"АЛТЫН" СТОЛ САЛFАБЫС
21.06.2017
Статья
Пӱӱл Пӱӱр пилтірі аалда олғаннарның Тун пайрамы ӱр ниместе ле ирт парған. Ағбан пилтірі аймааның устағ-пастаа школаларзар ӱлӱкӱннің чарадығларын ысхан. Пістің Чарков аалдағы школа ағаа ӧрчіліг кӧңніліг тимненіп пастаан.
Марыға аймах-пасха класстардағы олғаннарны таллап алғабыс. Оларның санындалар: Вадим Боргояков, Анна Орешкова, Юрий Орешков, Дмитрий Килижеков, Саяна Потнина, Ольга Каркуданова, Даяна Хожева. Олғаннар «тӧрт-пистерге» ӱгренчелер, школа чуртазында ӧткін араласчалар.
Пістің школадаң Анна паза Юрий Орешковтар ойын пастааннар. Хыс-туңма, аалҷыларзар паза араласчыларзар айланып, ӧтіг табыстарынаң изен-минді искіргеннер. Командабысты «Айдас» тіп адап салғабыс. Вадим Боргояков сіліг теелбек кӧзіткен. Тимненіс тузы ӱр парча, пайрам, тізең, табырах ирт парча. Олғаннарға сидік полбаан, олар тимненерге хынып чӧргеннер. Сӧстер ӱгренерге паза теелбектенерге ойын хоостыра иртчең. Тимненіс тузында кӱн тооза даа сіренҷеңнер. Олғаннарның тіллері най сіліг истілче. Кічіг палаҷахтар пос тілінең чоохтанчатсалар, истерге уғаа чапсых паза ачыныстығ полған. Олғаннар Тун пайрамға маңат тимнен салғаннар. Школа оларның сӧбірелеріне улуғ алғыс читірче. Пала ӧскірері - сӧбіренің улуғ тоғызы. Ӱгретчі, арғыс полып, чол кӧзітче. Хайдағ чолҷа парарын олғаннар постарының кӧңнінең таллирға киректер.
Пістің чирде олғаннарға пайрамнар иртірерге удаа кирек. Улӱкӱнге аймах-пасха чон, чыылызып, хакас кибірлерін кӧріп, пасха чоннарға таратчалар.
Ирбеннең аластааннар. Хызыл, сарығ, кӧк кӧгенектер Пӱӱр пилтірі школазы хыринда чайылғаннар. «Сӱрмезегестер» марығда Даянаның, сӱрместерін санап, сазының узунын паалааннар. Ол ікі кӱн сӱрместер ӱрген, узирға даа маң чох полған теен. Тобит ойында олғаннар хынып араласханнар. Пістің школадаң Дмитрий Килижеков паза Саяна Потнина ойнирға парғаннар. Хызыҷахтар аразында Саяна ікінҷі орын утып алған. Ол хыйғаҷах, школада «пистерге» ӱгренче.
Ус холлар марии иртірілген. Анда сіліг хоостар, чіпнең тіккен кӧклӧлер, тігілген абдыраҷахтар, нанҷыхтар паза ағаста кирткен ниме-ноолар кӧзіділгеннер.
«Алтын» стол салғабыс. Ӱгретчілер постары тимнеен чиистерін «алтын» столға салғаннар. Ас-тамах - аарлығ тамах. Талған, саламат, потхы, айран, чалбах, хаарған ит, пічірӧ, эҷігей, пызылах, талған-наспах, кирткен ит, хандых паза даа пасха чиистер тимнеп салғаннар. Ідӧк аймах чейлер паза сӱзӱннер полғаннар. Столыбыс пай полған. Пастағы орын алғабыс.
Пӱӱр пилтірі школазына улуғ пайрам иртірген ӱчӱн алғыс. «Читіген» театрны хығыртырлар. Чон сіліг сарыннар истіп алған. Олғаннар ибзер ӧрчіліг кӧңніліг айланғаннар.
Надежда ТУТАРКОВА, Чарковтағы школаның ӱгретчізі
СӦС СОО: Мына мындағ хабар ысхан Чарковтағы ортымах школаның ӱгретчізі Надежда Тутаркова. Амды олғаннарның Тун пайрам ӱлӱкӱннері Асхыс аймаанда ла иртпинче, ідӧк пасха даа аймахтарда паза аалларда иртче. Аннаңар «Хола пырғыҷахха» пазыңар хайдағ ӱлӱкӱннер сірернің аалыңарда чайғызын иртірілче.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде