ХАКАСИЯДА ЧУРТИРҒА ИСТЕНЧЕЛЕР
Чыылысхан чонны еврейлер пірігізінің кнезі Григорий Пехотник алғыстаан:
- Аарлығ арғыстар, пӱӱн улуғ кӱн - Ағбанда синагога азылча. Пістің город улуғ нимес. Парлар улуғ городтар, че анда синагогалар чоғыл. Пу турадаң кізілер чахсы кӧңніліг нан турзыннар. Хакасияда аймах нациялығ чон кӧп чуртапча, прайзы удур-тӧдір ынағ тудынча. Піске, еврейлерге, Россияда чуртирға истіг. Че иң маңат пілдірче Хакасияда чуртирға. Мин Хакасияның Ӧӧркі Чӧп кнезі Владимир Николаевич Штыгашевке улуғ алғызым читірчем. Ол піске пу кінні азарға чахсы хабасхан. Прайзы часкалығ ползын!
Пу ӱлӱкӱнде Хакасияның Ӧӧркі Чӧп кнезі Владимир Штыгашев, республика пазы полған Алексей Лебедь паза Хакасияның национальнай паза территориальнай политика министрі Дмитрий Тодышев полғаннар. Ідӧк килгеннер Россияның ӧӧн раввині Берл Лазар, орындағы еврейлер пірігізінің лидерлері, Россия регионнарынаң паза хырығ озаринаң улуғ аалҷылар.
Еврейлер улуғ алғыстарын Хакасияның паза Ағбан городтың администрациязына паза пӱдірігҷілерге читіргеннер. Хакасияның национальнай паза территориальнай политика министрі Дмитрий Тодышев чоох тутхан:
- Ӱлӱкӱннің аарлығ араласчылары, мин сірерні Хакасия пазы Виктор Михайлович Зиминнің паза пістің министерствоның адынаң прайзын алғыстапчам. Хакасияда еврейлернің синагогазы хаҷан даа чох полған. Пӱӱн сынап улуғ кӱн. Пістің республикада кӧп аймах нация чуртапча. Прайзы удур-тӧдір ынағласча, постарын иптіг тудынча. Прайзы амыр-хазых паза пілізіп чуртазын. Піс сірерге оргтехника сыйлапчабыс. Прайзын ӱлӱкӱннең!
Кінні азарына тимненіс иртеннең сығара парған одыр. Т.Шевченконың орамазынҷа иртчеткен кізілер, хайдағ ӱлӱкӱн поларын сурастырғлап, постарына кіннің азыларына килерге чарир ба тіп сурынтырлар. Еврейлер пістің ізік прайзына азых тіптірлер. Иирде чуртағҷылар сынап таа илееде килгеннер. Анзына еврейлер тың ӧрінгеннер.
Еврейлер пірігізінің кініне сыйыхтар кӧп сыйлааннар. Россияның ӧӧн раввині Берл Лазар алғыстастарға хозылған:
- Ағбанда мындағ кін пӱдірерге чарадылчатса, андағда пасха даа городтарда пӱдірерге чарадылар. Пасха городтардағы еврейлер, сірердең кӧзідім алып, ідӧк синагогалар, кіннер пӱдірзіннер. Пу чахсы пастағ. Еврейлер Хакасияда чуртирға истенчелер, аннаңар мында халғаннар, кін пӱдіріп алдылар. Мындағ тура пӱдіргені - ол уғаа чахсы танығ, кізілер мында ӱр чуртирға сағынчалар. Пу тура прайзына хаҷан даа азых ползын!
Хакасияның Ӧӧркі Чӧп кнезі Владимир Штыгашев ідӧк еврейлерні алғыстаан:
- Аарлығ нанҷылар, мин мындағ чарых тураның азылғанына прай чӱреемнең ӧрінчем. Еврейлер пу турада, чыылызып, ағырсымнығ сурығларын пӧгерлер, Худайға пазырарлар. Кӧп еврей Хакасия тилізіне улуғ хозым иткен. Хакастар оларнаң хаҷаннаңох сығара ынағласчалар. Хакастар еврей арғыстарының аттарынаң палаларын адааннар, іди піреезі Абрам, Моисей пол парған. Пу чахсы кибірге мыннаң мындар тудынарға кирек. Имнег киреенде, пӱдірігде, культурада олар пістің республикаа улуғ хозым иткеннер.
Еврейлер кінінің ізии алнында хызыл лента тарт салтырлар. Аны хыплирға еврейлер пірігізінің кнезі Григорий Пехотникті, Россияның ӧӧн раввині Берл Лазарны, Хакасияның Ӧӧркі Чӧп кнезі Владимир Штыгашевті, национальнай паза территориальнай политика министрі Дмитрий Тодышевті хығырғаннар. Хызыл лента хыплал парғанда, аалҷыларны еврейлернің ас-тамаан чиирге пай столзар иртіргеннер.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |