АНЫҢ ЧӰPEE САРНАПЧА, ТОХТАБИН
22.12.2017
Хабарлар
Ырлапчалар Денис МАМЫШЕВ, Герман ТАНБАЕВ паза Алексей КАЗАГАШЕВ
Пу ирткен средада, 20 декабрьда, С.П.Кадышевтің адынаң культура кінінің улуғ залында Хакасияның чон артизі, композитор паза ырҷы Герман Танбаевтің пайрамнығ иирі ирткен.
Ол сынап таа саблығ кізі! Аннаңар Хакасияның культура министрі Татьяна Чаптыкова позының чооғында таныхтаан: «Герман Гаврилович Танбаев осхас кізілер пістің чирібісте асхынах. Ол - Хакасиядағы композиторлар пірігізінің кнезі, «Хайҷы» кӧг ӧменің устағҷызы, республикада иртчеткен «От ыры» фестивальның тӧстегҷізі, Хакасияның хазна гимнінің авторы. Ол кӧп сарынға кӧглер пас салған. Хайди чоохталча, аның чӱрее, часка полып, сарнап сыххан паза амға теере сарнапча, тохтабин... »
Анаң Татьяна Чаптыкова Хакасияның культура министерствозы адынаң Герман Танбаевке 55 чазы толчатханынаң паза пӧзік чидіглері ӱчӱн Аарластығ пічік читірген паза тіріг чахайахтар сыйлаан.
Пайрамнығ иирні апарған Хакасияның чон артизі, ырҷы Людмила Арыштаева. Аразында ол Герман Танбаевтің сарыннарын толдырыбысчатхан.
Сценаның кӧзеңелері азылғанда, кізілер алнында чатханнығ одыр салған Герман Танбаев кӧріне тӱскен. Ол чатханнаң ойнап сыхханда, аның сыңырос ӱні улуғ залға толдыра чайыл сыххан. Чоохтирға кирек, залда кӧбізі пос чоны полған, аннаңар чатханның кееркестіг ӱні полған на кӧрігҷінің чӱреен истіг сыйбабыс турған.
Хайди теен Герман Танбаев, пӱӱнгі иир аның пайрамы нимес, олаңай сан пирістіг концерт полча. Ол позының сарыннарынаң кізілерні ӧріндірерге паза хада сарнапчатхан арғыстарынаң кізілерні таныстырарға сағынған. Сынап таа ол чайаачы иирде Герман Гаврилович позы ла сарнабаан, пасха даа ырҷылар аның сарыннарын ырлааннар. Чоохтирға кирек, Герман Танбаев сарыннарға ідӧк сӧстер пасча. Алында аның сарын кибелістерінің чыындызы сыххан. Амды ол книгаҷахтарны таппассың даа. Хатап таа сығарыбысса, артых полбасчых. Олаңай даа чон сарнирға хынча нооза.
Іди Герман Танбаевтің сарыннарынаң чон алнынзар сыхханнар Алексей Казагашев, Татьяна Балахчина, Владимир Доржу, Фаина Чебодаева, Денис Мамышев, Александр Кобежиков паза Мария Янгулова.
Герман Гаврилович кӧп сарынын пістің саблығ поэт Валерий Майнашевтің кибелістеріне пас салған. Іди сценада толдырылғаннар Майнашевтің сӧстеріне пазылған «Хам», «Минің чатханым», «Тигір чолы», «Хынызым хайда?» паза даа пасха сарыннар. Ідӧк пістің саблығ писатель Валентина Шулбаеваның «Школаҷаам», «Хайдазың, іҷең?» паза «Наңмыр» кибелістеріне пазылған сарыннар истілгеннер. Поэт Геннадий Кичеевтің сӧстеріне пазылған «Сіліг тузым» паза «Хазыңнар» чӱрексіністіг сарыннар кізілернің кӧңнін кӧдірген. Денис Мамышев уғаа чахсы ырлаан Антонида Томочакованың «Чиит тус» паза Василий Барашковтың «Чалғыс чахайах» сӧстеріне пазылған сарыннарны.
Паза ниме ӱчӱн махтирға чарир Герман Танбаевті? Ол чиит ырҷыларны таапча, оларны ӧскірче. Нинҷе наа «чылтыс тӧріпче» аның республикада паза чоннар аразындағы синде иртірілчеткен «От ыры» фестивальында. Пу даа иирде пастағызын на чон алнына сыххан полар чиит ырҷы Александр Саражаков. Ол сценада пір дее туртухпин тудынған. Кӱстензе, соонаң андағох саблығ ырҷы пол парарға айабас.
Герман Гаврилович позы Аршаннар аалынаң. Аннаңар нинҷе саблығ кізі ол аалдаң сыхханын санап килзең, сағын салчазың, Аршаннар чирі пістің чонның чайаачылар ордазы полча тиирге чарир. Андартын саблығ писательлер Моисей Баинов, Александр Котожеков, Валентина Татарова, артисттер Герман Саражаков, Александр Щукин, ырҷылар Герман Танбаев, Владимир Доржу паза даа пасхазы сыхханнар.
Концерттің халғанҷызынзар прай ырҷылар, сценазар сығып, пістің чонның «Хызыл тууп маймаам» тахпаан, «Ах пулуттар», «Хада сарназалар» ырларын ӧменең толдырғаннар. Иң халғанҷызын Хакасиядаңар сарынны залдағы чон, тура тӱзіп, хада толдырған.
Автор :
Илья ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде