ЧИИТТЕР - ПІСТІҢ ТАҢДАҒЫЗЫ
06.02.2018
Хабарлар
Хакасияның чииттер организациялары ирткен чылның салтарын ӱзӱргеннер
Хакасия пазының орынҷызы Владимир КРАФТ сыйых алғаннарнаң хада.
АҒБАНДА ХАКАС ХАЗНА УНИВЕРСИТЕДІНІҢ АКТОВАЙ ЗАЛЫНДА ХАКАС РЕСПУБЛИКАНЫҢ ЧИИТТЕР КИРЕКТЕРІНҶЕ ХАЗНА КОМИТЕДІ 2017 ЧЫЛНЫҢ САЛТАРЛАРЫНА ЧАРЫДЫЛҒАН ЧЫЫЛЫҒ ИРТІРГЕН.
ПЫЛТЫР ПІСТІҢ РЕСПУБЛИКАДА ХАКАСИЯ ПАЗЫ ВИКТОР ЗИМИННІҢ ЧАРАДИИНАҢ ЧИИТТЕР ЧЫЛЫ ЧАРЛАЛҒАН ПОЛҒАН. ПУ ЧЫЫЛЫҒА РЕСПУБЛИКАНЫҢ ГОРОД- АЙМАХТАРЫНДАҒЫ ЧИИТТЕР КИРЕКТЕРІНҶЕ ПӦЛІКТЕР УСТАҒҶЫЛАРЫ, «ЕДИНАЯ РОССИЯНЫҢ ЧИИТ ГВАРДИЯЗЫ» РЕГИОНАЛЬНАЙ ПӦЛИИНІҢ, «РОССИЯДАҒЫ ӰГРЕНҶІЛЕР ЧӦРІМІ» ОРГАНИЗАЦИЯНЫҢ, ТИКСІ РОССИЯНЫҢ «ЮНАРМИЯ» ЧААҶЫ-ПАТРИОТ ХАЛЫХ ЧӦРІМІНІҢ, «РОССИЯНЫҢ СТУДЕНТ ОТРЯДТАРЫ» РЕГИОНАЛЬНАЙ ПӦЛИИНІҢ, «РОССИЯНЫҢ ЧИИТТЕР ПІРІГІЗІ», ХАКАСИЯНЫҢ «АСХЫР» ЧИИТТЕР ОРГАНИЗАЦИЯЗЫНЫҢ КІЗІЛЕРІ, СТУДЕНТТЕР ПАЗА ЧИИТТЕР ЧЫЫЛЫСХАННАР.
ЧЫЫЛЫҒДА УЛУҒ ААЛҶЫ ПОЛҒАННАР ХАКАСИЯ ПАЗЫ ВИКТОР ЗИМИН, АНЫҢ ОРЫНҶЫЗЫ ВЛАДИМИР КРАФТ ПАЗА ПАСХА ДАА МИНИСТРЛЕР.
Чыылығда чоох тутханнар паза пӧзік чидіглерге читкен иң турыстығларға алғыстас пічіктерін читіргеннер Хакасия пазы Виктор Зимин, аның орынҷызы Владимир Крафт, экономика тилізі министрі Татьяна Пауль паза республиканың чииттер киректерінҷе хазна комитедінің кнезі Татьяна Борисова.
Іди ирткен чылда чииттернең тӱзімніг паза кӧп тоғынған ӱчӱн алғыстас пічіктерін алғаннар Хакасияның ӱгредіг паза наука министрі Лариса Гимазутина, экономика тилізі министрі Татьяна Пауль, национальнай паза территориальнай политика министрі Михаил Побызаков, Ағбан пилтірі аймааның устағҷызы Елена Егорова, Хакас хазна университедінің ректоры Татьяна Краснова, ХТИ-ның ректоры Елена Бабушкина, «Хабар» газетаның ӧӧн редакторы Радион Сунчугашев, РТС-тың директоры Дмитрий Драничкин, «Хакасия» ГТРК-ның устағҷызы Лариса Ефименко паза даа пасхазы.
Чыылығда чоох тутхан аразында ойын кӧзіт турғаннар пістің саблығ «Иренек хан» кӧг ӧмезі, Хакас филармонияның «Кӱн сузы» теелбек ӧмезінің ооллары, «Юла» вокал студиязының хыстары.
Ирткен чылда Хакасияның чииттері сынап таа ӧткін хайынғаннар. Хайдағ мероприятиелер ирткеннеңер сценаа сыххан кізілер чоохтааннар. Оларның хай піреезін искір пирерге чарир.
Иң пастағызы, Хакасия пазы Виктор Зиминнің чӧбі хоостыра 2017 чыл Хакасияда Чииттер чылы тіп чарлал парғанда, чииттерге кӧп хайығ салыл сыххан. Аны хоостыра пылтыр Хакасия правительствозында чииттер киректерінҷе хазна комитеді тӧстелген. Аның кнезіне Татьяна Борисова турғызылған. Ол хакас тілін дее чахсы пілче. Пастап Чайаачылар туразында методист полып тоғынған. Анаң аны культура министерствозынзар алып алғаннар, аннаң сығара аны правительствозар хығырып алғаннар. Амды пу наа тоғызында ідӧк тӱзімніг тоғынарына ізеніс пар.
Хайди теен Хакасия пазы, чииттер - пістің таңдағыбыс. Олар хаҷан даа чапчаң сағынчалар паза хаалапчалар. Мының алнында чииттернең кем не айғаспаан, че ӧнетін комитет чох полған. Пістің аймах-пасха кӧстеглер пар, хайда чиит улус позын кӧрерге сағынча. Олар анда постарын кӧзітсіннер, постарыох чарадығлар алзыннар. Пістің чиит улус тоғынарға тимде, анзына оларға ӱлгӱ пирерге кирек. Олар пістің Чир-суубыс ӱчӱн ідӧк нандырығлығ полчалар нооза.
2017 чыл Россияда Экология чылы тіп чарлалған полған. Чииттернің эколог отрядтары паза волонтерлар пістің чирдегі сӧп-сапты арығлааннар, ағастар одыртханнар. Студенттер отрядтары ӧткін тоғын сыхханнар. Ол тоғысты тыыдар ӱчӱн, Хакасия пазы чииттернең ӧнетін тоғасхан. Анда олар иң киректелчеткен тоғыс кӧстеглерін ӱзӱргеннер. Оларның аразында - пӱдіріг, аал хонии, олған лагерьлері, чонға хабазығ пирҷең тоғыстар. Студенттер отрядтары пасха даа регионнарда, ол санда Крымда тоғынғаннар.
Пылтыр республиканың иң танығлығ мероприятиелерінің пірсі чииттернің «Этнова-2017. Чылығ Сибирь» чоннар аразындағы форумы полған. Ол читінҷі хати ирткен. Пылтыр форум Ағбан пилтірі аймаандағы Сапогов аалда полған. Форумда аймах-пасха ӱгредіглер иртірілгеннер.
Хакасия пазы Виктор Зимин андағы чииттернең тоғазарға ӧнетін чӧрген.
Мында хоза «Асхыр» чииттер пірігізін таныхтирға кирек. Ол пірігістің чииттері пістің республикабыстың чуртазында ӧткін араласчалар. Политика, хоных паза культура сурығларын чалтанмин кӧдірчелер.
Ирткен чылда танығлығ пайрамнарның пірсі «Мисс Абахай-2017» полған полар. Ол - олаңай ла марығ нимес, ол - чииттер чӧрімі, хайзы хакас тілін, кибірлерін, культуразын тилітче.
«Этнова-2017» форумда Хакасияның пазы Виктор Зимин чииттернең тоғасханда, хакас чииттер «Мисс Абахай» марығның синін кӧдіреріне аннан полызығ сурғаннар. Хакасия пазы, пу марығның тузазын таныхтап, полыс пирерге молҷаан.
Россияда Чииттер кӱні июньда иртчеткен полза, пістің Хакасияда пылтыр 2 сентябрьда пастағызын на Хакасия Чииттерінің кӱні таныхталған. Ағбанның Пастағы май ачығында «В Белом» теелбек фестивальы ирткен. Ам ол ӱлӱкӱнні чыл сай таныхтирлар.
Декабрьда, тізең, Ағбанда республиканың музей-культура кінінде Хакасия чииттерінің пастағы съезді ирткен. Анда республиканың город-аймахтарынаң 200 азыра делегат чыылған. Чииттернің съездінде ідӧк ӱгредігліг аймах площадкалар тоғынғаннар, анаң чиит делегаттар Хакасия пазы Виктор Зиминнең «Азых чоохтазығ» иртіргеннер.
Пӱӱл чииттернің тоғыстары ідӧк кӧп полар. Наа тоғынчатхан чииттер комитеді ол саринаң аймах пӧгіннердеңер искірген. Иң танығлығ полар, неке, Ағбанда «Патриот» чааҷы-патриотическай паркты тӧстирі. Парктың ӧӧн пӧгіні - ӧсчеткен тӧлні чир-суубысха хынарға, Россияның Тирігліг кӱстеріне поғдархирға ӱгредері, Ада чир-суубыстың чааҷы матырларын хумартхылиры.
Автор :
Илья ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде