ІҶЕЛЕРГЕ - ӰГРЕДІГ ТИККЕ
14.03.2018
Хабарлар
Президенттің чахиин - чуртасха.
Россияда «Чонға тоғыс табарынаңар» федеральнай законҷа чонға тоғыс тапчаң служба паланаң одырчатхан ипчілерге профессиональнай ӱгредіг алай хоза ӱгредіг аларға полысча.
Декрет отпускында одырчатхан ипчілерге, палаа ӱс час толғалах полза, чонға тоғыс тапчаң службазар айланып, хоза ӱгредіг алып алар ондай пар. Ипчі, чуртапчатхан орындағы чонға тоғыс тапчаң службазар айланып, паспортын, паланын свидетельствозын кӧзідерге кирек. Ағаа хоза, тоғынчатхан организациядаң декрет отпускына парыбысхан поларға кирек. «Хакасияның чонына тоғыс табарына республикада 2012 чылдаң сығара полызары» хазна программазынҷа ипчілерге хоза ӱгредіг пирілче. Іди 2012 чылдаң Хакасияда 559 ипчі хоза ӱгредіг алған.
Ипчілер паланаң декрет отпускында одырған соонаң квалификацияларын чідір салчалар. Тоғысха сыхса, оларға удаа профессиональнай полызығ киректелче. Пірееде организация чабыл парча, ипчі кізі тоғыс чох халча алай предприятиее пӧзік квалификациялығ тоғынҷы киректелче. Пу сидік ондайларны санға алып, хазна ипчілерге хабазар пӧгін тутхан.
Іди чонға тоғыс тапчаң кін ипчілерге иң киректелчеткен профессияларға паза хоза программаларға ӱгредіг аларға полысча. Ипчілернің хайиина парикмахер, кран машинизі, садығҷы, бухгалтер, маляр, штукатур, менеджер паза хоза ӱгредіг алҷаң хысхаҷах курстар кӧрілче. Чонға тоғыс тапчаң служба ипчілерні ӱгренерге ысча.
Ағбан чуртағҷызы Елена Глюкова декрет отпускында одырчатханда, ідӧк хоза ӱгредіг алып алған. Чонға тоғыс тапчаң кін ағаа кадрларнаң тоғынҷаң ӱгредіг аларға полыс пирген. Ӱгредіг алғанын сағысха киріп, Елена Александровна чоохтапча:
- 2013 чылда кӱскӱзін СМИ-дағы искіріг хайиим тартхан. Кічіг паланаң декрет отпускында одырчатхан ипчілерге чонга тоғыс тапчаң кіннең сығара тикке ӱгредіг алып алар оңдай парынаңар искіріг пирілген.
Мин, чонға тоғыс тапчаң кіннің сайтынзар кіріп, хайдар айланарға, хайдағ пічіктер чыырға чарыда пазыл парғанын хығырып алғам. Ӧӧн кирексініс ипчі тоғынчатхан орнынаң декрет отпускына парғаны полған.
Ағаа хоза, ӱгреніп алған специальностьча организацияда аннаң андар тоғынарға кирек. Пічіктерні чыып, чонға тоғыс тапчаң кінзер айланғам. Анда ӱгренҷең курстар кӧп полган. Кіндегі специалист Ольга Позудинова ӱгренҷең курстар таллап аларға полысхан. Ол тест иртірген, хайзы мағаа килісчеткен специальностьты кӧзіткен. Тест салтарлары мағаа пічіктернең тоғынҷаң специальность иң килістіре поларын кӧзіт пирген. Оларның пірсі кадрларҷа специалист полған. Мин, ол курстарға пазын салып, нинӌе-де тус толдыра группа чыыларын сахтаам. Ӱгредиим «Хакасия. ру» ӱгредіг кінінде 2014 чылның июльында пасталған. Пістін ӧмеде он кізі ӱгренген. Ікі ай чарым ӱгренгебіс, октябрьда «Кадровик (управление персоналом)» свидетельство холға алгам.
Тоғыс тапчаң кінде ӱгредіг алғаны чуртасха улуғ туза ағылған. Мин ол специальностьча тоғыс таап алғам. «Город Мастеров»реклама компаниязында кадрларнаң тоғыс апарчам. Мында 20l6 чылдаң істенчем, тоғыс кӧңнiме кірче. Ольга Позудинова иртірген тест мағаа килістіре специальность таап аларға полыс пирген.
Чонға тоғыс тапчаң кіннің тоғынҷыларына улуғ алғызым читірчем. Олар улуғ тоғыс апарчалар. Сӧбіреде пала тӧрізе, хорадығлар пілдірте хозыл парча. Ахча читкіӌе ползын тіп, ирепчі ікізінең тоғынарға кирек. Чонға тоғыс тапчаң кін анзына полысча.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде