КӦП ПАЛАЛЫҒ СӦБІРЕЛЕРГЕ - АВТОМОБИЛЬ
16.02.2018
Хабарлар
Хакасия правительствозы туразы алнында, Пастағы май площадьында, республикадағы кӧп палалығ сӧбірелерге микроавтобустар читіргеннер
НАА МАШИНАЛАР КЛӰСТЕРІ РЕСПУБЛИКАНЫҢ КӦП ПАЛАЛЫҒ АЛТЫ СӦБІРЕЗІНЕ ЧИТІРІЛГЕН. «ХАКАС РЕСПУБЛИКАДА КӦП ПАЛАЛЫҒ СӦБІРЕЛЕРГЕ СОЦИАЛЬНАЙ ПОЛЫЗЫҒ ПИРЕР ОҢДАЙЛАРДАҢАР» ЗАКОН ХООСТЫРА, ЧАЗЫ ЧИТКЕЛЕК ЧИТІ ПАЗА АННАҢ ДАА КӦП ПАЛАЛЫҒ СӦБІРЕЛЕРГЕ РЕСПУБЛИКА БЮДЖЕДІНІҢ АХЧАЗЫНА МИКРОАВТОБУСТАР АЛЫЛЧА.
ПӰӰЛ АНДАҒ СЫЙЫХТАРНАҢ АҒБАН, ХАРАТАС ГОРОДТАРНЫҢ ПАЗА ПИИ, АҒБАН ПИЛТІРІ АЙМАХТАРНЫҢ СӦБІРЕЛЕРІ ТАНЫХТАТХАННАР. СИГІС ОРЫННЫҒ ГАЗ-З221 МИКРОАВТОБУС УЛУҒ СӦБІРЕЛЕРНІҢ КИРЕКСІНІСТЕРІНЕ УҒАА КИЛІСТІРЕ ПОЛАР. ПОЛҒАН НА МАШИНАНЫҢ ПААЗЫ - 996 МУҢ САЛКОВАЙ.
Хакасия пазы Виктор Зимин, наа машиналар клӱстерін сӧбірелерге читіріп, таныхтаан:
- Улуғ алғызым читірчем іҷе-пабаларға, кӧп пала ӧскірчеткен ӱчӱн. Паланы ӧскіріп алары оой нимес, ол - улуғ тоғыс. сӧбірее туза ағылзын. Аннаңар сыйыхха ниикке чӧрҷең автомобиль нимес, микроавтобустар читірілче. Че пар улуғ сӧбірелер, хайзылары микроавтобуссар прайзы сыңмин даа парар.
Ідӧк наа автомобильлер клӱстерін читірчеткенінде Хакасияның істеніс паза социальнай тиліс министрі Наталья Карамашева араласхан.
- Микроавтобустар чазы читкелек читі паза аннаң даа кӧп палалығ сӧбірелерге чыл сай читірілче. Амды наа машиналар клӱстерін алты сӧбіре алды. 2011 чылдаң сығара 45 сӧбірее микроавтобус пирілген. Пу тоғысты пістің республика аннаң андар апарарға пӧгінче, - таныхтаан Наталья Карамашева.
Тасхар соох таа полза, сыйых аларға килген палаҷахтар микроавтобус ибіре ойлас чӧрчеткеннер. Оларның ӧрінізіне, наа машиналар клӱстерінең хада улуғ пакеттерде тадылығ сыйыхтар пирілген. Олғаннарның андағ сыйыхтарға кӧңнілері уламох кӧдірілген.
Пии аймааның чуртағҷылары Вера Петровнанаң Георгий Борисович Карачаковтар 10 пала ӧскірчелер. Мындағ сыйых алғанына Вера Карачакова чалахай кӧңнінең паза сағыстарынаң ӱлескен:
- Кӧп палалығ сӧбірелерге аарлығ сыйых пирілчеткен ӱчӱн Хакасия пазы Виктор Зиминге паза правительстваа улуғ алғызым читірчем.
Мындағ сыйых минің танығлығ чазыма читірілчеткені уламох ӧріндірче. Пӱӱн минің тӧреен кӱнім. Карачаковтарның палалары, ӧсклеп парып, тарасхлап парғаннар. Олар чох чурт ээн пілдірібіскен. Іди 2005 чылда олар сӧбірезер пастағы паланы ӧскірерге алып алғаннар. Амғы туста пір пала хоных хон салған, пірсі училищеде ӱгренче. Олардаң пасха сӧбіреде ам даа читі пала ӧсче.
Пӱӱнгі кӱнде Карачаковтар ирепчі палаларынаң хада чуртасха ӧрінчелер паза таңдағызына пӧгіннер турғысчалар.
Хакасия пазы Виктор ЗИМИН Валентина БАЯКОВА паза Афанасий Чучуновнаң хада.
Ідӧк Ағбан пилтірі аймааның Шурышев аалында 9 пала ӧскірчеткен Валентина Алексеевна Баякованаң Афанасий Павлович Чучунов микроавтобус алғаннар. Оларнын улуғ оолғы Алексей боксча Хакасияның чемпионы полча, кічии Афанасий - холнаң тудысчаң спорт кӧрімінҷе чемпион. Мындағ айдас оолларны ӧскірче пу улуғ сӧбіре.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде