ОНКОЛОГИЯДАҢ ТОҒЫР КӰРЕЗЕР СЛУЖБАНЫҢ ТӦСТЕГҶІЗІ
09.08.2017
Хабарлар
Пӱӱл 10 августта Хакасияның пастағы онкологы, саблығ имҷізі Эльза Фёдоровна Гергенредерге (пічікке кіргені Фридриховна) 90 час толарҷых. Ол Хакасияның онкология службазының тӧстегҷізі, онкология диспансерінің пастағы ӧӧн имҷізі полған.
Эльза Гергенредер 1927 чылда ол тустағы Поволжье немецтерінің республиказында Энгельс городта тӧреен. Аның пабазы Фёдор Александрович Гергенредер 1930 чылларда холера тарапчатханынаң тоғыр кӱрезер тоғыс апарған. Че Илбек Ада чаа пасталыбысханда, аны сӧбірезінең хада Сибирьзер ызыбысханнар. Ағбанзар читкенде, Фёдор Александрович городтағы имнег туразының, соонаң, 1961 чылда, Хакас облазының имнег туразының хирургия пӧлиинең устирға турғызылған. РСФСР-ның саблығ имҷізі, Ленин орденінің кавалері кӧп турыстығ ӱгренҷі тимнеп салған, оларның пірсі - хызы Эльза Фёдоровна. Ол пабазының чолын пазарға чаратхан. Школаны алтын медальлығ тоозып, 1945 чылда Хызылчардағы имнег институдынзар кіріп алған. Аны 1950 чылда тоозып, Ағбандағы имнег туразынзар хирург тоғызына ызылған.
1950 чыллардаң Ағбандағы поликлиникада онкология кабинеді тоғынып пастапча. 1954 чылда чиит имҷіні мында тоғынарға турғыс салчалар. Ол чуртағҷыларны сыныхтирынаң айғасча, олох туста Ағбандағы имнег туразында хирургия пӧлиинде тоғынча. 1955 - 1956 чылларда Москвадағы П.А.Герценнің адынаң имҷілерні тилітчең институтта онкологияҷа специализацияны иртче.
1961 чылда онкология диспансері азылча, Эльза Фёдоровна аның ӧӧн имҷізі полыбысча. Устағҷы полза даа, ол кізілерні имнир тоғызын тастабинча - 1970 чылға теере областьтың имнег туразында, анаң онкология диспансерінде хирург полча. Ідӧк ол пілізін тӧреміл кӧдірче: 1966 чылда - Ленинградтағы имҷілерні тилітчең университетте, 1978 чылда - Ленин орденінің имҷілерні тилітчең ӧӧн институтта. Тиксі Союзтың онкологтар съездтерінде паза симпозиумнарында тӧреміл араласча, 1963 чылда Москвада ирткен чоннар аразындағы рактаң тоғыр конгресстің делегады полған.
1966 чылда аттестация иртірҷең комиссия чарадиинаң Эльза Фёдоровнаа хирург-онкологтың иң пӧзік категориязы пирілче. Матлама тоғызы ӱчӱн аны нинҷе-нинҷе хатап Хакас облазының паза Хызылчар крайының хазых хайраллаҷаң пӧліктерінің Аарластығ пічіктерінең таныхтааннар, ідӧк ағаа «Отличник здравоохранения СССР» танығ, «За доблестный труд», «Ветеран труда» медальлар пирілген.
Э.Ф.Гергенредер устаанынаң рактың прай орныхчатхан чирлерін хирургия полызиинаң имнеҷең оңдайлар кирілген. Ағырығ кізілерні онкология диспансерінде санға аларынҷа паза хайығда тударынҷа тоғыс кӧп апарылҷаң. Хакас облазының аймахтарында паза городтарында сыныхтаҷаң кабинеттер тӧстелген. Ідӧк Эльза Фёдоровна пӧзік пілістіг ӱгретчі полған, Хакасияның паза пасха даа регионнарның амғы тустағы кӧп онкологы аның ӱгренҷілері полчалар.
Эльза Фёдоровна тынаға сыхханҷа, 1982 чылға теере, онкология диспансерінің ӧӧн имҷізі полған. Че тынаға сых парып таа ол диспансерде хирург полып тоғынған. Хакасияда онкология ағыриин имниріне улуғ хозым ит салған имҷіні хада тоғынчатханнары даа, олаңай чуртағҷылар даа тың улуғлаҷаңнар. 2009 чылда ла Эльза Фёдоровна тоғынминыбысхан, пуох чылда 29 декабрьда ол ах чарыхтаң парыбысхан.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде