ЧИҢІСЧІЛЕР АДАЛДЫ
26.12.2017
Хабарлар
Ирткен неделяда Хакасияның Ӧӧркі Чӧбі «Хрустальный барс-2017» хабарҷыларға паза СМИ-ларға марығ салтарларынҷа пайрамнығ мероприятие иртірген.
Пӱӱл марығ 16-ҷы хати иртірілді. 2017 чыл республика парламентіне пайрамнығ полған - закон сығарҷаң ӱлгӱ 1992 чылда тӧстелгеннең 25 чыл толдырды. Аннаңар хабарҷылар парламенттің пӱӱнгі ле чуртазын, тоғызын чарытпааннар, ідӧк аның тӧстелгенін, тиксі тархынын сағысха киргеннер, аймах хығыртығ депутаттарынаң чоохтазығлар апарғаннар. Марығда, тізең, Хакасияның Ӧӧркі Чӧбінің пайрамнығ чылын санға алып, ӧнетін номинация кирілген - «Вектің тӧртінҷі чардығы чонға тоғынып». Андағ оңдайнаң хабарҷылар паза СМИ-лар тӧрт номинацияда устарынаң сынасханнар. Парламенттің тоғызын иң чахсы чарытхан СМИ Гран-при сыйиина турысхан.
Марығның жюри кнезі полча республиканың парламент кнезінің пастағы орынҷызы Юрий Шпигальских. Ол марығның ӧӧн салтарларын искірген:
- Аарлығ арғыстар, Ӧӧркі Чӧптің прай депутаттары адынаң удурлапчам сірерні, марығның чиңісчілерін, чеестепчеткен пайрамнығ мероприятиеде. Пӱӱнгі кӱнде табығҷыларның паза закон сығарчатхан ӱлгӱнің аразындағы тӱзімніг палғалызы ӧӧнінде «тӧртінҷі ӱлгӱ» сылтаанда тӧстелче. Сірернің оңдай пар чон тапханнарның тоғызынаңар, чахсы киректерінеңер искірерге. Парламент тоғызын чарыдары иң сидік кӧстеглернің пірсі полча, мында пӧзік профессионаллар ла сыдасча. Оларның узы чылдаң чылға тыып одырча. Пӱӱл Гран-при чиңісчізін таллап аларға уғаа сидік полған, че марығ - ол марығ. Жюри кізілері, пір чӧпке киліп, ӧӧн сыйыхты Республиканың телевидение сетьіне (РТС телеканалға) читірерге чаратхан.
Чоохтирға кирек, пу сыйыхты Хакасияның Ӧӧркі Чӧбінің декабрьдағы сессиязында пайрамни читірері кибірге кір парған. РТС-тың устағҷызы Дмитрий Драничкин аны ідӧк 15 декабрьда сессия тузында алған. Марығда аралазарына 27 сурыныс, 200 азыра тоғыс алылтыр. Республика парламентінің кізілері полған на номинация чиңісчізінің ады пазылған конверттерні асханнар.
«Ӧӧнінеңер чарыда» номинацияда иң кӧп араласчы араласхан, че чиңісчі полыбысхан «Хабар» газетаның ӧӧн редактор орынҷызы Альберт Толмашов. Альберт Толмашов парламент тоғызын он азыра чыл чарыт парир. Пӧзік устығ хабарҷы парламент сессияларын, президиумнарын иртірбинче тиирге чарир. Хакас тілліг хығырығҷылар аның тоғыстарынҷа алылчатхан, тимнелчеткен законнардаңар піліп алчалар. Пу тоғыста ӧӧні - законнарның аар тілін чонға пілдістіг, оңарылыстығ пас пирері, хайзын Альберт Толмашов маңнаныстығ толдырча.
«Вектің тӧртінҷі чардығы чонға тоғынып» номинацияда чиңісчі полыбысхан «Ағбан» радиозының хабарҷызы Андрей Березин, «Азых чоохтазығ» номинацияда - «Хакасия» ГТРК хабарҷызы Татьяна Донцова, «Чоннаң табылғаннар» номинацияда - «РенТВ - Саяны» телеканал хабарҷызы Валерия Агафонова.
Іди Хакасияның Ӧӧркі Чӧбі чылдаң чылға тоғыстарын чарытчатхан хабарҷыларның тоғызын паалапча. Улуғ опыттығ хабарҷыларға чииттер хозылып, устарын тыытчалар. Чиңіс тутханнар, тізең, пасхазына кӧзідім полып одырчалар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде