ПӦГІЛҶЕҢ ООЙ НИМЕС СУРЫҒЛАР
05.12.2017
Хабарлар
Хакасия правительствозында 29 ноябрьда Хазна Думазының депутады Надежда Сергеевна Максимова республика чуртағҷыларынаң тоғазығ иртірген.
Пастағы айланыс МВД-ның тоғынҷызы полған, ам тынаға сыххан Андрей Леонидович Масловтаң полған. Ол Надежда Максимовадаң республиканың МВД-зының тынаға сыххан тоғынҷыларына Ағбанда кӧп хадыллығ тураларда чурт аларға, пӱдірерге алай пос туразын пӱдірерге федеральнай бюджеттең ахча позыдыларына хабас пирерге сурынған.
Амғы туста Андрей Леонидович чурт алар теесте 38-зі полча. Ол МВД тоғынҷыларына пӱдірілген чурттар теезінде 2002 чылдаң сығара турча. Ідӧк чуртха чидінер ікінҷі оңдай пар. Аны хоостыра, андағ теесте турбин, пір хатап пирілчеткен социальнай тӧлегні алып аларға чарир, кізілер ол ахчаа постары чурт алчалар алай пӱдірчелер. Андағ тӧлегні алар теесте Андрей Маслов 388-зі полча. Пӱӱнгі кӱнде 2001 чылда тееске турған тоғынҷыларға чурт пирілче. Чурт суриин пӧгеріне федеральнай бюджет ахчазы киректелче. Пілдістіг, теес чидерін сахтирға килісче. Ам даа 2001 чылда тееске турған 20 тоғынҷы чурт сахтапча.
Хайди теен Надежда Максимова, пу сурығны, хайыға алып, сыных-тағда тудар. Республиканың килер чылға бюджеді алыл парза ла, 2018 чылда МВД тоғынҷыларына чурт пӱдіреріне хайдағ хорадығлар иді-лері пілдістіг полар. Ідӧк Надежда Максимова, МВД органнарынзар ай-ланып, сурығны пӧгерге полыс пирерге хабазар.
Ідӧк депутатсар айланғаннар Шира аал пазының орынҷызы Сергей Владимирович Весёлов паза «Фирма «РИГОР» ООО-ның директоры Евгений Борисович Хабаров. Олар Шира паза Наа чир аалларда ісчең суғ уғаа хомай тіп чоохтааннар. Аал чуртағҷыларының айланыстары тоозылбинча. Ісчең суғны чахсыландырҷаң оңдай табылған, че сурығны пӧгеріне ахча чоғыл. Аннаңар ол пӧгілбинче.
- Аймахта ізерге чарапчатхан чахсы суғ Шира паза Наа чир ааллардаң ырах ниместе пар. Ол орында суғ сығарҷаң трубалар тартылар, піс аймахта пос кӱзінең проект-смета пічіктерін тимнебізербіс, - искіргеннер Сергей Весёлов паза Евгений Хабаров.
Суғ сығарҷаң трубалар пӱдіриине 145-че миллион салковай киректелче. Надежда Максимова таныхтаан, республиканың 2018 чылның бюджедінде андағ хорадығларға ахча кӧрілбеен. Евгений Хабаров пу сурығны 2019-2020 чылларда даа пӧгерге полыс пирерге сурыныснаң айланған. Ідӧк азынада тимнелген смета пар, че аның хорадығларын хызырыбызарға чарир тіп ізендірген.
Ӱзінҷі сурии Пӱӱр пилтірі аал чуртағҷызы Николай Иванович Калмаковтаң полған. Ол позының пабазынаңар піліп аларға сурынған. 1947 чылда пабазын харибге чабарға индір парыбысханнар, аның соонда аны паза пірдеезі кӧрбеен, хайдар кіргенінеңер искіріг чоғыл. Ол Донецктегі, Хызылчардағы паза пасха даа архивтерзер айланған, че пабазынаңар пір дее хоза танығлар чоғыл. Прай нандырығларда искірілче, аның пабазы репрессияа хабылбаан. Ол кізі сағбазы чох чіт парған.
Надежда Максимовазар айланған кізілернің полғанының на оой нимес сурығ. Че прайзы ізенче, Россияның Хазна Думазының депутады Надежда Сергеевна сурығларын пӧгерге полыс пирер.
Автор :
Наталья ТЮКПЕЕВА Сом Максим АХПАШЕВТИ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде