ХАЗЫХ КІЗІДЕ - ХАЗЫХ ХУТ
12.12.2017
Хабарлар
Кӱскӱзін республиканың имнег профилактиказы кіні Хакасияның хазых хайраллаҷаң министерствозы полызиинаң Ағбан чуртағҷылары аразында «Хазых хазна синнең пасталча» марығ иртірген. Аның ӧӧн пӧгіні - спортнаң айғазары тузалығ полчатханнаңар чоохтиры, хазых хайраллирына паза хазых чуртас оңдайына тудынарына хайығ айландырары.
Марығ «Хазых кізіде - хазых хут», «Чӧріс - чуртас» паза «Пабам, іҷем, мин - хазых сӧбіре» номинацияларҷа ирткен. Анда тиксі 20 азыра кізі араласхан. Олар, хынған спорт кӧрімнерінеңер, постарының спорт чидіглерінеңер, хазых чуртас оңдайына тудынардаңар видео суурып, аны имнег профилактиказы кінінзер ысханнар.
Полған на номинацияда чиңісчі табылған. Ӱр ниместе оларны Г.Я. Ремишевскаяның адынаң республиканың имнег туразының актовай залында алғыстааннар паза сыйыхтар читіргеннер. Пайрамнығ тоғазығны Хакасияның хазых хайраллаҷаң министрінің полысчызы Наталья Комаровская асхан. Ол министр Владимир Костюштың паза хада тоғынчатханнарының адынаң видео ысхан кізілерні марығда ӧткін араласхан ӱчӱн алғыстаан.
- Сірер, постарың хазых чуртас оңдайына тудынып, аннаңар чоохтап, пасха чуртағҷыларны, туған- чағыннарыңны хазыхтарына хайығ айландырарға кӧніктірчезер. Марығ салтарларын идерге ӧнетін комиссия тӧстелген. Ол иң чапсых, марығ пӧгіннерін чахсы чарытчатхан видеоны таллаан, - таныхтаан Наталья Юрьевна.
Марығ тӧстегҷілері чиңісчілерні сценазар хығырғаннар, хайда олар суурған видеоларынаңар хысхаҷахти чоохтааннар. Анаң полғанына ла Аарластығ пічік, тренажерлығ залзар алай фитнес занятиелерге чӧрерге абонемент читірілген. Сыйыхтар спонсорлар полызиинаң тимнелген, аннаңар оларға ідӧк Хакасияның хазых хайраллаҷаң министерствозының алғыстас пічіктері пирілген.
Чиңісчілер аразында Марина Боргоякова полған. Ол «Чӧріс - чуртас» номинацияда утып алған. Марина Ағбандағы 1 № школада 11 класста ӱгренче. Аның видеозы 1 № школаның волонтерлары иртірген флешмобха чарыдылған, роликке ол «Тӧӧй нимес» сарынны таллап алған. Хайди хызыҷах чоохтаан, полғаныбыс ла пос оңдайлығ, пас-хазына тӧӧй нимес полчабыс. Че андағ даа полза, пісті чӧріс піріктірче, хайзы кізінің хазиин пик итче.
Таныхтирға кирек, Марина, марығларда ла нимес, тиксі школаның халых чуртазында ӧткін араласча. Ол школа телевидениезінің ӧӧн специализі полча, видеороликтер, оларның полталарын тимнепче, аймах статьялар пасча. Хакасияның имнег профилактиказы кіні чарлаан марығда аралазарға аны волонтерлар ӧмезінің устағҷызы чӧптеп алған. Маринаның угренҷілер иртірген мероприятиедеңер, пу темаа килісчеткен видеозы пар полған, аннаңар ол аны ызыбызарға чаратхан.
11 класс ӱгренҷізі хазых чуртас оңдайын апарарға кирек полчатханын чахсы пілче, позы даа пос туста аймах спорт упражнениелерін итче, чир-чайаанзар чорыхтарға хынып чӧрче. Аннаңар даа Марина чуртазын имнег киреенең палғалыстырарға сағынча полар. Ізенчем, аның сағынған сағыстары толар паза ол мыннаң мындар ідӧк ӧткін тудынар.
Автор :
Татьяна КЫРЖИНАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде