ЧОРБА ПИЛТІРІНДЕ - НАА ФАП
31.10.2017
Хабарлар
Боград аймаандағы Чорба пилтірі аалда 26 октябрьда фельдшер-акушер пункты азылған.
Ол «Хакасияның агропромышленность комплексінің паза аалдағы социальнай сфераның тилізі 2013 - 2020 чылларға» хазна программазының «Аалларның пик тилізі» подпрограммазынҷа пӱдірілген.
Тасхар соох таа полза, ФАП-тың пайрамни азылчатханына кӧп аал чуртағҷызы паза аалҷы килген. Ол санда республиканың хазых хайраллаҷаң министрі Владимир Костюш.
Хызыл лента кизер алнында килген чонға улуғ нимес концерт турғызылған. Аал чуртағҷылары, кӧглерні истіп, теелбек салчатханнар. Кізілер чалахай кӧңніліг полғаннар. Фельдшер-акушер пункты азылғанынаң прайзын алғыстап, Боград аймааның пазы Сергей Геннадьевич Чернышов чоох тутхан:
- Хайди чоохтапчалар, аалда школа паза имнег туразы пар полза, анда чуртирға чарир. Ол аал аннаң андар тилир. Аал чуртағҷылары ам даа ундубаан поларлар, хайди пис чыл мының алнында піс, имҷее ағырчатхан кізілерні сыныхтир чахсы оңдай ползын тіп, иргі ФАП-ты, чылығлап, оңдайлаабыс. Амды, пістің ӧрінізібіске, наа ФАП пӱдіріл парды. Аал чуртағҷыларына пу танығлығ паза ӧріністіг кӱн. Уғаа чахсы сыйых. Чорба пилтірі аал чуртағҷыларының адынаң улуғ алғызыбыс читірчебіс.
Мындағ танығлығ кӱннең чуртағҷыларны паза ФАП тоғынҷыларын Хакасияның хазых хайраллаҷаң министрі Владимир Фёдорович Костюш алғыстаан:
- Пістің имҷілернің ӧӧн пӧгіні - кізілерге имнег полызиин пирері. Аннаңар имҷілерзер айланар оңдайларны чахсыландырчабыс. ФАП-тарда специалист имҷілерзер айланар алнындағы полызығ пирілче, анаң аймахтағы алай республикадағы имнег тураларындағы специалисттерзер айланарға кирек. Таныхтирға кирек, Хакасияда имнег полызии тилекейдегі стандарт синінҷе пирілче. Имҷілерні тоғынҷаң оңдайлар чахсыландырылғанынаң паза аал чуртағҷыларын имҷілердең полызығны чахсы синде ал поларынаң алғыстапчам.
Анаң сӧс пирілген Хакасияның аал хониии паза ас-тамах министрінің пастағы орынҷызы Светлана Ивановна Асееваа.
- Чорба пилтіріндегі ФАП «Аалларның пик тилізі» подпрограммаҷа пӱдірілген. Тиксі пӱдіріге 6 миллион 236 муң салковай хорадылған. Ахча ікі бюджеттең позыдылған: республика бюджедінең - 4706 муң салковай, федеральнай бюджеттең - 1530 муң салковай. Пу программаа тӧстеніп, пис чыл аразына аалларда читі ФАП пӱдіріл парған. Ол тоғыстарға тиксі 29 миллионҷа салковай хорадылған. 2018 чылда Асхыс аймаандағы Чоғархы Паза аалда фельдшер-акушер пунктын пӱдірерге пӧгін турча. Пу программа 2020 чылға теере тоғынар, аннаңар мындағ пӱдіріглер ам даа полар, - таныхтаан Светлана Асеева.
Ідӧк ӧрінізінең ӱлескен Чорба аал чуртағҷызы Лола Сабировна Солодченко.
- Минің кӧңнім уғаа чалахай. Наа ФАП азылчатханы улуғ туза пістің аалға. Амды хысхызын паланы имҷізер апарзаң, кип-азаан суурзаң, соохха тоңар тіп чочынмассың. Ӱлгӱлер, пісті ундутпин, хайығ салчатханнары ӧріндірче, - теен Лола Солодченко.
ФАП азылған соонда, чыылған кізілерге улуғ нимес концерт кӧзіділген. Олған-узах паза аға-ууҷалар даа чапсых концерт кӧріп алғаннар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде