ОЛАР ЧУРТАСТАРЫН КІЗІ ХАЗИИН ХАЙРАЛЛИРЫНА ПИРЧЕЛЕР
16.06.2017
Хабарлар
АҒБАНДА ДРАМА ТЕАТРЫҢДА 14 ИЮНЬДА ИМНЕГ ТОҒЫНӋЫЗЫНЫҢ КӰНІНЕ ЧАРЫДЫЛҒАН ПАЙРАМ ИРТКЕН. МЫНДА ХАКАСИЯНЫҢ ИМНЕГ КИРЕЕНДЕ КӦП ЧЫЛЛАР ІСТЕН САЛҒАН, ТӰЗІМНІГ ТОҒЫС АПАРҒАН ПАЗА ЧАХСЫ САЛТАРЛАР КӦЗІТКЕН ІСТЕНӋІЛЕРНІ ЧЕЕСТЕЕННЕР. ПАЙРАМНЫ ХАКАСИЯ ПАЗЫНЫҢ ПАСТАҒЫ ОРЫНӋЫЗЫНЫҢ ТОҒЫЗЫН ТОЛДЫРЧАТХАН ОЛЕГ НАМ АСХАН. ОЛ ЗАЛҒА ТОЛДЫРА ЧЫЫЛЫСХАН ИМӋІЛЕРНІ, ФЕЛЬДШЕРЛЕРНІ, МЕДСЕСТРАЛАРНЫ ПАЗА ПАСХА ДАА ИМНЕГ ТОҒЫНӋЫЛАРЫН ВИКТОР ЗИМИННІҢ АДЫНАҢ АЛҒЫСТААН. АНАҢ ОЛ РЕСПУБЛИКАНЫҢ ХАЗЫХ ХАЙРАЛЛИРЫН ТИЛІДЕРІНЕ УЛУҒ ХОЗЫМ ИТКЕН ТОҒЫНӋЫЛАРҒА ХАКАСИЯ ПРАВИТЕЛЬСТВОЗЫНЫҢ ОРДЕН-МЕДАЛЬЛАРЫН ПАЗА ААРЛАСТЫҒ ПІЧІКТЕРІН ЧИТІРГЕН.
Аарлығ сыйыхтарнаң таныхтатханнарның аразында психиатр Татьяна Доможакова паза хирург Александр Тиников полғаннар.
Татьяна Матвеевна имнег киреенде 37 чыл істен парир. Аның таниинаң, ол кічігдең сығара кізілерні имнирге, оларға полызарға сағынған, аннаңар ол имңі полыбысхан. Студент тузында Татьяна Доможакова психология, психиатрия кружогына хынып чӧрҷең полтыр. Ағаа хоза, аның группазында эксперимент оңдайынаң тоғыс апарылтыр. Пастағы курстаң сығара піснең психологтар тоғынҷаңнар, чоохтапча Татьяна Матвеевна. Специалисттер имҷее ӱгренчеткен студент чылдаң чылға хайди тиліпчеткенін, алысчатханын істестірлер. прай пу ниме чиит хысха хынығ полтыр, аннаңар ол ікінҷілес чох психиатрия специальнозын таллап алтыр. Амды ол республиканың пас ағырығлары имнег туразының психиатрия пӧлиинің устағҷызы полча, кізілерге имнег полызии тузында паза чахсы пирілерін хайығда тутча. Позының матлама тоғызы ӱчӱн улуғ опыттығ имңі «Хакасияның саблығ имҷізі» атха турысхан.
Александр Тиников, тізең, имнег киреенде 20 чыл істен салтыр. 1997 чылда, Хызылчардағы имҷілер академиязын тоозып, интернатураны Ағбанның имнег туразында ирткен. Анаң 1998 чылда августта Алтай аймааның Хубачар аалынзар тоғынарға килген. Аннаң сығара амға теере ол анда тӱзімніг істен парча. «Ноға хирург поларға сағыныбысхазар?» сурыға Александр Григорьевич нандырған: «Мин кічігдең сығара холнаң ниме-ноо идерге хынҷаңмын. Паза хирургияда, прай нимені орта ит салзаң, тоғыстың салтарлары олох туста кӧрінче, ағырығ кізі табырах хазыхтанча». Тоғыста позын чахсы ла саринаң кӧзіткен ӱчӱн, Александр Григорьевичке Хакасияның Аарластығ пічии читірілген.
Че Аарластығ пічіктер имҷілерге ле пирілбеен, ортын имнег персоналы оларнаң таныхтатханох. Кӧзідімге, Н.М.Одежкиннің адынаң харах имнег туразында перевязочнай кабинеттің операционнай медсестразы полып тоғынчатхан Лариса Чанкова. Ол имнег киреенде 38-ҷі чылы істен парир. «1-2-ҷі класстарда Калининдегі школада ӱгренгем, аннаң тоғыр медпункт полҷаң. Мин андар ла тартылҷаңмын. Улуғ нимес тее палығ пол парза, мин андар перевязка иттірерге чӧрҷеңмін. Медпунктта арығ, прай ниме аппағас, чарых полңаң, йод, зеленка чызы турҷаң. Ол ниме кӧңніме тың кірҷең, аннаңар даа мин имнег киреенде тоғынарға чаратхам», - чоохтапча Лариса Александровна. пастап ол Ағбандағы пала тапчаң имнег туразында санитарка полып тоғынған, анаң, Ағбандағы имнег училищезін тоозып, гинекологияда медсестра полған. Соонаң Ағбандағы имнег туразында харах имҷізінің кабинедінде тоғынған, 1998 чылда Н.М.Одежкиннің адынаң харах имнег туразынзар килібістір. Мында ол позын чахсы саринаң тоғыста ла кӧзітпеен, Лариса Чанкова халых чуртаста ідӧк ӧткін араласхан. Аның ӱчӱн ол туста республика пазы полған А.Лебедьтің паза Ағбан город пазы Н.Булакиннің алғыстас пічіктерін алған. Нинҷе-де чыл харах имнег туразы профсоюзының кнезі полып, профсоюзтарның 100 чылына чарыдылған медальнаң таныхтатхан. Чоохтирға кирек, Лариса Александровнаның 3 туңмазы пар, олар прайзы имнег киреенде істенчелер. Пӱӱл ағаа 55 час толған, че опыттығ медсестра сағам тынаға парарға сағынминча, писче чыл тоғынарға сағынчам тіп кӱлімзірепче ол.
Ідӧк пайрамда Хакасияның имнег киреенің тоғынҷыларын ӱлӱкӱннерінең Россияның саблығ имҷізі, республиканың Ӧӧркі Чӧбінің хазых хайраллирынңа паза социальнай политикаҷа комитедінің кнезі Николай Михеев паза Хакасияның хазых хайраллаҷаң министрі Владимир Костюш алғыстааннар. Николай Михеев имнег тоғынҷыларына Ӧӧркі Чӧптің алғыстас пічіктерін читірген.
Таныхтирға кирек, кибір хоостыра Имнег тоғынҷызының кӱніне чарыдылған пайрамда имҷілер, ортын паза кічіг имнег персонал марығларының чиңісчілерін таныхтапчалар. Мындағ марығлар Хакасияда чыл сай иртірілче. Оларда чиңіс тутханнарға грамоталар паза ахчалығ сыйыхтар читірілче. Соонаң чиңісчілер СФО паза Россия синінде иртірілчеткен марығларда аралазарлар. пу ирткен пайрамда имнег киреенің 50 азыра тоғынҷызы таныхтаттырған.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде