ЧАА КАФЕДРАЗЫ АЗЫЛҒАНЫ - ОЛ УҒАА УЛУҒ ЧИДІГ!
31.03.2017
Хабарлар
МЫНДАҒ СӦСТЕРНЕҢ ТООЗЫЛҒАН РОССИЯНЫҢ ХАЗНА ДУМАЗЫНЫҢ ДЕПУТАДЫ ЛАРИСА ШОЙГУНЫҢ СИБИРЬДЕГІ ФЕДЕРАЛЬНАЙ УНИВЕРСИТЕТТІҢ ХАКАС ТЕХНИЧЕСКАЙ ИНСТИТУДЫНЫҢ ЧАА КАФЕДРАЗЫНАҢ ТАНЫЗАРЫ. ПУ НЕДЕЛЯДА ЛАРИСА КУЖУГЕГОВНА, ХАКАСИЯЗАР ТОҒЫС ЧОРЫҒЫНАҢ КИЛІП, ХТИ-ның ЧАА КАФЕДРАЗЫНАҢ ТАНЫСХАН ПАЗА ТАҢДАҒЫ ОФИЦЕРЛЕРНЕҢ, РЯДОВОЙ-СЕРЖАНТТАРНАҢ ЧООХТАЗЫП АЛҒАН.
ХАКАС ТЕХНИЧЕСКАЙ ИНСТИТУТТЫҢ КУРСАНТТАРЫ ТАСХАР ПЛАЦТА ПІР ЛИНИЯА ТУРЫБЫСХАННАР. ОЛАР ПАЗА ИНСТИТУТТЫҢ УСТАҒ-ПАСТАА РОССИЯНЫҢ ХАЗНА ДУМАЗЫНЫҢ ДЕПУТАДЫ ЛАРИСА ШОЙГУНЫ ІДИ УДУРЛААННАР. ААЛҶЫЛАР КИЛГЕНДЕ, КУРСАНТТАР, РОССИЯ ФЛАГЫН КӦДІРІП, ГИМН ТОЛДЫРҒАННАР. ТАҢДАҒЫ ОФИЦЕРЛЕР ПАЗА РЯДОВОЙ-СЕРЖАНТТАР СТРОЙНАҢ ПАРҒАН СООНАҢ, ЛАРИСА ШОЙГУҒА ИНСТИТУТТЫҢ ПЛАЦЫНДА ТУРЧАТХАН ЛОКАТОРЛЫҒ ӰС АВТОМОБИЛЬНІ КӦЗІТКЕННЕР. АНДА РАДИОЭЛЕКТРОННАЙ АРАЧЫЛАНЫС ОБОРУДОВАНИЕЗІ ТУРЧА.
Институттың аалҷылары ідӧк чаа кафедразының тактика, радио-химическай паза биологическай арачыланыс класстарын кӧріп алғаннар. Электроннай тир клазында курсанттар зачет тутчатханнар. Олар ХТИ-ның чаа кафедразының курсанттары «8», «7», «8» очколарға атханнар. Лариса Кужугетовнадаң электроннай автоматтаң ат кӧрерге сурынғаннар, ол пастап тоғыр полған, че соонаң ынабысхан. Автоматты холға алып, пастап «0», «3», «2» очколарға атхан, че соонаң «10», «10», «10» очколарға читкен.
- Пастап автоматха кӧнігіп аларға кирек, - таныхтаан Лариса Шойгу. - Мині пабам кічігде карабиннең атарға ӱгреткен. Че аның соонаң паза мылтыхты холда тударға киліспеен. 30-ча чыл холда тутпаан поларбын, неке.
Іди курсанттарның орнына зачетты Лариса Кужугетовна тутхан.
Лариса Шойгу институттың наука-ӱгредіг лабораториязына чӧпсінген, хайда студенттер аймах ағастарны тирең істесчелер. ХТИ-ның студенттері істезіг тоғыстарынаң пасха хазналарзар тӧреміл чӧрчелер. Ур ниместе Швейцариядаң айланғаннар. Анда чиит ученайларның форумы ирткен. Ідӧк Хакасияның улуғ класстар ӱгренҷілері паза ХТИ-ның студенттері чайғызын экология экспедицияларына сыхчалар.
Институтнаң танызары чаа кафедразы курсанттарынаң тоғазығнаң тоозылған. Анда ӱгредіг учреждениезінің директоры Елена Бабушкина аалҷыларға институттың тоғызынаңар паза пӧгіннерінеңер чарытхан. Ідӧк анда курсанттарға Хазна Думазының депутадына сурығлар пирерге оңдай полған. Іди чииттер Лариса Шойгудаң аның чуртазында девиз пар ба тіп сурғаннар. Хайди нандырған депутат, аның ӧӧн девизі - алнынзар тиліс.
- Чуртас - ол тиліс. Кізі чуртазын олаңай иртірбеске кирек. Ол кӱннің сай наа ниме піліп аларға, алнынзар хаалирға кӱстенерге кирек. Андағ полза, хайдағ даа кізі пӧзік чидіглерге чидер, - таныхтаан Лариса Шойгу.
Чапсых тоғазығ тоозылчатханда, Хазна Думазының депутады таныхтаан: «Улуғ нимес городта чаа кафедразы азылғаны - ол уғаа улуғ чидіг паза алнынзар хаалағ. Анзы республикада ӱгредіг кирее пӧзік синде парчатханын киречілепче».
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде