Ынағ сӧбiре - пик чуртас
АҒБАН ГОРОД АДМИНИСТРАЦИЯЗЫНЫҢ УЛУҒ ЗАЛЫНЗАР ЧОН ЧЫЫЛҒАН. АНДА КІЧІГ ПАЛАҶАХТАРДАҢ ПАСТИ ХЫР ПАСТЫҒ АҒА-УУҶАЛАР ПОЛҒАННАР. ТИКСІ 35 СӦБІРЕ СЫЙЫХХА ТУРЫСХАН, «ХЫНЫС ПАЗА СЫН КИРТІНІС ӰЧӰН» МЕДАЛЬЛАР КӦП ЧЫЛЛАР ХАДА ЧУРТАП САЛҒАН 10 СӦБІРЕЕ ПИРІЛГЕН.
Ағбан город пазы Николай БУЛАКИН чоох тутхан:
- 8 июль православнай киртіністіг чонның ӱлӱкӱні полча, Муромдағы Ах чарых Пётр паза Февронияның кӱні. Пістің город пу кӱнде «Хыныс паза киртініс ӱчӱн» медальларны, Аарластығ пічіктерні паза ахчалығ сыйыхтарны кӱстенҷік, ынағ, хыныста чуртапчатхан сӧбірелерге пирерге чаратхан. Городта андағ сӧбірелер пары ӧріндірче.
Людмила паза Юрий Пещеровтар сӧбірезі «Істеніс династиязы» атха турысхан. Оларның чоны 149 чыл пӱдірігде істенчеттір. Кӧп палалығ сӧбіре Ольга паза Сергей Дмитриевтер сыйых алған. Татьяна Карамчакова паза Марат Кичеев ікі паланы кӧрерге алып алған ӱчӱн сыйыхха турысханнар. Пис чыл азыра чуртап салған, палалар ӧскірчеткен чиит сӧбіре Олеся паза Роман Евсеевтер таныхталғаннар. Залда одырчатхан пасха даа турыстығ сӧбірелер адалғаннар. Оларға Аарластығ пічіктер паза порчолар читірілген.
«Хыныс паза киртініс ӱчӱн» медальлар кӧп чыллар хада чуртап салған сӧбірелерге пирілген. Рагелий Алексеевич паза Ольга Петровна Боргояковтар 27 чыл хада чуртап, ӱс пала ӧскірчелер. Ӱлӱкӱнде 65 чыл хада чуртапчатханнар даа пар полғаннар. Кӧзідімге алза, Андреевтернің сӧбірезі. Олар пӱӱл 16 июньда тимір тойларын таныхтааннар тіп чоохтап пирген оларның хызы Татьяна Ивановна. Ідӧк олар Илбек Ада чаа ветераннары полчалар.
Ағбандағы паза Хакасиядағы архиепископ Ионафан чонзар алғыстас сӧстерінең айланған:
- Аарлығ паба-іҷелер, палалар! Пӱӱн Россия уғаа чарых Сӧбіре, хыныс паза киртініс кӱнін таныхтапча. Ағбан город чуртағҷылары ӱлӱкӱнні Преображенскай паркта, Ах чарых Пётр паза Февронияның хумартхызы хыринда таныхтидыр. Пу ӱлӱкӱн хынысха чарыдылча. Прай ниме хыныстаң пасталча нооза: сӧбіре тӧстелче, пала тӧріпче... Сӧбіреде палалар ӧсчелер, чуртаста орта тудынарға ӱгренчелер. Сӧбіре киртініс чох чуртабасха кирек. Прай чӱреемнең прайзыңарны мындағ ӱлӱкӱннең алғыстапчам!
Амғы туста сӧбірелер чарылыс парчатханына удаа тоғазарға килісче. Андағ ниме полбас ӱчӱн мындағ ӱлӱкӱннер таныхталчатханы чонға туза полар тіп сағынчам.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |