МАЛ ИМҶІЛЕРІНЕ - НАА ТУРА
31.03.2017
Хабарлар
Пу наада Чоғархы Асхыстағы ветучастоктың туразы азылды. Аалда алында пу орында Калинин совхозының 4-ҷі фермазының мал хазаалары турған. Совхоз изеліп пастаанда, хазаалар изелібӧк парғаннар. Амды анда ікілер квартиралығ ікі тура турча. От хазаазының орнында кӱскӱдең пӱдіріг парған.
Мал имнеҷең участоктың туразы турыбысты. Тоғынарға прай оңдайлар пар: позының пезі, мындох суғ насозы, чылығ-соох суғ. Аалдағы улус пу орында, хазаалар изел парғанда, кизек чир сиденнеп салғаннар. Малларны изере кирерге орын (раскол) идіп алғаннар. Аалдағылар мал илееде тутчалар. Прайзы ла чидекке чӧрбинче, састар. Аннаңар мындағ нимелер иділген. Малларны «расколға» кире сӱрібізіп, мындох хан алчазың, прививкалар иртірчезің.
Пістің чонның Наа чылына килістіре наа ветучасток туразын кибірли астылар. Ағбаннаң, Асхыстаң пастыхтар килгеннер. Аалдағы чон чыылысхан. Чапсых нооза, мындағ ниме кӱннің полбинча. Ағбаннаң Хакасияның хазна ветеринарнай инспекторларының устағҷызы Гульнара Оразметовна Керимова полысчыларынаң хада килген. Асхыс аймаа пазының орынҷызы Галина Викторовна Новикова паза аймахтың ӧӧн ветеринарнай инспекторы Андрей Алексеевич Конусов, ветстанцияның устағҷызы Ирина Сергеевна Найдёшкина килгеннер. Пазадағы ветучасток устағҷызы Анатолий Иванович Майнагашев полғанох.
Аалҷыларны чоннаң хада удурлааннар Чоғархы Асхыс аал чӧбінің пазы Александр Кимович Окунев, ветучасток устағҷызы Сергей Николаевич Иптышев паза аалдағы Культура туразының тоғынҷылары.
Кибірлеп, наа тураны асханнар, пастыхтар чоох тутханнар. Анаң хызыл лента хыплааннар. Мында ипчілерге ӱлӱс тӱскен. Г.О.Керимова, Г.В.Новикова паза И.С.Найдёшкина, хызыл лентаны хыплап, ізік асханнар. Улуғ нимес тура, че тоғынарға орын читче. Мының алнында ветучасток аал чӧбінің туразында полған. Сергей Николаевич, маллардаң хан алып, прививкалар идерге пеер машиналығ килҷең. Аалдағы чон сизінче, маллардаң хан алар кӱн читсӧк, тигір сайбал парча, чил ӱбӱрче, хар алай наңмыр чаап сыхча. Чылынҷаң, ағаа хоза, хол чуғҷаң оңдай чоғыл. Амды уғаа чахсы полар. Имҷілерге дее истіг, мал ээлеріне дее маңат полар. Чылынып аларзың, хол чууп аларзың. Ниме чазырҷаң, хан алчатхан кізінің холы прай хан на пол парча. Кӱн тооза іди тоғын кӧрдек.
Аннаңар Александр Кимовичнең Сергей Николаевич ӧӧркі ӱлгӱдегілерге алғыстарын читіргеннер. Аал пазы А.К.Окунев ветучастокка сыйых иткен, ізік алнына тӧзеҷең кибізектер читірген. А.И.Майнагашев стенее ілҷең час сыйлаан. Соонаң чоохтанып ала пас чӧрче: «Минің ағас тураҷаам иргі. Мындағох наа тура иттіріп алҷаң ма. Итсе, минің тураҷаам, ағастаң даа киртіп иділген полза, ам даа илееде чыл турар».
Часхы тоғыстары пасталыбысты. Чоғархы Асхысха килістіре ветучасток туразын пӱдір пирділер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде