583 муң на салковай кӧріл парған. Хоза 298 миллион 189 муң салковай табарға кирек.
Ӧӧркі Чӧп кнезі Владимир Штыгашев закон проектін республиканың правительствозынзар ызарға киректелчеткенін таныхтаан. Кирек ахчанаң палғалыстығ нооза. Хакасия правительствозы пу сурығӌа позының сағыс-кӧрізін искірерге кирек. Закон проекті анаң на сессия ӱзӱриине сығарылар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде