ДЕРБИНІ ТУРЫСТЫРА ИРТІРЕРГЕ
06.09.2017
Хабарлар
Ағбандағы ипподромда 9 сентябрьда Хакасия пазының Кубогы ӱчӱн «Саянское дерби» азых марығ ат чарызынҷа иртер. Ам марығны турыстығ иртіреріне тимненіс парча. Ол тоғыста Хакасияның спорт, аал хонии паза ас-тамах, культура министерстволары араласчалар.
Пу кӱннерде олар ипподромзар субботникке сыхханнар.
Хайди таныхтаан субботник пастағҷызы, «Чудеса» маркетинг студиязының тоғынҷызы Наталья Муратова, «Саянское дерби» марығ алғым иртер, аннаңар прай ипподромны иптебізерге кирек. Субботникте 50-ҷе кізі араласхан. Олар трибуналарны сыбырғаннар паза ипподромдағы ачыхты арығлааннар.
Марығ тузында ипподромдағы ачыхта кӧрігҷілерге чалаң паза хаңааға кӧлген аттығ чӧріп аларға оңдай полар. Ӱлӱкӱнде сомға суурынар он орын тимнелер. Мероприятиеде, прай сӧбіренең киліп, тынанып аларға чарир. Марығ тузында ипподромда 35 площадка, ярмарка тоғынар, пос холынаң иділген ниме-ноолар садылар. Олғаннарға ӱтертістіг программа тимнелче, оларға аймах мастер-класстар кӧзідерлер.
«Саянское дерби» тузында аймах марығларда чиңіс тутхан паза сыйыхтығ орынға сыххан аттар кӧзіділер.
Мероприятиеде дресс-код кирілер. Пеер кӧрігҷілерге костюмнығ паза шляпалығ килерге киректелче. Шляпа кис чӧрбинчеткен кізілерге аны мероприятие тузында алып аларға чарир полар. Іди ӧӧн трибуназар дресс-код хоостыра килген кӧрігҷілерні позыдарлар.
Автор :
Антон Чертыков
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде