РОССИЯ ПРЕЗИДЕНТІНЕ ТАБЫҒ КАМПАНИЯЗЫ ПАСТАЛЫБЫСХАН
22.12.2017
Хабарлар
Киҷее Хакасияның Табығ комиссиязының кнезі Александр Чуманин Россия президентіне табығларға чарыдылған брифинг иртірген. Хабарҷыларнаң тоғазығда ол 18 марттағы табығлар хайди иртердеңер чоохтаан.
- Федерация Чӧбінің Россия президентіне табығларны 18 мартта 2018 чылда иртірердеңер чарадии 18 декабрьда «Российская газетада» чарыхха сыххан. Іди Россия президентіне табығ кампаниязы официально пасталыбысты, - таныхтаан Александр Чуманин.
Андағ оңдайнаң 18 декабрьдаң президентке кандидаттарны сығарарға чарадылған. Чоохтирға кирек, Россия президентіне кандидат поларға сағынчатхан кізі Россия чуртағҷызы, 35 частаң чиит нимес паза хазнада 10 чылдаң ас нимес чуртаан поларға кирек. Ағаа хоза чарғылатханы чох.
- Кандидат полыбызарға чарир пос позын сығарып паза партия сығарғаны хоостыра, - чарытхан Хакасияның Табығ комиссиязының кнезі. - Пос позын сығарарына 20 кӱн пирілче, политика партияларына - 25 кӱн.
Пос позын сығарған кандидатха позының пастағлығ ӧмезін тӧстирге киректелче. Ол ӧмеде 500 кізідең ас нимес кізі поларға кирек. Анаң ол кандидат 300 муңнаң ас нимес табығҷының хол салғанын чыыпча, че Россияның пір субъектінде ағаа иң кӧп 7500 табығҷының на хол салғанын чыырға чарадылча. Партиялар кандидаттарына 100 муңнаң ас нимес табығҷының хол салғанын чыып аларға киректелче, че пір субъекттең 2500 хол салғанын на чыырға чарир. Хазна Думазынзар кірчеткен тӧрт партияа («Единая Россия», КПРФ, ЛДПР паза «Справедливая Россия»), тізең, кандидады ӱчӱн табығҷыларның хол салғанын чыырға кирек чоғыл. Кандидаттардаң пічіктер алары январь соонзар тоозылар, аннаңар санға алылған кандидаттардаңар февральда ла пілдістіг полар.
Наа нимелерні алза, пу табығлар тӧрт нименең пасхалалар. Пастағызы - азынада ӱн пирері паза открепительнай удостоверениелер чох иділер. Анзы пічікке кирілгені хоостыра чуртабинчатханнарға ӱн пирерге оңдай пирер тіп чарытхан Чуманин. Андағ кізілернің саны Россияда 5 миллионға чағын. Ікінҷізі
- Россия субъекттерінің Халыхтар палаталарына табығларға кӧрҷең кізілерін сығарар право пирілче. Мының алнында андағ право партияларның паза кандидаттарның на полған. Узінҷізі -табығ комиссияларында видеокамералар турғызылар, оларны пастыра табығлар хайди парчатханы Интернетте онлайн-режимде кӧзіділер. Тӧртінҷізі - хайзы участоктарда табығ бюллетеньнерін санаҷаң комплекстер (КОИБ) турғызылар. КОИБ кӧрімінең ӱн пирҷең харчахха тӧӧй, че анда ӧнетін сканер турғызылых. Ол кемге ӱн пирілгенін кӧрче паза аны санға алча. Табығ комиссиязы кнезінің искіриинең, Хакасияда андағ 20 КОИБ турғызылар, ӧӧнінде Ағбандағы табығ участоктарында.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде