ХЫНҒАН ТОҒЫЗЫ ӦРІНІС АҒЫЛЧА
15.03.2017
Хабарлар
«Чылығ тоғазығлар» фестивальда Анжела ЛУЧКОВСКАЯ (оң саринда)
Аммғы туста Хакасияда аймах-пасха хакас сувенирлер садылча. Че минің хайиимны «MyRepublic» Интернет-магазинде садылчатхан открыткалар тартхан. Олар хакас оңдайынаң, че уғаа чарых сырларнаң хоосталғаннар.
Мындағ хайхастығ открыткаларны кем хоостапчатханын піліп алар ӱчӱн, Интернет-магазиннің тӧстегҷізі Дарья Актрунаң палғалысхам. Открыткаларны хакас чиит ипчі Анжела Лучковская хоостапчаттыр. Мин чиит хоосчынаң танызып алғам.
Анжеланың хыс фамилиязы - Кобежикова. Ӱгредии хоостыра чиит хыс дизайнер полча. Ол Ағбандағы прикладной информатика техникумында хоостирға ӱгренген, аны 2008 чылда тоосхан. Анда чайаачы оңдайлығ чиит хыс «Графика дизайнері» специальностьха ӱгреніп алған. Олох чыл Анжела Хакас техническай институтсар экономистке заочно ӱгренерге кірібіскен. Аны ол 2016 чылда маңнаныстығ тоозыбысхан. Экономистке ӱгренчеткенде, Анжела Ағбандағы прикладной информатика техникумында «Компьютер графиказы. 3D проекцияҷа интерьер тӧстирі» дисциплинаның преподавательі полған. Техникумда тоғынминыбысханда, интерьернең айғазып, чурттар істін иптирінҷе чахығлар толдырҷаң.
Экономистке ӱгреніп алғанда, Анжела Лучковская чайаачы тоғызынаң айғазарын узаратхан. 2016 чылда чиит идінҷек Дарья Актру Анжелазар хостел чазирынҷа сурығнаң айланған. Дарья Ағбанда «Лукоморье» хостел азарға пӧгінген, че аның интерьерін хакас оңдайынаң чазабызарға кирек полған. 2016 чылның авгузында «Лукоморье» аалҷыларға ізіктерін асхан.
Чиит дизайнер паза идінҷек аннаң андар хада-пірге тоғынарға чӧптес салғаннар. «Лукоморьезер» пасха регионнардаң паза хырығ озаринаң аалҷылар кил сыхханнар. Дарья оларға хакас сувенирлерін садарға сағыныбысхан. Иң пастап Дарьянаң Анжела «Этника» открыткалар чыындызын тӧстееннер. Открыткалар уғаа чарых ӧңнернең хоосталғаннар. Открыткадағы полған на хоос адал парған.
- Ноғадаңар піс мындағ открыткалар сығарарға сағыныбысхабыс? Ниме сығарарын піліп алар ӱчӱн, піс Хакасия чуртағҷылары паза туристтер аразында сурастырығ иртірібіскебіс. Оларның чӧптерін санға алып, мындағ открыткалар сығарарға сағыныбысхабыс. Амғы туста Хакасияның сувенирлері садыға читкіҷе сығарылча. Пістің республикада уғаа сіліг паза чахсы сувенирлер итчелер, че олар прайзы тӧӧй арахтар. Сувенирлер тӧӧй арах оңдайнаң, ӧңнернең тимнелчелер. ПісДашанаң пӱӱнгі кӱнге килiстіре сувенирлер сығарарға сағыныбысхабыс. Открыткаларны чарых ӧңніг акварельнең хоостап сыххам. Ол ӧңнер хоостыра пістің республиканың чир-чайаан сілиин кӧзіт пирерге сағынчам, - сағыстарынаң ӱлесче Анжела Лучковская.
«MyRepublic» Интернет-магазинде открыткалардаң пасха, ідӧк холнаң иділген сабыннар, от чейлері, хоостар, хакас орнаменттерінең чазалған ідіс-хамыстар садылча. Пу чағында Анжеланаң Дарья национальнай оңдайнаң тимнелген подушкалар, шторалар, салфеткалар сығарарға пӧгінчелер. Прай пу ниме-ноолар коллекциянаң сығарыларлар. Пастағы чыынды «Этника» адалча, ікінҷізі - «Чир-чайаан», ӱзінҷізі - «Хакасияның омалары», тӧртінҷізі - «Ағбан город». Прай пу темалар амғы тусха килістіре полчалар тіп санапча чиит чайаачы.
2017 чыл Экология чылы чарлалған, аннаңар пу темаа хайди даа хайығ саларға кирек тіп таныхтаан Анжела Лучковская. Ағаа чарыдып, дизайнер «Чир-чайаан» чыындыны чайапча. Халғанҷы ікі коллекцияда дизайнер республиканың саблығ кізілерін паза ӧӧн городын хоостирға пӧгінче. Олар аалҷыларның хайиин тартарлар тіп ізенче ол. Ағбан городта танығлығ орыннар кӧп, оларны хоостарда, сувенирлерде кӧзіт пирзе, аалҷыларның сағызында ол ӱрге халар.
Чиит хоосчы республиканың наа музей комплексінде ирткен «Чылығ тоғазығлар» фестивальда араласхан. Анда Анжела Лучковскаядаңар пастағызын на піліп алғаннар. Аның открыткалары, хоостары чонның кӧңніне кірген. «МуRерubliс» Интернет-магазин сатчатхан полған на ниме-нооның тании пар. Анжеланың тоғыстарының тании - хой порчозы. Хой порчозы - Хакасияда ӧсчеткен уғаа сіліг чахайах, аннаңар тиктең нимес ол танығ чіли алылған.
- «Чылығ тоғазығлар» фестивальда кізілер минзер пастырып, хайдағ сіліг хоостар тіп хайхааннар. Кічіглер дее, улуғлар даа іди хоостирға ӱгреніп аларға сағынчатханнарын чоохтааннар. Аннаңар мин пӱӱл Харатаста хоостаҷаң студия азарға сағыс тутчам. Андағ сағысха фестиваль соонаң килгем. Амғы туста хоостирға ӱгреніп аларға сағынчатхан кізі кӧп, - теен Анжела Лучковская.
Анжела ікі хызыҷахтың іҷезі полча. Олар ам даа уғаа кічіглер: Еваа - 2 час 10 ай, Никаа - 1 час 5 ай. Че, іди дее полза, чиит іҷе хоостирға тус таапча. Ағаа іҷезі Лариса Ивановна паза хада хонғаны Роман чахсы полысчалар, чӱрекке чарапчатхан тоғызынаң айғазарға оңдай пирчелер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде