МУЗЫКА ФЕСТИВАЛЬЫНЫҢ АЛТЫН КӦГЛЕРІ
19.09.2017
Хабарлар
Хакасияда 2017 чыл фестивальларға пай. Пастап «Ах иб» театр фестивальы ӧрініс сыйлаан, анаң «От ыры» кӱӱлеп ирткен, июльда республика хынчатхан «Чир Чайаанны» удурлаан. Амды ырҷыларға паза артисттерге музыканттар хозылдылар.
13 - 17 сентябрьда олар пастағызын на чоннар аразындағы классика музыканың фестивальын иртіргеннер. Фестивальның пастағҷызы Хакас филармониязының директоры Вячеслав Инкижеков полча. Ол, чиит устарны чыып, Хакасияның чуртағҷыларына музыка пайрамын сыйлап пирерге чаратхан.
Араласчыларның аразында чир-суғҷыларыбыс Анастасия Субракова (скрипка) паза Анна Комарова (флейта) полғаннар. Ідӧк чайаачыларынаң ӧріндіргеннер Илья Леханов (фортепиано, Москва), Алексей Иванов (труба, Санкт-Петербург), Базиль Аусландер (виолончель, Швейцария) паза опера ырҷызы Луи Зайтун (Франция).
Музыка фестивальы 13 сентябрьда гала-концертнең азылған. полған на музыкант, алынҷа номер тимнеп, аны симфоническай оркестрнең хада толдырған. Анастасия Субракова П.Чайковскийнің «Сағыстар» пьесазын таллап алтыр. Саблығ композиторның чарых музыказы, залға толдыра чайылып, кӧрігҷілернің кӧңнін кӧдірген. Аны истіп, чуртас хайдағ хайхастығ поладыр сағын салчазың. «Сағыстар» пьеса орыс классика музыказының иң артых произведениелерінің пірсі полча, аннаңар П.Чайковскийнің пу тоғызын пӧзік устығ скрипачтар ла толдырчалар. Анастасия Субракова амды Лозаннадағы пӧзік музыка школазында ӱгренче. Тӧреен чирінзер киліп, ол чыл сай концерттер иртірче.
Ікінҷі чир-суғҷыбыс Анна Комарова флейтанаң ойнапча. Настя чіли ол чайаачы чолын А.А.Кенельнің адынаң олған музыка школазында пастаан. Чиит хыс - Санкт-Петербургтағы консерваторияның студенті, 2013 чылдаң сығара ол Мариинскай театрның симфоническай оркестрінде ойнапча. Гала-концертте Анна Комарова композитор ипчі С.Шаминадтың «Оркестрнең флейтаа концертино» тоғызын толдырған. Минің кӧрізімнең, мындағ ниик музыканы ипчі кізі ле пас салар оңдайлығ.
Пианист Илья Лехановты залдағы чон айа сабызынаң удурлаан. Аның чайаачызынаң пістің кӧрігҷілер чахсы таныстар. пӱӱл хысхызын ол Настя Субракованаң хакас филармониязында концерт кӧзіткен. Таланттығ музыкант Москвадағы консерваторияны тоосхан, амды узын Цюрихтегі пӧзік музыка школазында тилітче. Фестивальның пастағы кӱнінде Илья Леханов, Л.Бетховеннің «1 № оркестрнең фортепианоға концертін» толдырып, кӧрігҷілернің чӱреен хайылдырған.
Музыкант Алексей Иванов кӧрігҷілерні чапсытхан. Чиит оол трубанаң ойнапчаттыр. Анна Комарова чіли ол Санкт-Петербургтағы консерваторияда ӱгренче. Концертке Алексей Иванов А.Арутюнянның «Оркестрнең трубаға концертті» таллап алған. Музыкант ойнап сыхханда, трубаның арығ ӱні ырах чайылған. Чалахай кӧг кізіні пір саринаң сағысха тӱзірген, че олох туста алнынзар хаалирға хығырған. Пу чайаачы тоғыс тилекейге саблығ музыканттарның репертуарына кірче.
Фестивальның араласчылары аразында ікі кізіні алынҷа таныхтирға кирек. Кидеркі Европаның чуртағҷылары Базиль Аусландер паза Луи Зайтун Россияда пастағызын на полғаннар. Оларны пеер Настя Субракова хығырып алтыр. Виолончелист Базиль Аусландернің тӧреен чирі Швейцария полча. Ол чоннар аразындағы марығларда кӧп хати лауреат атха турысхан. Таланттығ музыкантты аймах ансамбльларзар, оркестрлерзер ойнирға удаа хығырчалар. Гала-концертте ол Д.Поппернің «Венгриядағы рапсодиязын» толдырған. Композиторның ӧрчіліг музыказы паза Базиль Аусландернің пӧзік узы залдағы чонны аптаан.
Прайзын тенор Луи Зайтун хайхатхан. Хакасиядағы фестивальға тимненіп, ол П.Чайковскийнің «Евгений Онегин» операзының ӱзіктерін ӧнетін ӱгрен салған. Ол Ленскийнің арияларын орыс тілінең иптіг толдырған. Чиит кізі кічігдең сығара опера ырҷызы поларға пӧгінтір. Узын тилідіп, ол пастап Сорбоннаны тоосхан, анаң Лозаннадағы пӧзік музыка школазында ӱгренген, амды пілістерін Берндегі консерваторияда алғытча. Ағаа хоза, Луи Зайтун аймах мастер-класстарда тӧреміл араласча. Кӧзідімге, амды ол Римде стажировка иртче, аннаңар концерт тузында ол ӧӧнінде Италия ырларын толдырған.
Фестивальның ікінҷі кӱнінде «АльберЭго» дуэттың концерттері ирткеннер. Дуэтты 2016 чылда Анастасия Субракованаң Илья Леханов тӧстееннер. Ӱстӱнде таныхталған, пастағы концертті музыканттар Хакасияда пӱӱл январьда пиргеннер. Сизінгенде, «АльтерЭго» дуэт В.Моцарттың паза А.Шниткенің чайаачызына хынадыр. Музыканттар хысхызын пу композиторларның тоғыстарын толдырғаннар, фестивальға хатап оларның произведениелерін таллап алғаннар. Ідӧк дуэт Л.Бетховеннің паза М.Равельнің сонаталарын ойнаан. Чоохтирға кирек, музыка фестивальы Ағбаннаң пасха Минсуғда, Саяногорскта паза Нымырттығ посёлокта ирткен. Аннаңар Настя Субракованаң Илья Леханов пастап Минсуғда концерт кӧзіткеннер, иирде, тізең, ағбандағыларға ӧрініс сыйлааннар.
15 сентябрьда фестивальны Нымырттығ посёлок удурлаан. Концерт ікі чардыхтаң пӱткен. Аның пастағы пӧлиинде тенор Луи Зайтун сарнаан, ікінҷі чардығында тилекейге саблығ композиторларның тоғыстарын симфоническай оркестрнең хада Анна Комарова паза Алексей Иванов толдырғаннар. 16 сентябрьда чиит музыканттар устарынаң Саяногорсктың чуртағҷыларын хайхатханнар. Анастасия Субракова, Илья Леханов паза Базиль Аусландер, пір ӧмее пірігіп, П.Чайковскийнің, В.Моцарттың паза Д.Шостаковичтің произведениелерін ойнааннар.
Фестивальның халғанҷы кӱні ідӧк гала-концертнең танығлығ полған. Луи Зайтуннаң пасха анда прай музыканттар араласханнар. Тенорның консерваторияда ӱгредии пасталыбыстыр. Тиксі алза, гала-концертте тӧрт чайаачы тоғыс толдырылған. Минің кӧңніме А.Вивальдинің «Щегленок для флейты пикколо» концерті кірген. Аны Анна Комарова симфоническай оркестрнең хада ойнаан. Аның холында пикколо флейта сынап таа хамҷол хус чіли «сарнаан». Ідӧк Настя Субракова, Илья Леханов паза Базиль Аусландер тӧстеен ӧменің узын таныхтирға кирек. Олар Л.Бетховеннің «Оркестрнең скрипкаа, виолончельге паза фортепианоға ӱс хадыл концерт» саблығ тоғызын толдырғаннар.
Кӧрігҷілер чиит устарға матап айа сапханнар, полған на номер соонаң кізілер фестивальның араласчыларына чахайахтар сыйлааннар. Чоннар аразындағы классика музыказының фестивальы пӧзік синде ирткен. Хакасияның культура министерствозы паза В.Г.Чаптыковтың адынаң республика филармониязы аны чыл сай иртірерге пӧгінчелер. Ізенчебіс, классика музыказының фестивальының алтын кӧглері хатап кізілерге ӧрініс сыйлир.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде