«ХАБАР» ГАЗЕТАНЫҢ ТОҒЫНҶЫЛАРЫ СЫЙЫХХА ТУРЫСТЫЛАР
24.03.2017
Хабарлар
Чыл сай иртірілчеткен «Бал прессы» республикадағы СМИ-ларның кибірліг пайрамы пу неделяда хатап иң артых хабарҷыларны таныхтады.
Ідӧк анда «Хакасия, алнынзар!» хабарҷыларның аразында иртірілген марығның салтары иділген. «Хабар» газетаның тоғынҷылары анда тӧреміп араласчапар. Пӱӱл «Минің Хакасиям!» номинацияда чиңіс тутхан пістің газетаның хабарлар пӧлиинің редакторы Елена Чезыбаева. Хакасияның спорт министерствозы хакас газетазының тоғынҷызы Анатолий Суптрековха алғыстас пічиин читірген.
Хабарҷыларның пайрамы пӱӱл 7-ҷі хати иртірілді. Чыл сай анда иң артых газета, телевидение, радио тоғынҷыларын таныхтапчалар. Тиксі алза, Хакасияда 1 муңа чағын СМИ тоғынҷызы саналча. Кӱннің сай хабарҷылар республикада, тиксі Россияда полчатхан нимелерні чарытчалар. Оларның хайиинда тудылча палаларның, улуғ частығ кізілернің чуртазы, чуртағҷылар, тізең, СМи пастыра политикада, экономикада паза пасха даа сфераларда полчатхан алызығларны піліп алчалар.
«Хабар» газета ідӧк кӱннің сай хығырығҷыларына Хакасияда, хазнада паза тилекейде полчатхан нимелерні чарытча. Пістің ӧмеде 40 азыра кізі істенче, хайзы кӱннің сай пос газетазын чахсыландырарға, тилідерге кӱстенче. иң пастап газета хығырығҷыларға туза ағыларға кирек. Аны чахсы піліп, пістің хабарҷылар аймах сфераларны тирең чарытчалар: ол - экономика, аал хонии, ӱгредіг, культура паза пасхазы даа.
Пістің тоғызыбыс пӧзік паалалза, хабарҷыларның тоғынҷаң кӧңні дее кӧдіріл парча. пайрамнығ иирде пістің хабарҷыбыс Анатолий Султреков, газетаның культура паза спорт пӧлиинің редакторы, Хакасияның спорт министерствозының алғыстас пічиин алғаны - ол аның тоғызының иң пӧзік паалии полар тіп сағынчам. Хакасия культуразының саблығ тоғынҷызы, хабарҷы паза писатель Анатолий Егорович Султреков газетада 40-ха чағын чыл істен парир. Спорт хабарларын ол пӱӱнгі кӱнде дее ӧткін чарытча. Аның тоғызы хоостыра хығырығҷылар пістің саблығ спортсменнерібістеңер, оларның чидіглерінеңер піліп алчалар.
Газетаның хабарлар пӧлиинің редакторы Елена Чезыбаева «Хакасия, алнынзар!» марығда аралазып, чиңіс тутты! Елена Михайловна хабарҷыларның аразында иртірілчеткен марығларның тӧреміл араласчызы полча. Ирткен чылда ол пайрамда Хакасия правительствозының алғыстас пічиине турысхан. Хада тоғынчатхан арғыстарыбысты сыйыхтатхан ӱчӱн алғыстапчабыс.
Ідӧк чыл сай СМИ-ларның ветераннарын таныхтапчалар. Пӱӱл «Хабар» газетаның ветераннары Галина Чаптыкова (Сунчугашева) паза Галина Райкова таныхтатханнар. Галина Ефимовна газетада 40-ча чыл істен салған. Ол ӧӧнінде культура хабарларын чарытхан. Галина Васильевна ідӧк газетада ӱр чыллар істенген. Ол аймах темаларны чарыт турҷаң. Пайрамнығ кӱнде СМИ ветераннарына сыйыхтар читіргеннер.
Пӱӱл ідӧк иң артых хабарҷыны, иң артых СМИ-ны тапханнар. СМИ-лар аразында иң артых «Черногорский рабочий» газета полыбысхан.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде