АҒБАҢДА ІҶЕЛЕР АЛЛЕЯЗЫ ТӦСТЕЛГЕН
15.05.2018
Хабарлар
ЧОННАР АРАЗЫНДАҒЫ СӦБІРЕ КӰНІНЕ ЧАРЫДЫП, АҒБАНДА ІҶЕЛЕР АЛЛЕЯЗЫН ТӦСТИРІНЕ ХЫҒЫРТЫЛҒАННАР ХАКАСИЯ ПАЗЫ ВИКТОР ЗИМИН, РОССИЯ ФЕДЕРАЦИЯЗЫ ЧӦБІНІҢ КІЗІЗІ, ХАКАСИЯДАҢ СЕНАТОР, «РОССИЯ ӀҶЕЛЕРІ» ХАЛЫХ ЧӦРІМІНІҢ УСТАҒҶЫЗЫ ВАЛЕНТИНА ПЕТРЕНКО, АҒБАН ГОРОД ПАЗЫ НИКОЛАЙ БУЛАКИН, РЕСПУБЛИКАДАҒЫ ЧИИТ ПАЗА КӦП ПАЛАЛЫҒ ІҶЕЛЕР, СӦБІРЕЗЕР ПАЛАЛАРНЫ АЛЫП ӦСКІРЧЕТКЕН, ХАЛЫХ ТОҒЫЗЫНАҢ ӦТКІН АЙҒАСЧАТХАН ИПЧІЛЕР, ВОЛОНТЁРЛАР. МЫНДАҒ ТАНЫҒЛЫҒ КИРЕК «ӀҶЕЛЕР АЛЛЕЯЗЫ» АКЦИЯ ХООСТЫРА ИРТІРІЛЧЕ, ХАЙЗЫНЫҢ ПАСТАҒҶЫЗЫ ПОЛЧА ПІСТІҢ ХАЗНАДАҒЫ «РОССИЯ ІҶЕЛЕРІ» ХАЛЫХ ЧӦРІМІ.
ИҢ ПУРУН АНДАҒ АЛЛЕЯ 2015 ЧЫЛДА ИНГУШЕТИЯНЫҢ ӦӦН ГОРОДЫНДА, МАГАСТА, ТӦСТЕЛТІР. АНАҢ ПУ ЧӦРІМГЕ ВОРОНЕЖ, ЛИПЕЦК, УЛАН-УДЭ, ОРСК, ЯРОСЛАВЛЬ ПАЗА ДАА ПАСХА ГОРОДТАР ХОЗЫЛҒАННАР. АМДЫ АНДАҒ АЛЛЕЯ АҒБАНДА ПЕРИНАТАЛЬНАЙ КІН АЛНЫНДАҒЫ АЧЫХТА ТӦСТЕЛДІ.
Перинатальнай кін алнында тӧстелчеткен Іӌелер аллеязында хазыңны одыртханнар Таштып аймаандағы іӌелер Галина НИКИТЕНКО паза Светлана ЧЕБОДАЕВА
Чӧрім. Ағбанда пу наада перинатальнай кін алнындағы ачыхта Іӌелер аллеязы тӧстелген. Анда 100 азыра хазың ағазы одыртылған. Пу чӧрімде араласханнар Хакасия пазы Виктор Зимин, Россия Федерациязы Чӧбінің кізізі, Хакасиядаң сенатор Валентина Петренко.
Пеер чыылған чонны мындағ танығлығ киректе араласчатхан ӱчӱн алғыстап, республика пазы Виктор Зимин таныхтаан:
- Сӧбіре кӱніне удур, чахсы кирек ӱчӱн піс мындағ чахсы орынзар чыылыстыбыс. Піс перинатальнай кін алнындағы ачыхта Іҷелер аллеязын тӧстепчебіс. Ізенчем, ол амғы тустағы уғаа чахсы пайзаң тура чирін чазир паза аның чахсы тании полар. Пу кінні піс іҷелерге паза час палаларға пӱдіргебіс. Перинатальнай кін пылтырғы сентябрьдаң сығара тоғынча. Ол син тус аразына анда ікі муң азыра ыңаачах тӧреен Піс Ағбан мэрінең хада пастап пала тапчаң наа тура пӱдірердеңер пӧгінгебіс, че анаң перинатальнай кіннің проектінче тоғын сыххабыс. Санапчам, піс орта чарадығ алғабыс. Амды наа объект онарлап чыл турар.
Ол улуғ пӱдіріге ахча позыдарына хабасхан ӱчӱн Валентина Петренкаа алғызын читірген. Прайзына часка, пик хазых паза кӧп пала ӧскірерге алғаан.
Ідӧк чоох тутхан Валентина Петренко. Ол іҷелерге пала таапчатхан ӱчӱн алғызын читірчеткенде, перинатальнай кіннің кӧзенектерінең тасхар харапчатхан іҷелерге хайығ салған. Олар, кӧзенек азып, улуғ пастыхтарның чооғын искеннер. Валентина Петренко пу кӱн араласхан полған на сӧбіренің сағызында халар теен. Хайди ол таныхтаан, мероприятие іҷелерге чарыдылча. Чуртаста кізінің хайди даа іҷезі пар ползын, іҷенің, тізең, палалары. Мындағ чахсы киректің тирең сағызы пар - кӧп пала тӧрізін, олар хазых паза талааннығ ӧссіннер, сӧбірелер республикада пик чуртазыннар.
Ағбан город пазы Николай Булакин, аллеяда хазың одыртылза, анаң наа аллея Крыловтың орамазынаң сығара перинатальнай кінге теере чазал парар теен. Нинҷе-де чыл ирт парза, Ағбан сіліг хазың аллеязынаң поғдархир.
Аллея тӧстир орынға Ағбанда наа кіннің чирін тиктең не таллап албааннар. 2014 чылдаң перинатальнай кін пӱдіріл сыххан, 2017 чылдаң ол тоғын сыххан. Ам анда наа чуртас пирілче - ах чарыхха палалар тӧріпчелер. Алғыстас сӧстерін ідок читірген перинатальнай кіннің ӧӧн имчізі Наталья Ржевская. Ӧрінізінең ӱлескен пу кінде иң пастағы пациенттернің пірсі Антонина Макарьева. Мында тӧреен палазы амды 1 час 1 айлығ полтыр.
«Россия іҷелері» чӧрімнің гимні толдырылып, киизер ах паза от кӧк ӧңніг шарлар позыдылған соонаң ағастар одыртарға кірібіскеннер. Чиит хазың ағастар одыртарында республика пазы ӧткін араласхан. Пасха даа пастыхтар пу тоғыстаң хыйа турбааннар. Перинатальнай кінде пала тапхан нинҷе-де чиит іҷе, палаҷахтарын коляскалығ ағылып, чӧрімде араласхан. Хада хонғаннары ағас одыртарға полысханнар. Ағас хорбыларын пеер Боградтағы питомниктең ағылғаннар. Акция тузында пір саңай 100 азыра чиит хазың одыртылған. Ағбандағы парковай хоныхтын тоғынчылары ағас одыртар оймахтарны азынада тимнеп салтырлар.
Наа аллеяда хазың одыртхан кізінің ады-солазы чачында пазылып, ағасха хаптырылған. Чиит хазыңны одырт салғаннарның санында полған Таштып чирінең килген ікі іҷе. Пірсі - Галина Александровна Никитенко, ол ікі паланың ічезі паза 4 парханың ууҷазы полча, Ибіг аалда чуртапча. Ікінҷізі - матыр іче Светлана Афанасьевна Чебодаева. Ол сӧбірезінең Таштыпта чуртапча. Светлана Афанасьевна 8 паланың ічезі полча. Аның позының ікі палазы пар, 6 паланы сӧбірезінзер ӧскірерге алып алтыр.
Асхыс чирінең киліп, Іҷелер аллеязын тӧстирінде араласхан Кызлас аалдағы кӧп палалығ іче паза кӧп пархалығ ууча, Хакасияның саблығ ӱгретчізі Мария Михайловна Кызласова. Ол аалдағы ортымах школада хакас тілі ӱгретчізі полып 42 чыл істен салған. Мария Михайловна теен:
- Мындағ пайзаң улуғ тура алнында ағастар одыртчатханы - уғаа чахсы. Ол - пістің таңдағы кӱнібіс, палаларыбыстың часкалығ ӱлӱзі. Пу турадаң пасталча наа кізінің чуртас чолы. Чиит іҷе пастағызын на палаҷаан мында кӧрче, хайзын ол тоғыс ай чӱрее-паары алтында ал чӧрген Кӧп палалығ іҷелер ӱзiнҷі-тӧртінҷі палазын табарға пеер килчелер.
Пістің хакас чон хаҷан даа час палаа ӧрінҷең. Тойлығ чӧрчеткен ипчіні хайдар хайраллааңнар, хазых пала тӧрізін тіп, уғаа сибер хайҷаңнар. Аннаңар сағынчам, пу турада іҷелерні ідӧк хайраллап, палаларын тузына читіре ал чӧрерге полызарлар. Минің тӧрт пала, оларның палалары пар, че пір ле оолғым кізі алғалах. Пу наа турада пархаларым тӧрібееннер, че мында чеенімнің палазы тӧреен - аны мыннаң ӧрініп сығарғабыс. Наа кiн - пайзаң тура. Аны кӧріп, кізінің кӧңні кӧдірілче, поғдархас толча. Іди іӌелерні, наа тӧріпчеткеннерні улуғлап, андағ килкім тура пӱдір пиргеннер.
Перинатальнай кінде Ағбанда чуртапчатхан Анастасия Климашевская ікінҷі хызыҷаан пӱӱл мартта тапхан. Аның 1,5 айлығ палазы коляскада амыр узупчатхан арада, чиит іче хада хонғанынаң ағас одыртарға маңнанған. Ол, ӧрінізінең ӱлезіп, таныхтаан:
- Тун палам ам 10 час толдырған. Ол Ағбандағы пала тапчаң турада тӧреен Кічии, тізең, пу наа кінде. Хызыҷаамны аар тапхам, реанимацияда чатхам, палам ор хазых тӧреен Чоохтирға сағынчам, перинатальнай кінде прай ниме ипчі чонға чахсы ползын тіп тимнелтір. Имҷілер, имнег тоғынҷылары пациенттерге уғаа чахсы хайчалар. Полған на ипчі алынча палатада чатча. Анда душ-ваннай пар, ипчі палатадох азыранча, я, ағаа чиисті пеер ағыл пирчелер. Пала тапчаң туранаң тиңнестірҷее дее чоғыл.
Наа кінде ікі неделя имненгем, че мағаа санаторийде тынанчатхан чіли пілдірген. Махтир сӧстер дее таппинчам. Ам республика пазы Виктор Зиминзер пічік пазып айланарға сағынчам. Ағаа наа кін пӱдірерге кӱстенген, іҷелерге чахсы хайчатхан ӱчӱн алғызым читірербін. Наа кіннің имҷілеріне, имнег тоғынӌыларына ідӧк улуғ алғыс ползын.
Іҷелер аллеязын тӧстеп, акция араласчылары наа кін алнындағы ачыхты иптирге полыстылар. Халғанҷызынзар прайзы хада сомға суурынғаннар. Чиит іҷелер соонаң пеер ӧс парған палаларынаң тынанарға кил турарлар, тӧліне иділген чахсы киректеңер поғдархап чоохтирлар.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде