МӦГЕ ТУССАР ЧОРЫХ
06.02.2018
Хабарлар
Республиканың музей-культура кінінде уғаа чапсых ӱс тее кӧзідіг азылған.
Кӧзідіге «Мӧге туссар чорых» проект хоостыра Пурунғы Египеттегі мумияларның хобырғаны сығарылған. Полған на экспонат - холнаң паза пір ле экземплярлығ иділген. Кӧзідігнің кураторы Рушания Габбасова кӧрігҷілерге экскурсия иртірген. Ол Осирис, Сет худайлардаңар кип-чоохты паза Пурунғы Египеттегі чон ноға ӱреен кізілернің мумиязын ит турғаннаңар чоохтап пирген. Кӧзідімге, сығарылған экспонаттарны Санкт-Петербургтың иң чахсы хоосчылары тимнееннер. Эрмитаж хоосчылары пу тоғыстарны пӧзік паалааннар. Че олар хайдағ ниме-ноолардаң паза хайдағ оңдайнаң тимнелгені ам даа чазытта тудылча. Прай экспонаттар кізілернің пос чыындыларынаң алылғаннар.
Пу чапсых кӧзідіге аймах паннолар сығарылғаннар, хайзыларында Египеттегі чонның худайлары хоостал парғаннар. Ідӧк Гор, Тигір, Кӱн паза Анубис худайларның статуяларының хобырғаннары, фараон Тутанхамонның пирамидазының хобырғаны паза пасха даа ниме-ноолар кӧзідіге сығарылғаннар. Египет чонның гороскобы кӧрігҷілернің хайиин тартча. «Гороскоп» пазыл парған панноның алнында кӧп кізі чыылыс парча.
Пурунғы Египеттегі чон саблығ, пай кізілерні сӱмекчіннерінең хада чыып салҷаңнар. Соонаң сӱмекчіннерінің орнына улуғ нимес хоости чайалған кізілер омаларын салҷаңнар. Оларньің саны нинҷе-де чӱзерлеп пол парҷаң. Ӱреен кізее хоости чайалған кізілер омаларын сыйлаҷаңнар, хада чыып салҷаңнар. Египеттегі чон ӱреен кізі нинҷе-де тус пазынаң тіріл килер паза ағаа сӱмекчіннер кирек поларлар тіп киртінҷең. Аннаңар, кізінің худы иді-ханынзар айланар ӱчӱн, ӧнетін іди мумия итчеңнер. Фараон ӱреп парза, аны тиксі ораап, сырайына алтын-кӱмӱске киптеп салған ома кизірт салып, ис- пайынаң хада чыып салҷаңнар.
Пу кӧзідігде ідӧк Тутанхамонның пирамидазының кічіг иде хобырғанын кӧріп алар оңдай пар. Тутанхамонның сыырады XIX векте табылған. Андада аны хасхан кізілер прайзы кинетін ӱреп парған. Ноға іди полғаннаңар аймах кӧрістер пар. Ученайларның чооғынаң, пурунғы Египеттегі чон, фараоннарны чыыпчатса, хорғыстығ ағырығларның бактерияларын хада чыып салҷаң. Пірее ағырыға хаптырып, іди ах чарыхтаң парыбысхан поларлар тіп санапчалар.
Мумиялар идіп, ол оңдайнаң ідӧк пасха даа чирлерде тузаланҷаңнар. Кӧзідімге, Италиядағы Палермо городтағы музейде иреннернің, ипчілернің паза палаларның нинҷе-де чӱс мумиязы пар.
Чон ӱреен кізінің худы Осиристің чарғызын иртче тіп сағынҷаң. Ӱреен кізінің чӱрее весызар салылҷаң. Анын кӧдірімі хус чӱгінең аар пасса, аны хорғыстығ аңа чииртібісчеңнер. Хус чӱгінең тиң алай ниик кӧдірімніг чӱрее полза, кізі аннаң андар сыныхтағны иртчең. Чуртаста чахсы ла киректер иткен кізі ниик чӱректіг полҷаң тіп санаҷаң пурунғы чон. Сынағ маңнаныстығ иртібізер ӱчӱн, ӱрееннернің пурунғы книгазы ағаа полысчаң. Аннаңар ол книганы ӱреен кізінең хада чыып салҷаңнар. Пу кӧзідігде ӱреен кізілернін книгазының хобырғаны сығарылған.
Ікінҷі кӧзідіг - ол хоос голограммаларның кӧзідии. кӧзідіге Санкт-Петербургтағы музейлернің голограмма экспонаттарының хобырғаннары сығарылғаннар. кӧзідімге, хооссар пір саринаң кӧрзе, киикчін кӧрін парча, пасха саринаң кӧрзе, ол чіт парча. Піреезінде ікі хоос кӧр саларға чарир.
Ӱзінҷі - «Кунсткамераның архиві» кӧзідіг. Пу кӧзідіге Россияның анатомия музейіндегі 40-ча экспонады сығарылған, оларның піреезіне - 270 чыл. Кӧзідіге спирттіг сӱлейке ідістер сығарылғаннар. Хайзында-да кізі паары, хайзында-да чӱрек салыл партыр. Олар - наркотикнең тузаланғаннарның, тамкы тарт-ханнарның чӱрее-паарлары. кӧзідімге, тамкы тартчатхан кізінің ӧкпезі харал парчаттыр. Пу кӧзідіг, кізі хазых чуртасха тудынмаза, анзы аның иді-ханына хайди теелчеткенін піліп аларға полысча.
Пу ӱс кӧзідіг март тоозылғанҷа тоғынар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде