МАЛҒА АЗЫХ ТИМНИРІ СИДӀК ПАРЧА
30.08.2017
Хабарлар
ТАШТЫП АЙМААНДА «НИВА» ООО ИҢ НЕ УЛУҒ ХОНЫХ ПОЛЧА. АННАҢАР АНЫҢ ЧИДІГЛЕРІ, ЧИТПЕСТЕРІ ПӰКӰЛЕЕ АЙМАХТЫҢ ААЛ ХОНИИ ТОҒЫСТАРЫНЫҢ КӦЗІДІМНЕРІНЕ ТЕЕЛЧЕ.
ПӰӰНГІ КӰНДЕ ПУ ХОНЫХТЫҢ АЗЫХ ТИМНЕҶЕҢНЕРІ 450 ГЕКТАР ЧАЗЫДА ОТ СААП САЛҒАННАР 266 ГЕКТАРДАҢ ХУРУҒ ОТТЫ ЧЫЫРҒА МАҢНАНҒАННАР. ПРАЙ 400 ТОННА УЛАМНАЛ ПАРҒАН. ПЫЛТЫР ПУОХ ТУСТА «НИВА»-да 1005 ТОННА ОТ ТИМНЕЛГЕН. ХЫСХЫЗЫН МАЛЛАРЫН ТОХ АЗЫРАП ТУРАРҒА 2000 ТОННА КИРЕКТЕЛЧЕ. САННАРНЫ КӦРЗЕҢ, ТОҒЫС АМ ДАА КӦП. ХАРЫН ПУ ХОНЫХ ОТТАҢ ПАСХА СЕНАЖ ПИЛЕТЕП АЛЧА. СӰТ ЧАХСЫ СААП АЛЧАДАРҒА ОЛ УҒАА КИЛІСТІРЕ АЗЫХ. АҒАА ХОЗА, СЕНАЖТЫ ПУЛУТТЫҒ ДАА КӰННЕРДЕ ПИЛЕТИРГЕ ЧАРИР.
Ирткен чылда тайға пори чирлерде орныхчатхан Таштып аймаанда малға хысхызына азых тимнирі уғаа аар парған. От тимнир тус читкенде, тохтабас наңмырлар тоғысха матап харығ полғаннар. Ӧӧнінде арали турыбысчатхан айас кӱннерде ле, маңзытха чахсы даа хурутпин, сабылған отты чығарға килісчеткен. Іди тимнелген азыхтың татхыны, тузазы хайдаң полар. Аннаңар хысхызын сӱт тее, ит тее чахсы ал полбааннар.
Кӱскӱ дее хыраҷыларға тоңастығларны чахсы чыырға пирбеен. Ідӧк наңмырлар чаап, анаң иртӧк хар тӱс парғанда, хыраларын тооза саап полбин халғаннар. Часхыдағы хараа-кӱнӧрте иділген тоғыс тик чирге парыбысхан.
Пӱӱл пылтырғы муханыстар пазох ла полча таң? От тимнирін ирте пастааннар кӧп нимес от хазааларынзар азых тазып салғаннарох. Че чут кӱннер турыбызып, тоғыс пазох ла ирткен чылдағы чіли тудыл сыхты.
Наңмырлар аразында машина-комбайннар ла чӧрер оңдай полза, хырада тоғыс айныпча. Пӱӱнгі кӱнге «Нивада» 313 гектардаң 2500 тонна кӧк сап кизіл парған. От хазаазында пір оймахха толдыра сенаж салылды. Прай анда 1750 тонна тимде мал азығы. Тоғыс мыннаң мындар парча.
Кӧк сапты ікінҷі оймағынзар тазып сыхтылар. Комбайннарның от хазаазы аразында 5 КамАЗ уғаа чапчаң хайынча. Ікізінде тоғынчалар «Ниваның» водительлері Дмитрий Урыбиннең Валерий Дурасов. Ӱс машина чалланып полысчатханнарни. Кӧк сапты кизіп, «Дон» комбайннарда істен парчалар хоныхтың ізестіг механизаторлары Андрей Токчинаков паза Виктор Челтыгешев. Пу ікӧлең, чахсы тоғынчатхан ӱчӱн, сыбыра махтаға сыхчалар. Ирткен чылда, пір комбайн оодыл парып, сенаж саларын илееде сӧӧ тартханнар. Пӱӱл пір наа «Дон» алып алғаннар, хайзынаң тоғынча Андрей Токчинаков. Амды азых пилетирі кӧріндіре айныпча. Чахсы ла кӱннер турза, ӱрге парыбыспастар, неке.
Ноға-да халғанҷы чылларда малға азых тимнир туста аал хонииндағыларға іди ле ирееленерге киліс парча: чайғы пасталчатса, хуруғ кӱннер ӧзімнерге кӱс алынарға пирбин салча, кӱскӱзін, тізең, чут кӱннер тоғысты илееде тудыбысча. Механизаторларның устары ла айас тустарнаң толдыразынаң тузалан халарға полыс пирче. Пу чылда даа ідӧк полбас па? Итсе, піспиҷектерні кӱскӱзін санапча тіпчелер.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде