ХАНАТТЫҒ ТИМІР ХУСТАР - ОЛАРНЫҢ ЧУРТАЗЫНДА
14.02.2018
Хабарлар
Ағбандағы аэропорттың аэровокзалында Россияның Гражданскай авиациязының 95 чылына чарыдылған пайрамнығ мероприятие ирткен.
Семён Гаврилович АХПАШЕВ сыйыхха турысхан
АЭРОВОКЗАЛЗАР КІРЧЕТКЕН КІЗІЛЕРНІ АВИАТОР ПОЛАРҒА ӰГРЕНЧЕТКЕН ООЛАХТАР ӦРЧІЛІГ УДУРЛАПЧАЛАР. ОЛАР ПРАЙЗЫ ТӦӦЙ КИП-АЗАХТЫҒ, АХ КӦГЕНЕКТЕРІНІҢ ИҢНІЛЕРІНДЕ - ПОГОННАР.
ЧЕ ОЛАРЗАР ЧИДЕР АЛНЫНДА ТИМІР ПАРЫН СЫНЫХТАПЧАТХАН ДЕТЕКТОР ТӰГЕЕЗІН ИРТЕРГЕ КИРЕК. ІЗЕПТЕРДЕГІ ТИМІР НИМЕ-НООЛАРНЫ, МАНИТТЕРНІ, ЧАСТЫ СУУРЫП, ТӰГЕЕ ХЫРИНДАҒЫ СТОЛЗАР САЛЫП, АНЫҢ АЛТЫНҶА ИРТЧЕМ. ОЛ САҒБА ПИРБЕДІ, АНЗЫ ТИМІР ЧОҒЫЛЫН ТАНЫХТАПЧА. ПРАЙ ОЛ ТОҒЫС САМОЛЁТТАРҒА, ПАССАЖИРЛЕРГЕ ТЕРАКТТАРДАҢ ХОРҒЫС ПОЛДЫРТПАС КӦСТЕГНЕҢ АПАРЫЛЧА.
ООЛАХТАР КИЛГЕН КІЗІЛЕРНІ ПІРЕРДЕҢ ІКІНҶІ ХАДЫЛЫНЗАР АПАРЧАЛАР. АЭРОВОКЗАЛНЫҢ УЛИИ УҒАА АЛҒЫМ НООЗА, АНЫҢ ПІР ПУЛИИН СТЕНЕНЕҢ ПӦЛ САЛҒАННАР, МЫНЫҢ АЛНЫНДА АНДА ТАМОЖНЯ СЫНЫХТАА ПОЛҶАҢ. АМДЫ АНЫ УЛУҒ ЗАЛҒА АЙЛАНДЫР САЛТЫРЛАР, ОДЫРЧЫХТАР ТОЛДЫРА ТУРҒЫЗЫЛЫХ. ЗАЛДА ЧОН ТОЛДЫРА, ӦӦНІНДЕ ЧАСТАН ПАРҒАН КІЗІЛЕР, ЧИИТТЕР КӦРІНМИНДЕЕЧЕ. АЭРОПОРТТА КӦП ЧЫЛ ТОҒЫН САЛҒАН ВЕТЕРАННАРНЫ АНДАР ӦНЕТІН ХЫҒЫРТЫРЛАР.
Хайди искірген пайрамнығ мероприятиені апарчатхан хыс, 1923 чылда 9 февральда СССР-ның Істеніс паза арачыланыс чӧбі хазнада гражданскай авиация тӧстирдеңер чарадығ алған. Аннаң сығара 9 февральда Гражданскай авиация тоғынҷызының кӱні таныхталча. Ам Россияның Гражданскай авиациязына 95 чыл толча.
Ідӧк пӱӱл Ағбандағы авиаотряд 80 чылын таныхтир, ол 1938 чылда сентябрьда тӧстелген, авиаотряд ам даа маңнаныстығ тоғынча. Амды Ағбандағы аэропортта 476 тоғынҷы істенче, аэропорт тиліпче, аннаң аймах городтарзар, ол санда Москвазар, авиарейстер толдырылча.
Тоғыста чахсы кӧзідімнер кӧзітчеткен тоғынҷыларны паза аэропортта кӧп чыл тоғын салған ветераннарны сыйыхтирға Хакасияның транспорт паза чол хонии министрінің пастағы орынҷызы Иван Белоусха сӧс пирілген. Ол прайзын Россияның Гражданскай авиация кӱнінең алғыстаан, ідӧк 80 чыл мының алнында Хакас автоном облазында Ағбандағы авиаотряд тӧстелгенін таныхтаан.
Иван Белоустың чооғынаң, амды піс Ағбанда аэропорт чох чуртас полғаннаңар сағынминчабыс таа. Ол хаҷан даа полғанға тӧӧй пілдірче. Амды Ағбандағы аэропорт республиканың иң чахсы тиліпчеткен предприятиелерінің пірсі полча. Ирткен чылда ла аэропорт самолёттарнаң 190 муң пассажирні аймах городтарзар, пасха хазналарзар апар салған.
- Сірер ағырыбысхан кізілерге пастағы имнег полызиин пирерге парчазар, - айланған чонзар министрнің орынҷызы, - ол тоғысты толдырарға аэропортта ӱс вертолет пар. Пірее сағыбаан саай кинетін пол парза, сірер пастағы полызығ пирерге парчазар. Мында мин аэропортта кӧп чыллар тоғынған пенсионерлерні, ветераннарны кӧрчем. Оларның тӱзімніг тоғызы сылтаанда пістің аэропорт тоғынча, ханаттығ тимір хустар мыннаң аймах чирлерзер учухчалар. Аэропорттың амғы устаана тоғысты ідӧк маңнаныстығ апарарға алғапчам, мыннаң учухчатхан авиапассажирлер санын кӧптелдіріп ле одырыңар, республикада авиапредприятие сыбыра флагман ползын.
Иван Белоус, чооғын тоозып, аэропортта чахсы тоғынчатханнарға паза кӧп чыллар тоғын салған ветераннарға Хакасия пазының алғыстас пічіктерін, транспорт паза чол хонии министерствозының Аарластығ грамоталарын паза алғыстас пічіктерін читірген. Сыйыхтар читірілчеткен аразында Хакас филармонияның чайаачы тоғынҷылары чонға кӧглеп турғаннар. Іди Ольга Кох скрипканаң ойнаан, Алтайның паза Хакасияның саблығ артизі Артур Марлужоков паза Хакасияның саблығ артизі Мария Янгулова сарыннар толдырғаннар.
Кӧп кізее чахсы тоғызы паза пӧзік профессионализмі ӱчӱн «Гражданскай авиацияа - 95 чыл» кӧксіне хазанҷаң знактар читірілген. Ол знактарны Ағбандағы аэропорттың ӧӧн директоры Вячеслав Рожновтың холынаң алғаннар. Сыйыхтатханнарның аразында адалғаннар Людмила Тортукова, Мария Тюдешева (ол аэропортта 33 чыл имҷі полып тоғын салған), Пётр Тохтобин (водитель полча) паза Семён Ахпашев.
Семён Гаврилович Ахпашевтеңер алынҷа чоохтирға чарир. Ветеран пӱӱл 70 чазын таныхтир, аның 46 чылын ол Ағбандағы аэропортта кии судноларын учуғарға тимнир ӧӧн инженер полып істенче. Ол Совет Союзы тузында, 1972 чылда, Ригадағы авиация инженерлері институдын тоозып, Ағбанзар килген. Аннаң сығара ол аэропортта тоғынча, авиапредприятиенің устаа, аның пӧзік профессионализмін таныхтап, специалисттер чидіспинче тіп, Семён Гавриловичті тынаға позыдарға хынминча.
Итсе, Ахпашевтер сӧбірезін пістің республикада кӧп кізі пілче полар. Сӧбіре пазы Гаврил Максимович прай чуртазын ӱгредіг киреене пир салған. Палаларының иң улии Семён Гаврилович полча, аның кічіг харындастары Валерий паза Емельян, ідӧк Ригадағы авиация инженерлері институдын тоозып, авиаторлар полғаннар (Валерий - Хызылчардағы авиапредприятиеде), амды тынағдалар.
Ағбандағы аэропорт чахсы саринзар алысчатханы тастынаң даа іле кӧрінче. Аэровокзал туразы сіліг чазал парған, аның алнындағы ачых прай иптел парған, плиткаларнаң чабылған, чарытчаң фонарьлар килістіре турчалар. Автомобильлер турғысчаң улуғ площадка асфальтнаң чабылған. Прай пу тоғыстар толдырыларына Хакасия правительствозының устаа улуғ хайығ салча, Хакасия пазы Виктор Зиминнің кӱстенізінең пасха городтарзар, хазналарзар даа наа авиарейстер азылча. Тиктең нимес, Ағбандағы аэропорт чоннар аразындағы статустығ полча. Аның аэродромында хайдағ даа улуғ самолёттар, одырып, учух полчалар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде