СТУДЕНТ ОТРЯДТАРЫ ІСТЕНІС ЧАЙҒЫЗЫНА ТИМДЕ
06.06.2017
Хабарлар
Ирткен неделяда Хакасияның чииттері Крымзар тоғынарға парыбысханнар. «Калибри» отрядтың оол-хыстары республиканың отельлерінде паза олған санаторийлерінде тоғынарлар. Аннаңар искіргеннер пресс-конференцияда, хайзын «россияның студент отрядтары» чииттернің Тиксі Россия организациязының Хакасиядағы пӧлии иртірген.
Хайди таныхтаан региондағы штабтың устағҷызы Мария Шестакова, пӱӱнгі кӱнде республикадағы студент отрядтарына 209 кізі кірче, пылтыр І50 полған. Олар пис кӧстегҷе істенерлер: пӱдіріг, аал хонии, сервис, ӱгредіг паза пӱӱл энергетика пӧлии хозыл парған. Халғанҷызында 22 студент тоғынар. Хайди чоохтаан пресс-конференцияда «Хакасэнерго» компанияның специализі, чииттер аймах тоғысты толдырарлар. Кем тоғызын чахсы толдырар, нандырығлығ хайар, организация аны практикаа аларға паза, ӱгредиин тоосса, тоғысха аларға тимде.
Пӱдіріг, аал хонии, сервис, ӱгредіг отрядтарындағы чииттер, тізең, пӱӱл ідӧк аймах регионнарда істенерлер. Оларны Хызылчарның универсиада иртер пӱдіріг объекттерінде, Краснодар, Алтай крайларының аал хонии предприятиелерінде, Воронеж облазында, Ханты-Мансийскай автоном округында сахтапчалар. Ідӧк хай пірее чииттер Хакасияда тоғынарға халчалар.
- Республикада ӧӧнінде пӱдіріг, ӱгретчілер отрядтары істенерлер. Олар перинатальнай кінде, Хакасияның паза Хызылчарның санаторийлерінде, лагерьлерінде устарын таптирлар, - чоохтапча Мария Шестакова. Студенттерге, тузында тоғынарға парар ӱчӱн, чайғы экзаменнерін азынада тудыбызарға оңдай пирілген.
Пӱӱл республиканың ікі муң студенті пу отрядха кірердеңер искірген. Таллағны 200 азыра ла чиит кізі иртіп алған. Тоғынарға парар алнында оол-хыстар ӧнетін курстар ирткеннер.
Россия президенті Владимир Путиннің чарадиинаң 17 февральда пістің хазнада Студент отрядтары кӱні таныхталча. Че иң пастағы студент отрядтары 1959 чылда тӧстелген.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде