Позраан Ууҷа
Хазааға тимнелген пӱдіріг мааннап иділер бе зе. Аны, пасха аалдаң кӧзіріп, інек хазааларынаң тоғыр турғыс салтырлар. Хысхы читсе, андағы чон, соохха тооп, матап илеҷең. Тимір пестер полҷаң. Сырып, табырах кӧйіп, ӱс парҷаң. Позраан иней сырыпты артынҷах идіп тазыҷаң. Аның ікі хыс полған. Пірсі - кинек, ікінҷізі - кічіг частығ. Аннаңар олар аар чуртасты кӧрҷеңнер.
Че Позраан Ууҷа, чазы улуғ даа полза, аарға пастырбин чуртаҷаң. Ол ирте часхы тустаң орай кӱскее теере олтырыхтаң сыхпаҷаң, теедег. Ах Уӱс суғның палығын тудып, палаларын азыраҷаң.
Ол туста хыл-леска ниме хайдаң полар. Чылғы хузуриинаң, ніске чіп хадып, палыхтаҷаңнар. Позраан Ууҷа ілес (хармах) сабын тал ағастаң идіп алҷаң. Аның хармахтарының ағылы чох полҷаң. Олаңай іңені, ізідіп-ээлдіріп, хармах идіп алҷаң. Ағылы чох андағ хармахха палых тыынза даа, аны суғдаң сығара тартып аларға оой полбаҷаң, позып парыбысчаң. Че Позраан инейнің палых тудып алар узы улуғ полған, ипти ле сығарып алҷаң. Соонаң ол ағыллығ хармахтарнаң палыхтап пастабысхан.
Мин позым кӧргем, хайди ол ағылы чох хармахнаң палых тутчатханын. Хармағының чібі чылғы хузуриинаң пірее 1520 см узун хадылған полҷаң. Пазында чоон тӱӱнҷек. Итсе, чібі андағох чоон полҷаң. Пазында хорғамҷыл. Хармахха ілдірген сомысханы чоон паза хызыл ӧңніг. Хармағына ілдірген сомысханны ол хаҷан даа ӱзе тартпаҷаң. Сомысханнарны ол азынадох хазып алчаттыр. Наа хазылған сомысханның чызы улуғ, ағаа хоза, аның істінде тобырах кизектері поладыр. Андағ сомысханға палых таа тыынарға хынминча. Позраан ууҷаның чӧбі хоостыра, сомысханнарны, азынада хазып, хуруғ тобырахха салыбысса, ол позы арығланып алча, хызыл пол парча. Андада аның тӱӱнҷек-хурчағлары даа чітче, ол оой ла ӱзілбинче.
Мына хармах суғ тӱбінзер тасталды. Аар хорғамҷыл аны аар-пеер позытпинча, суғ ағынына саптыртпинча. Палых суғ тӱбінде хыймырапчатхан сомысханны пӱкӱлеезінең сиир тастабысча.
Позраан ууҷаның хармағында хаҷан даа поплавок полбаҷаң. Палых тартхлапчатханын ол хол узынаң на сизін салҷаң. Хармахха тыынған палыхты ол уғаа сибер сығарып алҷаң. Позы азах ӱстӱнде турбаҷаң. Чар ӱстӱне ниме-де тӧзеп алып, анда истіг одырҷаң.
Хармағын ол суғ ағыны соонзар тастаҷаң. Анда улуғ палыхтар турадыр тіп ӱгретчең. Ағында оох палыхтар турча тіҷең. Аны кӧріп, киртінчезің. Сынап таа, улуғ палыхтар ла тутчаң. Пірее оох палых хаап парза, хармағын, суғ ӱстӱне ле сығарып, сілігібісчең. Палых хармахтаң позы азырыл парҷаң. Иней ӧӧнінде хара хоораларны, кӱскӱстерні тутчаң. Кӱскӱс - чылбыраң, хастырығы чох, ачын палых. Хоораның даа, кӱскӱстің дее иді най татхыннығ. Ол чылларда Уӱсте палых пар полҷаң.
Позраан Ууҷа тутхан палиин аалда чииске орнасчаң. Чаа паза чаа соондағы чылларда чон асха тың майыххан. Чон ӧӧнінде хырлых (гречкаа тӧӧй ӱс хырлығ пуртах ӧзімнің ӱрені), хыра тартхан орыннарда ӧзіп, тоолап парғанын тобырахнаң хада сыбырып, арығлап, чиис тимнеҷең. Позраан ууҷаның ікі хызы ол кирекке чарабаҷаң. Улии, азағынаң кинемніг полып, ырах пар полбаҷаң. Че чоныбыс- тың чағбан чӱрее улуғ. Полбаанға полысчаң, илеенге хабасчаң кізі хайди даа табылҷаң.
Колхоз маңат сыххан азын хазнаа, Чиңіс кӱзіне тооза пирібісчең. Алынҷа чылларда ӱренге дее ас халбаҷаң. Прай ниме - ас-тамах, мал-хус тооза андар пар турҷаң. Аннаңар даа, неке, пістің хазнабыс, прай чоннаң пірге тудынып, аар чаалазығда Чиңіс кӱніне читкен.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |