ХАКАСИЯНЫҢ СӀЛИИ - ЧИИТ ХООСЧЫЛАР КӦРІЗІНЕҢ
28.06.2017
Хабарлар
Пу кӱннерде Л.Р.Кызласовтың адынаң чир-суғ ӱгренҷең музейде «Хакас этюдтары» хоостар кӧзідии Кӧзідіг «Тилекей хоосчының хараанаң» улуғ проекттің чардығы полча паза Вячеслав Заренковтың «Тӧстелген тилекей» социально-культурнай тиліс фонды устанызынаң иртче. Проект хоостыра пістің хазнаның хоосчылары паза хоосчаа ӱгренчеткен студенттер Россияның регионнарынзар экспедицияларға чӧрчелер, танығлығ чирлерні хоостарында кӧзітчелер.
Кӧзідігнің пайрамнығ азылғанында Хакасияның культура министрінің тоғызын толдырчатхан Светлана Окольникова, Санкт-Петербургтағы И.Е.Репиннің адынаң хоосчылар академиязының студенттері, аның деканы Константин Бегетов,
«Тӧстелген тилекей» фондтың директоры Наталия Берзина, Хакасияның хоосчылар пірігізінің кнезі Александр Кобыльцов паза кӧрігҷілер араласханнар.
«Хакас этюдтары» кӧзідіге Санкт-Петербургтағы И.Е.Репиннің адынаң хоосчылар академиязының 11 студентінің хоостары сығарылғаннар. Студенттер Ах Ӱӱс суғ хазында, Сундухтарда, Салбых кӱргенде, Сойан-Сус ГЭС-та читі кӱн аразына пол килгеннер паза ол тусха уғаа сіліг хоостар чайап салғаннар. Хоостарны кӧрзе, пістің чирібістің хай пірее чирлерін танып аларға чарир.
Светлана Окольникова Санкт-Петербургтағы аалҷыларға килгеннері паза чирібістің сілиин хоостарында кӧзіт пиргеннері ӱчӱн улуғ алғызын читірген.
Экспедицияның устағҷызы Санкт-Петербургтағы хоосчылар академиязының деканы Константин Бегетовтың чооғынаң, академияда ӱгренчеткен студенттернің чарымы - пасха хазнадаң килген чииттер. Оларны, Россияның пасха регионнарынҷа апар килер паза чорыхтарын хоостарында кӧзіт пирер ӱчӱн, ӧнетін экспедицияларға ал чӧрер сағыс тӧреен. Мындағ экспедициялар хоосчаа ӱгренчеткеннерге уғаа тузалығ. Пылтыр студенттер Эвенкияда пол килгеннер. Пӱул оларға Хакасиязар килерге ӱлӱс тӱскен.
Хоосчылар академиязында ӱгренчеткен Япониядағы студент Кейто Ямагучи экспедицияда араласчатханнарның санында. Ол пістің хазнада пис чыл ӱгренче.
- Кӧзідіге ікі тоғызым сығарылған. Хоостарымда чир-чайаанның паза кізінің палғалызын кӧзіт салғам. Пу тема минің прай хоостарымда пар. Піс хайдағ-да улуғ нимес аалда полғабыс. Мин, анда чӧріп, тастал парған чурттар кӧргем. Хоостарымда ол тураларны паза ибіркі чир-чайаанны хада кӧзіт пиргем. Хакасияның чир-чайааны минің кӧңніме уғаа тың кірген. Мындағы танығлығ чирлер сағызымда хаҷанға даа халарлар, - сағыстарынаң ӱлескен Кейто Ямагучи.
И.Е.Репиннің адынаң хоосчылар академиязының Сингапурдағы студенті Маттиасу Чуо Рени кӧзідіге килген кізілерге алғызын читірген.
- Пістің аймах оңдайнаң хоостапчатханнарыбысты кӧрерге хынығ полған. Мындағы сіліг чир-чайаанны хоостап, піс улуғ опыт алып алғабыс. Минің кӧрізімнең, ниме кӧргенібісті прай хоостап саларға тус читкіҷе полбааң аннаңар піс пеер хатап килербіс паза Хакасияның чир-чайаанын хоостирбыс тіп ізенчебің - таныхтаан Маттиасу Чуо Рени.
«Хакас этюдтары» кӧзідіге 60 азыра хоос сығарылған. Оларда Хакасияның чир-чайаанының сілии, орындағы чуртағҷылар, туралар кӧзіділ парғаннар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде