АЙМАХ КИРТІНІСТІГ ЧОН ЫНАҒ ЧУРТАЗЫН
27.12.2017
Хабарлар
Хакасияның правительство туразында республика пазы орынҷызының тоғызын толдырчатхан Владимир Крафт чыылығ иртірген. Анда аймах киртіністіг чоннар аразындағы хайызығлар ӱзӱрілген.
2013 чылда Россия президентінің Сибирьдегі полномочиеліг кізізі, Москваның паза прай Русьтың Патриархы палғалыс тудардаңар чӧптезіг иткеннер. Чыылығда ол чӧптезіг хайди толдырылчатханын чарыда чоохтааннар. Хакасияның культура министрінің орынҷызы Лариса Киштеева чӧптезіге кирілген сурығларны искірген. Анда аймах чонның тархынында халған ис-пайын тыыдары сурығлар ӱзӱріге сығарылған. Ол сурығларны толдырар пӧгіннең культура министерствозы 2017 чылда аймах мероприятиелер иртірген. Ол санда Наа чыл, Чир-суубыстың арачылағҷызы кӱні, Ипчілернің чоннар аразындағы кӱні, Чыл пазы, Ӱртӱн тойы ӱлӱкӱннер полған. Андағ пайрамнарда республика чуртағҷылары сӧбірелерінең араласханнар. Ӧӧн хайығ улуғ частығ кізілерге салылған. Ідӧк муниципапитеттерде сӧбірелерге ӱлӱкӱннер иртірілген. Анаң пасха чир-суубысха хынарына чарыдылған мероприятиелер ирткен. Чиңіс кӱніне чарыдылған мероприятиелерде 250 муң артиинаң кізі араласхан.
Палаларны чонның кибірлеріне ӱгредерінҷе 2025 чылғa теере кӧрілген программаҷа ӱгредіг системазында наа оңдайлар кирілер. Театрларда олғаннарны орыс тіліне ӱгредер пӧгіннең ойыннар турғызылар.
Пасха хазналардаң килген кізілер, чонның амыр чуртазын тыыдар пӧгіннең, национальнай ӱлӱкӱннерге, марығларға тартылғаннар. Ідӧк правительство чарадиинаң республикада чуртапчатхан чоннарның кӱннері иртірілген.
Владимир Крафт ол чӧптезіге прай министерстволарның хайиин айландырған. Анда сығарылған сурығларны министерстволар постарының тоғызына килістіре толдырарға киректер.
Хакасияның национальнай паза территориальнай политика министрінің орынҷызы Нина Челтыгмашеваның чооғынаң, республикада 117 религия пірігізі саналча. Министерство, чоннар аразындағы хайызығлар пістің регионда хайдағ синде полчатханын кӧрер пӧгіннең, істезіг иртірген. Аның салтарларынҷа, сурастырған кізілернің 79 %-і чоннар аразындағы хайызығлары иптіг тіп таныхтаан, киртіністер аразындағы хайызығлар чахсы полчатханын - 83,6 %-і. Аннаң пасха, аймах чоннарны піріктірчеткен культура, религия паза спорт мероприятиелері иртірілген. Абазадағы, Саяногорсктағы паза ІІІира аймаандағы пос устаныс органнары орыс православнай тигірибнің епархияларынаң чӧптезіг идібіскеннер.
Хакасияның ӱгредіг паза наука министрінің орынҷызы Юрий Сагалаковтың чооғынаң, пӱӱл министерство он артиинаң мероприятие иртірген. Педагогикаҷа паза палаларны ӧскірерінҷе марығның региондағы чардығы иң танығлығ полған. Марығда тӧрт номинацияа 23 тоғыс сығарылған. Ол номинациялар палаларны ӧскіреріне паза ӱгредеріне чарыдылған. Ағбандағы епархиянаң иткен чӧптезіг хоостыра министерство «Ах Чарых Иннокентийнің хығырығларын» иртірген. Палалар паза чииттер экстремизмге тартылбас пӧгіннең профилактика тоғызын апарарынҷа ӱгретчілернің узын кӧдірер ӱчӱн, Хакасияның ӱгретчілернің узын тилітчең паза пілізін кӧдірҷең институды мероприятиелер паза семинарлар тӧстепче. Чоннар аразындағы талазығлар полдыртпас сурығларҷа республика паза муниципалитеттер синіндегі марығлар, фестивальлар иртірілче. Ол санда: «Чылтызахтар» марығ, «Ине тілі», «Ынархас чоллары» фестивальлар. Пӱӱл республиканың 250 ӱгредіг учреждениезінде Чоннарны піріктірчеткен кӱнге чарыдылған мероприятиелер ирткеннер.
Палаларны Чир-суубысха хынарға ӱгредері министерствоның ӧӧн кӧстеглерінің пірсі полча. Школалардағы чаа-патриот клубтарында кӧп мероприятие иртірілче. Ол клубтарға 3 муңҷа ӱгренҷі кірче. Чыл сай министерство чаа-патриот сменаларын иртірче. Анда олғаннар Россияның тирігліг кӱстерінің тархынын, стройнаң чӧрерге паза чаа тиріглерінің пӱдізін ӱгренчелер. Ідӧк школаларда Экология чылына чарыдылған мероприятиелер ирткеннер.
Ідӧк чыылығда Сорығ город пазының орынҷызы Маргарита Нестерова паза Таштып аймаа пазының орынҷызы Георгий Тодинов чоох тутханнар. Олар орыннарда чоннар аразындағы хайызығларға чарыдылған тоғыстаңар искіргеннер.
Халғанҷызынзар Юрий Сагалаков школа парда киртіністер культураларының паза светскай этиканың тӧстеглері (ОРКСЭ) предмет школаларда хайди апарылчатханын искірген. Ол предмет 2012 чылда ӱгредіге кирілген. 4-ҷі класстар ӱгренҷілері пу предметті неделяда пір час ӱгренчелер. Паба-іҷелер чыылығларында, ӱгренҷілернің сурынызын санға алып, паба-іҷелердең пічіктер алылчалар. Іди палалар ОРКСЭ предметтің аймах модельлерін ӱгренчелер.
Чыылығны тоозып, Владимир Крафт министерстволарға пазағы чылда апарар тоғыстың планына кирек тӱзедіглер кирібізерге чахығ пирген.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде