ПІСТІҢ ЧОННЫҢ ЧУРТАС ТИЛӀЗӀ СЬЕЗДТЕРДЕҢ ПАСТАЛҒАН
18.04.2017
Хабарлар
Хакас чонның I съезді 1917 чылның 6-7 апрельінде Асхыста ирткен, II съезді -10 - 30 июньда 1917 чылда Ағбан пилтірі аймааның Чарков аалында. Аннаң пеер 100 чыл ирт парды. Хакасияда пу танығлығ кирекке чарыдылған алғым мероприятиелер иртірілер. Аннаңар Хакасия пазы Виктор Зимин оларны хайығда тудар пӧгіннең тоғысчы ӧме тӧстирге чахаан.
Андар республиканың аймах министерство-ведомстволары, муниципалитеттернің устағ-пастаа кірчелер. Пу кӱннерде тоғысчы ӧменің пастағы чыылии ирткен, аны апарған Хакасия пазының орынҷызы Владимир Крафт.
Тоғысчы ӧменің кізілері пу чыылығда прайзы араласпаан. Мында Хакасияның национальнай паза территориальнай политика министрі Дмитрий Тодышев, культура, ӱгредіг паза наука министрлерінің орынҷылары Лариса Киштеева паза Юрий Сагалаков, Ағбан пилтірі аймааның администрация пазының орынҷызы Елена Баравлёва полғаннар.
Чыылығда хакас чонның пастағы съездтері ирткеннең 100 чыл толчатханына чарыдылған мероприятиелернің азынада планы ӱзӱрілген паза оларны иртірер ӱчӱн нандырығлығ кізілер турғызылған. Пу план ам даа ӱзӱрілче, ағаа хайдағ-да хоза нимелер кирілче алай ба хыйа алылча. Таныхтирға кирек, мероприятиелерні иртірер пастағнаң республиканың министерстволары паза муниципальнай пӱдістері сыхханнар.
Хакас чонның пастағы съездтеріне 100 чыл толчатханына чарыдылған кӧзідіглер, уроктар, чайаачы иирлер Хакасияның школаларында, музей-библиотекаларында чыл тооза иртірілер. Че ӧӧн мероприятиелерні 21-22 июльда иртірерге пӧгінчелер. Мында наука-практикалығ конференция тоғызына кӧп хайығ салылар. Анда 120-ҷе кізі аралазар тіп кӧрілче. Оларның искіріглері пастағы съездтернің тархынына, хакас чонның тилізінең палғалыстығ сурығларға чарыдылар.
Мероприятиенің ікінҷі чардығы Чарков аалда иртер. Аннаңар аалның ибіркізін иптирінҷе кӧп тоғыс апарарға кирек тіп таныхталған. Мында ӱлгӱлердең пасха аал чуртағҷылары ӧткін аралазарға кирек тіп чоохтаан Владимир Крафт. Ідӧк Чарковта, чоллар иптирінең пасха, олған спорт площадказын турғызар паза парк тӧстир сағыстар пар.
Ідӧк чыылығда хакас чонның саблығ ученайы, халых-чарыдығлығ тоғыс апарған С.Д.Майнагашевке «Алып» орденні пирер паза ағаа чарыдылған хумартхы чардыны хазирынаңар сурығлар ӱзӱрілген. Мындағ пастағнаң хакас чонның Улуғлар чӧбі сыхтыр.
Чыылығда мероприятиелер иртірерінең палғалыстығ ӧӧн сурығлар ла таныхталған. Амды оларны пӧгерге, пӧзік синде иртірер ӱчӱн кӧп тоғыс апарарға кирек.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде