ЧИИТТЕРІБІС СЛУЖБА ИРТЧЕЛЕР
Хакас Республиканың чааҷылар комиссариадында часхыдағы хығыртығ кампанияның салтарлары хоостыра пресс - конференция ирткен.
Чааҷылар комиссары Виктор Максимчуктың чооғынаң, Хакасияның алнында пӧгін турған: срочнай службаа 750 кізіні хығыртыбызарға. Тиксі Хакасиядаң армияа 751 кізі парыбысхан. Хығыртығ комиссиязына 3000-ҷа оол хығыртылған. Оларның 800-че кізізі хазии хоостыра срочнай службаа киліспеен. Хайди таныхтаан Виктор Михайлович, армия службазына чарапчатхан оолларның саны улуғ. Призывниктернің 60% хазии хоостыра ВДВ, спецназ войсколарынзар кіріп аларға оңдай полған.
Призывниктернің 4% - пӧзік ӱгредіг алып алған ооллар, ортымах ӱгредігліг 60 % призывник полған. Призывниктернің 18% - ДОСААФ алай пасха ӱгредіг заведениелерін тоосхан чииттер. Олар С категориялығ водитель удостоверениезін алып алғаннар.
30 призывник сӧбіреліг. Оларға ибдең ырах нимес служба иртерге чарадылча. Че оларның піреезі ырах орыннарзар парарға сағыныбысхан.
Виктор Михайловичтің чооғынаң, палалығ призывниктернің сӧбірелеріне хазна ахчалығ полызығ пирче.
Ирткен чылда 53№ Федеральнай законға алызығлар киріл парған. Аны хоостыра призывникке срочнай алай контрактнай служба таллап аларға чарир. Срочнай служба пір чыл иртче, контракт хоостыра - ікі чыл. Ағаа хоза, чааҷылар комиссариады 140 оол-хыстарны чаа училищелерінзер сыныхтағлар тударға ызыбысхан. Ирткен чылда 33 кізі ӱгренерге кіріп алған.
Чааҷылар комиссарының орынҷызы Тарас Грабовой таныхтаан, пістің призывниктер ӧӧнінде сухопутнай войсколарда служба иртчелер - 60%, ВВС-та - 13%, ВМФ-та паза ВДВ-да - 5%. Пістің призывниктер Читада, Балашихада, Новосибирскте, Ульяновскта, Самарада, Хабаровскта, Курскта, Екатеринбургта,
Белгородта, Орскта, Омскта, Улан-Удэда служба иртчелер.
Альтернативнай гражданскай службаа 10 кізі ызылған. Пір кізі Хызылчарзар почтада служба иртерге парыбысхан. Пір кізі Ағбандағы почта пӧлиинде тоғынар, республиканың имнег туразында пір кізі істенер, пір кізі - пала тапчаң турада, алты кізі - Ағбандағы ветераннар пансионадында. Альтернативнай служба 21 ай иртче.
Че апрельде улуғ ӧрт сыххан сылтаанда, 7 кізінің срочнай служба иртер тузы кӱскӱзер чылдырыл парған. Хазии хоостыра 2 кізі хығыртығдаң позыдылған, 7 кізее отсрочка пирілген.
Чаа-имҷілер комиссиязының кнезі Флюр Тимерхановтың чооғынаң, имҷілер комиссиязын 3031 кізі ирткен. Оларның 804-і хазии хоостыра пірее войсколарзар киліспинче.
Чааҷылар комиссариадының юридическай пӧлии устағҷызының тоғызын толдырчатхан Сергей Збадыка таныхтаан, пӱӱл службадаң тис чӧрчеткен кізілернің саны асхынах. Кӱскӱдегі хығыртығ кампанияда службадаң тис чӧрчеткен 26 кізідең тоғыр материаллар істезіг комитедінзер ызылған. 4 кізі чарғылатхан. Амғы хығыртығ кампания тузында 1 ле кізідең тоғыр материал тимнелче. Пу саннар кӧзітчелер: чааҷы службазының престижі ӧсче. Чиит кізілернің армияа парар кӧңнілері пар.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |