ӦӦН ИС-ПАЙЫБЫС - ПІСТІҢ АЙДАС ОЛҒАННАРЫБЫС
12.12.2017
Хабарлар
OЛҒAH САДЫ. ИРКІН АЛТАЗОХ, ЧАЛАХАЙ КӦГ ИСТІЛЧЕ. ТОҒЫНҶЫЛАР ЧАРЫХ КӰЛІНІСНЕҢ ААЛҶЫЛАРНЫ УДУРЛАПЧАЛАР. КОРИДОРДА ВОСПИТАТЕЛЬЛЕР ПАЗА ОЛҒАННАР, КОНЦЕРТКЕ ТИМНЕНІП, ХАЛҒАНҶЫ ТӰЗЕДІГЛЕРІН ИТЧЕЛЕР. МЫҢДАҒ ХАЙЫНЫСНАҢ АҒБАННЫҢ «ВАСИЛЁК» ПАЛА ТИЛІЗІ КІНІ - ОЛҒАН САДЫ ПАЙРАМЫН ПАСТАПЧА. ПӰӰЛ ОЛ 40 ЧЫЛЫН ТОЛДЫРЧА.
ТАНЫХТИРҒА КИРЕК, ИРТКЕН ӰГРЕДІГ ЧЫЛЫНЫҢ САЛТАРЛАРЫНҶА «ВАСИЛЁК» ОЛҒАН САДЫ АҒБАННЫҢ ПИС АРТЫХ ШКОЛА АЛНЫНДАҒЫ ӰГРЕДІГ УЧРЕЖДЕНИЕЗІНІҢ САНЫНА КІРГЕН. ОЛҒАН САДЫ УСТАҒҶЫЗЫ ЕЛЕНА БАЙЕРНІҢ ЧООҒЫНАҢ, «ВАСИЛЁК» АНЗЫНАҢ НА САБЛАНМИНЧА. МЫНДА АЛТЫ ГРУППА ӦНЕТІН ӰГРЕДІГЛІГ КӦСТЕГЛЕРҶЕ ТОҒЫНЧА. АНДАР ХАЗИИ ХООСТЫРА СИДІКСІНІСТЕРГЕ КІРГЕН ОЛҒАННАР ЧӦРЕДІРЛЕР. КӦЗІДІМГЕ, ТІЛІ ААР ПАЛАЛАР, АУТИЗМ, ДАУН АҒЫРЫҒЛАРНАҢ АҒЫРЧАТХАННАР, КИНЕК ОЛҒАННАР. ПРАЙЗЫ ОЛАР ОЛАҢАЙ ПАЛАЛАРНАҢ ХАДА ПІР ГРУППАЗАР ЧӦРЧЕЛЕР. ПАСТАП ОЛ ГРУППАЛАРНЫ ЛОГОПЕДИЧЕСКАЙ ТІП АДАҶАҢНАР, АМДЫ ОЛ ӦНЕТІН КӦСТЕГЛІГ ГРУППАЛАРҒА АЙЛАН ПАРҒАННАР. ОЛҒАННАРНАҢ ПСИХОЛОГТАР, ЛОГОПЕДТЕР, ДЕФЕКТОЛОГТАР ПАЗА ПАСХА ДАА СПЕЦИАЛИСТТЕР ТОҒЫНЧАЛАР. МЫНДА ПАЛАЛАР ТІЛІ ТИЛІЗІ ХООСТЫРА УЛУҒ ТОҒЫС АПАРЫЛЧА. ПІР СӦСНЕҢ ЧООХТАЗА, ПАЛА ХАЗИИНА ПАЗА ТИЛІЗІНЕ УЛУҒ ХАЙЫҒ САЛЫЛЧА.
- Пістің мында ӱс группада хакас тілін ӱгренчелер, - поғдархаснаң чоохтаан Елена Байер. - Хакас тілінең палғалыстығ полған на марығда араласчабыс: теелбектер турғысчабыс, хакас кип-азаан кӧзітчебіс, хакас тілі уроктарын иртірер проекттер тимнепчебіс. Іди полған на марығда чахсы чидіглер кӧзітчебіс. Кӧзідімге, Ағбанда ирткен «Пала тілі» марығда пастағы орынға турысхабыс, республика синінде, тізең, ікінҷі орын алғабыс.
Хакас тіліне ӱгретчеткен воспитательлернің пірсі - Татьяна Анаркулова. Ол «Василёк» олған садында ла 25 чыл тоғын парир. Улуғ опыттығ воспитатель «Ноғаҷахтар» группада маңнаныстығ істен парча. Хакас тілі урогы неделяда пір ле хати полчатса даа, Татьяна Михайловна тӧреміл физминутка паза ойыннар тузында хакас тілінзер айланча. Пос тілі чох пір дее кӱн иртпинче тидір ол, олғаннар даа «анымҷох» сӧс чох нанминчалар.
- Палалар прай нимені ойын пастыра ӱгренчелер, ідӧк хакас тілін ойын хоостыра піліп одырчалар, - таныхтаан Татьяна Анаркулова. - Хакас тілін орыс таа палалар хынып ӱгренчелер. Оларға пістің тілібіс чапсых пілдірчеткен осхас, аннаңар олар пірде хакас палаҷахтардаң даа чапчаң сӧстерні сииртіп одырчалар, чоохтанза даа, арығ чоохтанчалар.
Ідӧк пу группада улуғ опыттығ воспитатель Зинаида Степановна Колмакова істен парча. Ол кічіг палаларны хакас тіліне ӱгредер сурығда ус тиирге чарир. Зинаида Степановна палаларны олған садында хакас тіліне ӱгредерінҷе методика пособиезі авторларының пірсі полча. Аның пасха даа тоғыстар пар, хайзылары полған на воспитательге олғаннарнаң тоғынарында улуғ туза полар.
Пу олған садының ӧӧн поғдархазы - тоғынҷылары. Олардаңар устағҷылары даа тохтағ чох чоохтирға тимде.
- Пістің ӧӧнінде опыттығ воспитательлер паза ӱгретчілер тоғынчалар, олар удаа алыспинчалар. Тоғынҷыларыбыс парчатсалар, тынаға алай пала тӧрідерге ле парчалар.
«Василёктағы» воспитательлер - чайаачы паза ӧткін чон. Аймах марығларда аралазарға оларны кӱстирге кирек чоғыл, постары пос кӧңнінең прай нимее тартылчалар. Олған садында тиксі 31 ӱгредіг тоғынҷызы тоғынча, оларның 85 % пастағы категориялығ, - тіпче Елена Байер.
Олған садының устағҷызы мында 15-ҷі чылы тоғын парир. Хайди ол таныхтапча, пу тусха олған сады паза аның тоғынҷылары ағаа сӧбірезі осхас чағын пол парғаннар. Аннаңар «Василёкты» пір дее пасха олған садына алыстырбасчыхпын тидір.
Олған садына 40 чыл, ол хысхаҷах нимес тус тіп сағынчам. Аннаңар тоғынҷылар даа, олғаннар даа ағаа чахсы тимнен салтырлар. Пайрамнығ концерт уғаа чылығ ирткен. Залда аймах тӧл чыылыс парғаны улам на ӧріндірген. Ол олған садында хаҷанох тоғынған ветераннар, пӱӱнгі кӱнде істенчеткен чон паза ӧсчеткен тӧлібіс - кічіг палаҷахтар.
Иир тооза чылығ алғыстас сӧстері истілген. Анда, олған садында тоғынып, тынаға парған ветераннарны чеестееннер паза 25 чыл артиинаң істен париған тоғынҷыларны алғыстааннар. Мындағ пайрамға хынығ программа тимнелтір: сарыннар, теелбектер. Че хамнар теелбее кӧрігҷілерні улам на аптаан. Ідӧк таныхтирға кирек, пу пайрамнығ иирде Татьяна Анаркулова паза Зинаида Колмакова олған садында хакас тілін тилітчеткен паза сабландырчатхан ӱчӱн алғыстас пічиинең таныхтатханнар.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде