НАА ЧЫЛНАҢ!
29.12.2017
Хабарлар
Инга КЫЗЛАСОВА, Хакас филология кафедразының устағҷызы:
- Аарлығ чоным, Хакас филология кафедразының ӧмезі сірерні Наа чылнаң алғыстапча! Пістің чонның тархын чолы тирең, тілі пай, кибір-чозахтары кӱстіг. Поғдархапчабыс хакас чонның чуртазын кӧдірчеткен чир-суғҷыларыбысха. Піс асхынах таа ползабыс, посты чир ээзі чіли тудынарға, махтағлығ чидіглерге чидерге, кӱстіг паза чарых чуртасха тартыларға кирекпіс.
Хазииңар хаҷан даа пик ползын, хаалағларың хатығ ползын, чуртастарың чарых ползын. Чииттернің чолы азых ползын!
Пётр АДАРОВ, Алтай Республиканыц саблыг журнализі:
- Тағлығ Алтайдаң Хакасияа улуғ изен ползын! Прай хакас чонға часкалығ, хазых чуртас алғапчам! Хаҷан даа айас тигір, чарых кӱннер турзын !
Иртчеткен 2017 чыл пайрамнарға пай полған. Хакас чонның «Хабар» газетазы пайрамнығ 90 чылын таныхтаан. Аннаңар коллегаларны, «Хабар» газетаның тоғынҷыларын, прай чӱреемнең танығлығ пайрамнаң алғыстапчам. Газетаңар узах частығ ползын, ынағ паза чайаачы сӧбіренең тоғыныңар!
Пӱӱл ноябрьда «Алтайның чолмоны» республика газетазы 95 чылын таныхтады. Пістің иргі газеталарыбыс хаҷан даа чуртазын паза Чир-суубысха тузалығ ползын. Чоныбысты чахсы, чапсых хабарларнаң ӧріндір турыңар.
Алынҷа «Кӱн чахайағы» кӧглер паза теелбектер ансамбльының ветераннарын Наа чылнаң алғыстапчам! Ағбанда ӱгренчеткенімде, пу ансамбльның араласчызы полғамох. Пӱӱл «Кӱн чахайағы» тӧстелгеннең 60 чыл тол парды. Уғаа танығлығ паза чӱрексіністіг кирек. Мыннаң мындар ӧменің артисттері хакас чонын паза Россияның аймах регионнарын ӧріндір ле турзын!
Виктор КАПЧИГАШЕВ, Чоохчыл аалдағы школа устағҷызы:
- Аарлығ хара пастығ чир-суғҷыларым! Наа чылнаң прайзын алғыстапчам. Кічіг палалар, іҷе-пабаларының чооғын истіп, чахсы ӱгрензіннер. Чииттер, ӱгредіге тартылып, чуртаста постарының орнын таап, чир-суубысха туза идерге харассыннар. Іҷе-пабалар хазых ползыннар, палаларны ӱгредерге харассыннар. Улуғ частығ туған-чағыннарыбыс, амыр-хазых чуртап, пала-пархаларының паарсазын кӧрзіннер.
Наа чыл - чарых, сіліг ӱлӱкӱн. Прай чоныбысха часка ағылзын, пастаан киректерде чиңіс тударға хабассын. Чуртыңар чарых, кӧгліг, ӧріністіг кӱннерге пай ползын!
Татьяна КАЗАНАЕВА, Хакас националънай гимназияның ӱгретчізі:
Аарлығ чир-суғҷыларым! Прай чӱреемнең алғыстапчам сірерні Наа чылнаң.
Чоныбысха тӧл хозылзын,
Чуртазыбыс ырыстығ ползын.
Часка хада пастыр чӧрзін,
Чайааннар піске полыс пирзін.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде