ХАКАСИЯ, ХЫЗЫЛЧАР КРАЙЫ, ТУВА ПАЛҒАЛЫСТАРЫН ТЫЫТЧАЛАР
17.04.2018
Хабарлар
Хызылчар крайы губернаторының тоғызын толдырчатхан А.В.УСС, Тува пазы Ш.В.КАРА-ООЛ паза Хакасия пазы В.М.ЗИМИН чӧптезігде хол салған соонаң.
ХЫЗЫЛЧАРДАҒЫ ЭКОНОМИКА ФОРУМЫ ХАДА-ПІРГЕ ТОҒЫНАРДАҢАР ЧӦПТЕЗІГЛЕР АПАРАРҒА УҒАА КИЛІСТІРЕ ОРЫН. ХАКАСИЯ УСТАҒ-ПАСТАА ОЛ ОҢДАЙНАҢ ПАСТАҒЫ ЛА ЧЫЛ ТУЗАЛАНМИНЧА. ПӰӰЛ ДЕЕ КӦП АЙМАХ КӦСТЕГЛІГ ЧӦПТЕЗІГЛЕРДЕ ХОЛ САЛЫЛҒАН. ОЛАРНЫҢ АРАЗЫНДА ИҢ ПУРУН ӰС ХОНҶЫХ РЕГИОННЫҢ, ХЫЗЫЛЧАР КРАЙЫНЫҢ, ХАКАСИЯ ПАЗА ТУВА РЕСПУБЛИКАЛАРНЫҢ, АРАЗЫНДАҒЫ ХАДА-ПІРГЕ ТОҒЫНАРДАҢАР ЧӦПТЕЗІГНІ ТАНЫХТИРҒА КИРЕК. «КИМДЕГІ СИБИРЬ» РЕГИОННАР АРАЗЫНДАҒЫ ПРОЕКТТІ ТӦСТИРДЕҢЕР САҒЫС ХЫЗЫЛЧАР КРАЙЫ ГУБЕРНАТОРЫНЫҢ ТОҒЫЗЫН ТОЛДЫРЧАТХАН АЛЕКСАНДР УССТЫҢ ТӦРЕЕН. РОССИЯ ПРЕЗИДЕНТІ ВЛАДИМИР ПУТИН НАА ПАЗА ХЫНЫҒ САҒЫСХА ЧӦПСІНГЕН. АНДАҒ ОҢДАЙНАҢ «КИМДЕГІ СИБИРЬГЕ» ЧОЛ АЗЫЛҒАН.
Хол саларында Россия президентінің Сибирьдегі федеральнай округтағы полномочиеліг кізізі Сергей Меняйло полған. Ол ӱс регион пазын хада-пірге тоғынарға чаратханнары ӱчӱн алғыстаан: Экономика форумында - Россияда регионнар аразындағы мындағ проект пастағызын на чуртасха кирілче, - теен Сергей Меняйло. - Анзын чуртас киректепче тиирҷікпін. Піс пӱӱн Владимир Владимирович Путин турғысхан пӧгіннерні ӱзӱргебіс. Сағынчам, оларны чуртасха кирерге прай оцдайлар пар. «Кимдегі Сибирь» ідӧк президенттің сағыстарын чуртасха кирерге полызар. Наа сатысты чуртасха кирчеткеннері ӱчӱн, ӱс регион пастарына алғыс ползын.
Чӧптезігде хол салғаннар Хакасия пазы Виктор Зимин, Хызылчар крайы губернаторының тоғызын толдырчатхан Александр Усс паза Туваның пазы Шолбан Кара-оол.
- Пу чӧптезіг «Кимдегі Сибирь» проектті чуртасха кирерінҷе пастағы ла хаалағ полча тиирге чарир, - чарытхан Хакасия пазы Виктор Зимин.
- Полған на регионның пар позының сидіксіністері, хайзыларын ол пос кӱзінең не пӧк полар. Пар сурығлар, хайзыларын хонҷых регионнар хабазии чох пӧк полбассың. Ана ол сурығларны пӧгеріне кӧстелген пістің проект.
Виктор Зимин иң сидік сурығларның санында тимір чол транспорт суриин адаан. Аның кӱзі паза оңдайлары анылған чир ис-пайын республикадаң сығарарға читпинче. Салтарында ӱрег иділче промышленность предприятиелеріне ле нимес, ідӧк республика бюджедіне. Транссибтің оңдайларын алғыдарынҷа ӱс регион хада-пірге тоғынарға кирек.
Халғанҷы сурығны пӧгеріне кӧстелген паза пір чӧптезіг: Хакасия правительствозы паза «Россиянын тимір чоллары» ОАО аразындағы. Хол салғаннар Хакасия пазы Виктор Зимин паза Хызылчардағы тимір чол - «РЖД» ОАО пӧлиинің пастығы Владимир Рейнгардт.
Чӧптезіг ӱс чылға кӧрілген. Аны хоостыра регионда транспорт инфраструктуразы тиліділер паза чонға кирек сурығлар пӧгілер, ол санда имнег полызиин пирерінҷе.
- Хакасия правительствозынаң хада иділген чӧптезіглер аразында пу иң чахсы чӧптезіг, - таныхтаан Хызылчардағы тимір чол пастығы Владимир Рейнгардт. - Ол транспорт ла сурығлары нимес, че ідӧк кӧп социальнай сурығлар алылған.
Транспортты алза, чӧптезігде ідӧк город хыриндағы электропоездтер чӧрізі толдырылар оңдайлар пазылған. Регион правительствозы электропоездтерде социальнай паалар турғызар, аннаң палғалыстығ хорадығларны предприятиее айландыр турар.
2018 - 2023 чылларға Хакасияда магистраль паза промышленность тимір чол транспортын тилідерінеңер меморандумда сигіс кізі хол салған: Хакасия пазы Виктор Зимин, Хызылчардағы тимір чол пастығы Владимир Рейнгардт, «Разрез Аршановский» ООО устағҷызы Евгений Юрин, «Русский уголь» АО-ның ӧӧн директоры Станислав Грачев, «СУЭК» АО-ның логистикаҷа директоры Денис Илатовский, «Майрыхский» разрез устағҷызы Виктор Козьмин, «Ӱр нимеске тузаланҷаң пӧлік (ОВЭ)» АО-ның ӧӧн директоры Евгений Челтыгмашев паза «Истсибинвест» ООО-ның ӧӧн директоры Владимир Михайлов.
Хайди кӧрчебіс, хол салғаннар санында ӧӧнінде хара тас аныпчатханнар. Хара тас аныпчатхан промышленность предприятиелеріне тимір чолҷа тартылчатхан таарлағның 88 % килісче. Мындағ саннарнаң ӱлесче Хызылчардағы тимір чол. Хакасияның хара тас аныпчатхан предприятиелері 2025 чылға теере чылда 40 миллион тонна хара тас анирға пӧгін тутчалар. Че пӱӱнгі кӱнге анылған руданы республика тастынзар сығарарынҷа сидіксіністер пар. Сылтағ - амғы тимір чолның кӱзі паза вагоннар чидіспинчеткені. Тимір чол оңдайларын алғыдарынҷа республика устағ-пастаа, харатасчылар паза тимірчолҷылар хада-пірге тоғынарлар. Транспорт инфраструктуразын тилідеріне алты чыл аразына 27 миллиард салковай хорадарға кӧрілче: 19 миллиард салковай «РЖД» ОАО-ның ахчазы, 8 миллиард салковай - промышленность предприятиелерінің.
13 апрельде, Хызылчардағы экономика форумының ікінҷі кӱнінде, хада-пірге тоғынардаңар чӧптезігде хол салғаннар Хакасия пазы Виктор Зимин паза «СГК» ООО-ның ӧӧн директоры Михаил Кузнецов.
Сибирьдегі генерирующай компания - Хакасияның паза пір ізестіг партнёры, хайзы Харатас городтың паза Ағбан пилтірі посёлоктың чылығ пирҷең системаларын Ағбандағы ТЭЦ-ха хозар. Республика чуртағҷылары харатастағыларның чылығ пирҷең системаның хомай тоғызына, тӧреміл сайбалчатханына хоптанчатханнарын чахсы пілчелер. Ағбандағы ТЭЦ-та хоза котёл турғызылғанда, аның кӱзі пілдірте хозылған, аннаңар Харатасха даа, Ағбан пилтіріне дее чылығ пирер оңдайы пар.
- Піс республика устағ-пастааның сағыссырастарын, чуртағҷыларның ирееленчеткеннерін чахсы пілчебіс, аннаңар регионда чылығ пирерін табырах чахсыландырарға кӱстенербіс, - таныхтаан Михаил Кузнецов.
Андағ оңдайнаң Хакасия регионнар аразындағы палғалыстарын алғыдыбысты паза партнёрларнаң хада-пірге кӧрілген проекттерні чуртасха кирерін кӧр салды. Чӧптезіглерде кӧрілген чарадығларның чуртасха кирілерін чуртағҷылар даа, предприятиелер дее сағирлар. Пір сағысха, пір чӧпке килгені иң пастағызын кӧдірілчеткен сурығларның кирек полчатха-нын таныхтапча.
Республика пазынаң пасха Хызылчардағы экономика форумында Хакасияның ӱгредіг паза наука, культура, хазых хайраллаҷаң министрлері паза чииттер киректерінҷе хазна комитедінің кнезі ӧткін тоғыныбысханнар. Олар ідӧк Хызылчар крайының, Туваның кӧстегліг министерство-ведомстволарынаң хада-пірге тоғынарға чӧптес салғаннар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде