ЧЫЛ САЙ ТОҒАЗАРЛАР
28.06.2017
Хабарлар
Чайғызын ноо даа кізі, тынанып, пос тусты иптіг иртіріп аларға сағынча. Ам даа ідӧк, хаҷан-да Германияда служба ирткен ооллар чыылыстылар. Ирткен тынағ кӱннерінде Асхыста Культура туразы хыринда иреннер чыылыс парғаннар. СССР-ның хызыл флагын паза ГДР-ның флагын тудын салып, олар Чиңіс паркынзар читкеннер.
Мында оолларның иң улуғ частығ Валерий Майнагашевті чоох тударға сурынғаннар. Ол тусты сағысха киріп, Валерий Семёнович мындағ ниме чоохтаан: «Германиязар иң артых, ізестіг оолларны, таллап, апарҷаңнар. Піс анда Совет Союзын кӧзітчеңміс нооза». Анаң ооллар Асхыстаң тоғыр олтырыхсар парғаннар. Кем- де чааҷы кительін ал килтір, ол туста погоннар петлицаларында танк хоостығ эмблема полҷаң, пірсінің пасха техническай службаның эмблемазы. Анаң сурчам: «Піди сизінзем, Германияда саңай техническай частьтар полған одыр?» Олар пір ӱннең нандырчалар: «Пістің анда илбек кӱс полған: авиация, танктар. Кӧні чоохтаза, пірее талас полыбысхан полза, піс ол туста Кидеркі Европаны пір-ікі ле чабыра пазыбызарҷыхпыс».
Сергей Черебеевнең чоохтазып, сурыбысхам: «Син Германияда, служба иртіп, водитель полғазың алай миссиянаң чӧрчеткен офицерлерні тарт чӧргезің ме?»
- Ол туста пістің офицерлер Кидеркі Германияҷа сыныхтағ миссиязынаң чӧрҷеңнер, оларға ӧнетін маршруттар пирҷеңнер. Іди, чӧріп, хай пірее хыйыстырыстарны ілезіне сығарҷаңнар. Хайда нинҷе техника, чааҷы поларға кирек. Оларның саринаң ідӧк пістіңнерні сыныхтаҷаңнар, - піди нандыр пирген Сергей Черебеев.
Сергей Ананьевич іди чӧрген полза, пірее хынығ ниме чоохтап пирерҷік тіп сағынғам.
- Чох, мин КрАЗ-тың тінін тутхам, - тіпче ол. - КрАЗ-та суғ кисчең понтон полған. Суғ хырина килзе, понтонны суға кире пазыбысчазың. Водительдең пасха мин водолаз полғам. Понтонны суға кире пазыбызып, КрАЗ-ты хыйа апарыбысчам, анаң, гидрокостюм кизіп, суғ алтына кірібісчезің. Суғ кизіре понтон тахтаны турғызарға нинҷе-де ле минута пирілҷең. Пістің понтоннар тимір чол тахтазына килістіре полҷаңнар. 1984 чылда «Щит-84» чаа ӱгредіглері ирткен. Эльба суғны кизіре тахта турғысхабыс. Тахта тимге сых парғанда, аныңҷа тимір чол составтары ирт сыхханнар. Пістің тоғызыбыс чахсы паалалған. Андағ поларға кирек, - теен Сергей Ананьевич.
Асхыстағы олтырыхта, Германияда чааҷы службазын ирткен ооллар тоғасчаң орыннарында, бетон столба турғыс салтырлар, анда «СССР ГСВГ» пазыл партыр. Мыннаң мындар чыл сай піди тоғазарға чӧптес салғаннар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде