ӦРТТЕРДЕҢ ТОҒЫР РЕЖИМ ПАЗОХ УЗАРАДЫЛЧА
23.06.2017
Хабарлар
Хакасияда ізіг кӱннер турыбысханда, арығларда ӧрттер удаа сых парча. Аннаңар Хакасияның пазы Виктор Зимин республиканың чонынзар паза аалҷыларынзар пу сурығҷа айланған.
- Хакасияның аарлығ чуртағҷылары паза аалҷылары, - таныхтаан ол. - Пістің регионда арығларда сыхчатхан ӧрттернең кирек сидік полыбысты. Пис ле кӱн аразына арығларда 14 улуғ ӧрт таныхталған. Аның сылтаа - уғаа ізіг кӱннер паза кӱгӱрттер. Ӧрт ӱзірҷең службаның паза лесничество тоғынҷыларының чапчаң тоғызы сылтаанда, ӧрттер тузында ӱзірілген, аалларға аннаң хорғыс чоғыл. Ӧрттер чидіп аларға сидік орыннарда сыхчалар.
Кирек піди пар сыхханда, піске пазох ӧрттердең тоғыр режим кирерге киліскен. Хакасияда ол 21 июньнаң кирілген, ол алынҷа чарадығ алылғанҷа тоғынар. Ӧрттердең хорғыс полдыртпас пӧгіннең андағ чарадығ алылған. Республикада ізіг, чилліг кӱннер турча, ӧрт сығарынаң хорғыс улуғ. Мындағ кӱннерде ӧрт сығарбас правилоларҷа тудынарға, от тамыспасха, азых отнаң палғалыстығ тоғыстар апарбасха кирек. Ідӧк арығларзар чӧрерге чарадылбас. Чуртағҷыларға сизіктіг поларға киректелче.
Сағыбаан саайлар полдыртпас система хараа-кӱнӧрте тоғынча, прайзы, ол санда техника, тимде. Муниципальнай пӱдістернің пастарына ӧрт сығарбас правилолар хайди толдырылчатханын сыныхтағда тударға чахығ пирчем.
Суғларда даа хорғыс чох тудынардаңар ундубасха кирек. Суға сомарға чарир чарадылған пляжтарда ла паза арачылағпосттары пар орыннарда ла. Ачығ суғі зіп, суғ хазында тынанарға пір дее чарабас. Іскен кізілер чыл сай суғларда саайланчалар.
Олғаннарға алынҷа хайығ саларға кирек. Олғаннарны чахсы кӧріңер, суғда ойнирға, хорғыстығ орыннарҷа чӧрерге оларға чаратпаңар. Хорғыс чох тудынар правилолардаңар чоохтап пиріңер, постарың кӧзідім полыңар.
Иң ӧӧні - пістің чағыннарыбыстың чуртазы паза хазии! Сӧбірелеріңні, хынчатхан кізілеріңні хайраллаңар. Кічіг чир-суубысты - Хакасияны - хайраллаңар!
Хакас гидрометеоцентр искіриинең, регионда 37 градусха теере ізіг турар, секундада 20 метрге теере хазыр чил, кӱгӱрттер полары кӧрілче. Хайди сизіндірчелер МЧС-тың Хакасияҷа Ӧӧн управлениезінің специалисттері, андағ кӱннер турыбысса, ЖКХ, энергетика паза связь объекттерінің тоғызы, туралар хырлары сайбаларға айабас, кізілер дее палығладарлар.
Посха хорғыс чох тудынар мындағ правилолар:
- хазыр чил иртерін турада сағып аларға;
- тасхар реклама чардыларынаң, ағастардаң, тимір пӱдіріглердең ырах арах тудынарға;
- балконнар алтында турбасха;
- отнаң тоғынчатса, сизіктіг поларға, чил кӧдірілзе, андағ тоғыстарны тохтат саларға.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде