КИИ КЛАВИАТУРАЛАРЫ - ТАҢДАҒЫ КӰНДЕ
31.01.2017
Хабарлар
Компьютер пістің чуртастың «халазына» айлан парған тізе, саба полбас, неке. Тоғыста паза ибде аннаң тузаланчабыс.
Пірее искіріг кирек полза, клавиатурадағы букваларны пазып, аны интернетте таапчабыс. Ручканаң пічік пазарға арғаастанып, клавиатураны холға аладырбыс.
Мағаа клавиатурадағы буквалар алфавит хоостыра изерістіре пазылбааны чапсых пілдір парған. Орыс буквалары пір оңдайнаң, англия буквалары пасха оңдайнаң пазылғаны хайығ тартхан. Аннаңар клавиатураның тархынынаңар піліп аларға сағыныбысхам.
Пастағы компьютерлер тӧстелгеннең илееде тус ирт парған, оларның кӧрімі алызып одырған. Пастағы клавиатура 1873 чылда тӧстелтір. Андада Кристофер Скоулз пастағы печать машинказын сағын тапхан. Ол машинка буквалары хоостыра клавиатура иділген. Буквалар изерізі мындағ оңдайнаң пирілгені печать тоғызы майың парар ӱчӱн иділтір. Пастағы печать машинкалары, табырах пасчатса, сайбалып, тохтап парҷаңнар осхас.
Хазыхха хомай теелбинчеткен алғым клавиатура 19 чӱс чылда печать машинкалары нааҷылалғаннар, клавиатура пӱӱнгізіне чағын тимнелген. Телеграф тӧстелгеннең Морзе азбука искіріглері, точка паза тире полызиинаң, ызыл турғаннар. Соонаң Бордо телепечать машинказын сағын таап алғаннар. Клавиатура пастыра пазылған текст ызылған чирде чаҷында сых килҷең.
1943 чылда «Еnіас» компьютер тӧстелген. Аннаң ӧӧнінде чааҷылар тузаланғаннар. 1948 чылда, тізең, ЭВМ компьютерлер чарыхха сығарылғаннар. Оларнаң прайзы тузалан сыххан. 1960 чылда электроннай печать машинказына клавиатура сағын тапханнар. Соонаң кӧп тузаланыстығ клавиатура чуртасха кирілген, андар Соntrol, ALT клавишалар хосханнар. Мының алнындағы клавиатураларда 83 клавиша полған полза, 1987 чылдаң 101 клавиша пол парған.
Пӱӱнгі кӱнде проводтығ паза провод чох клавиатуралар пар. Хазыхха хомай теелбес улуғ синніг клавиатуралар тӧстелген. Чолда тузаланҷаң, ноутбукка килістіре, Интернет, мультимедиа, ойыннар клавиатуралары амды пар.
Таңдағы кӱнде, тізең, пісті столда хоосталған алай кии клавиатуралары сағыпча тіп піліп алғам.
Автор :
Тимнеен Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде