АЙМАХ ТІЛНЕҢ ПАЗЫЛҒАН КИБЕЛІСТЕР
16.05.2017
Хабарлар
Кибелістер хығырчатханнар аразында ирткен марығда олар аймах-пасха тіллернең истілгеннер: хакас, орыс, саха, тува паза шор тіллерінең. Ол марығ «Ынархас чоллары» фестиваль тузында Н.Ф.Катановтың адынаң Хакас гимназия-интернадында ирткен. Марығ 11- 14 паза 15 - 18 частығ ӱгренҷілер аразында парған.
Чарғыҷыларға, Россияның Писательлер пірігізінің кізілеріне, орындағы пӧліктің устағ кнезі Альбина Курбижековаа, Россияның паза Хакасияның саблығ артизі Татьяна Майнагашеваа паза Хакасия культуразының саблығ тоғынҷызы Олег Шулбаевке, чиңісчілерні таныхтап аларға оой полбаан: олғаннар хоости пазылған кибелістерні уғаа чахсы хығырғаннар, постарының Чир-сууна, аның кізілеріне, чир-чайаанына хыныстарын чарыда кӧртіс пиргеннер.
Аннаңар марығ араласчыларының салтарлары 1-2 ле санға пасха пол турғаннар, хайзыларының саннары тиң полған. Аның сылтаанда саарбахтар аразында, тиң саннар чыып алып, пір саңай ікі чиңісчі пол парған: Аима Толмачёва (Хакас гимназиязы) паза Далай Докпут (Тува). Ікінҷі орынға «Раёк» команда (Омск) сых парған, ол «Ряба таңах» нымахты ойын оңдайынаң кӧртіс пирген, ӱзінҷі орында - постың кибелізін толдырған Алексей Чернышёв (Харатас).
Чииттер аразында ізестіг чиңіс тутхан Пилтір аалдағы школаның ӱгренҷізі Владимир Чебодаев; ікінҷі орында - Павел Темников (Харатас); ӱзінҷі орынға ідӧк ікі кізі турысхан: Татьяна Тенешева (Шерегеш г., Тағлығ Шория) паза Елена Свотина (Курдюм станция, Саратов облазы).
Чиңісчілер паза сыйыхтығ орынға турысханнар аарластығ дипломнар алғаннар, прай араласчылар, тізең, сертификаттарнаң таныхталған.
Автор :
Очол АЛБЫНАКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде