ПАСТАҒЫ ОРЫНДА - ЧОН ХАЗИИ
22.05.2018
Хабарлар
Тоғыс чорығы. Россия президентінің Сибирьдегі федеральнай округтағы полномочиеліг кізізі Сергей Меняйло паза Хакасия пазы Виктор Зимин «Саянмолоко» ООО-да паза республиканың перинатальнай кінінде пол килділер.
САЯНОГОРСК ГОРОД ААЛҶЫЛАРНЫ АЙАС ТИГІРНЕҢ УДУРЛААН. «САЯНМОЛОКО» ООО-ның ЦЕХТАРЫНДА ТОҒЫС ХАЙНАПЧАТХАН. СӰТТІ ПАКЕТТЕРГЕ ПАЗА БУТЫЛКАЛАРҒА УРЧАТХАН КОНВЕЙЕРЛЕР ТОҒЫНДЫРЫЛҒАННАР. ОПЕРАТОРЛАР АППАРАТТАР ТОҒЫЗЫН КОМПЬЮТЕР ПАСТЫРА СЫНЫХТАПЧАЛАР. НИНҶЕ-ДЕ ТОҒЫНҶЫ ХАРЧАХТАРҒА КАРТОННЫ ТУЗЫНДА САЛАРҒА МАҢЗЫРАПЧАТХАН.
СӰТ - АС-ТАМАХ АРАЗЫНДА ИҢ НЕ ПАЙ АС-ТАМАХ, НЕКЕ. ХАЙ СИН АЙМАХ ЧИИС ТИМНИРГЕ ЧАРИР СӰТТЕҢ? САНАП ТАА ПОЛБАССЫҢ, УЛАМОХ ХАҶАН ПОЛҒАН НА ЧОННЫҢ СӰТТЕҢ ТИМНЕЛЧЕТКЕН ПОС АС-ТАМАА ПОЛАДЫР.
Хакастарның ол - айран, пызылах паза пасхазы даа. Аннаңар сӱт ас-тамаа хайдағ даа сӧбіре столында чыл ибіре турчатхан тамах полча, ағаа андағох пӧзік кирексініс. Чон кирексінізіне «Саянмолоко» ООО устағ-пастаа уғаа ситкіп хайча. Сурыныстарын толдырӌаң оңдайлар табарға кӱстенче предприятие директоры Валерий Левицкий паза технологтар. Андағ оңдайнаң тӧрееннер аймах сырлар, «Ибдегі ӧріңме», термостат йогурты паза даа пасха сӱт ас-тамаа.
Аалӌыларны хаӌан даа чалахай удурлапчатхан Валерий Левицкий Сергей Меняйлоны паза Виктор Зиминні предприятиенің ӧӧн цеғынзар иртірген - сӱт цеғынзар. Мында нинӌе-де конвейер пір саңай тоғынча. Пірсінде ӱр хайраллалчатхан 3,5 % хойығ сӱт урылча, ікінӌізін-де - 2,5 %. Ікінӌі хадылында иң хойығ сӱт бутылкаларға урылча. Алынӌа цехта сырлар тимнепчелер, андох эӌігей тимге сығарылча. Предприятие устағӌызы полған на ниме-ноо сығарызына хайди килгеннеңер чарыда чоохтап турған. Хайда-да садығ туралары ол-пу ас-тамахха кирексініс парын читірчелер, хайда-да экономика алызығларына тӧстенчелер.
35 чыл тоғын салып, предприятие хараа-кӱнӧрте 700 тонна сӱттең аймах ас-тамах сығарар оңдайларға читкен. Мындағ кӱстіг предприятие килкім дее регионнарда асхынах. Че пӱӱнгі кӱнде ол кӱстің улуғ нимес чардығы ла тузаланылча - предприятие 300 тонна ла сӱтнең тоғынча. Анзы ас-тамахты сатчаң оңдайларнаң палғалыстығ. Предприятиенің ас-тамаа Хакасияның, Хызылчар крайының садығ тураларына, рыноктарына сығарылчатханы читкіӌе нимес. Валерий Левицкий ас-тамаан Москвазар даа читірерге тимде.
- Уғаа чахсы предприятие, анда тоғынчатхан чонны махтапчам, - таныхтаан Сергей Меняйло. - Олар иргі предприятиеде амғы тусха килістіре технологияларны кирӌең оңдай тапханнар. Кӱстіг предприятие, че сығарысты тӱзірбес ӱчӱн, аның ас-тамаан садар рынокты алғыдарға кирек. Сағынчам, ол андағ чалғыс ла предприятие нимес, аннаңар пірге хабазығ программазын тӧстирін пӧгербіс.
Хакасия пазы Виктор Зимин республикада ниме-ноо сығарызынаң айғасчатханнарны хайығ чох артыспинча. Ол теелче килкім не хоныхтарға нимес, ідӧк кічіг паза ортын предприятиелерге. Оларның полғаны ла Хакасияның экономиказын тилідеріне позының хозымын итче. Республикада сығарылчатхан ас-тамахты, ниме-нооларны орындағы садығ тураларынзар чылдырарына хабазар пӧгіннең «Хакасияда иділген!» кӧзідіг чыл сай иртірілче. Тиксі алза, хабазығ кӧрімнері сығарысты алғыдарына кӧстелгеннер.
- Регион пазы полып, мин пістің ниме-ноо сығарчатхан, тимнепчеткен предприятиелерні арачылирға кирекпін, - теен Виктор Зимин «Саян-молоко» ООО-да полған соонаң. - Уламох, хаӌан ол сын ниме-ноолардаң иділчеткен ас-тамах, андар хомай нимелер поралалбинча.
Хакасия пазы Виктор Зимин ікінӌілес чох сӱт ас-тамаан Хыдатсар читірер сағыснаң ӱлескен. Пастыхтар Саяногорсктаң Ағбанзар республиканың перинатальнай кінінзер читкеннер. Анда олар ыңааӌахтарға реанимация пӧлиинің тоғызынаң танысханнар, хайда кічіг кӧдірімніг палаӌахтар чатчалар. Пір ыңааӌахтың кӧдірімі тӧреенде 600 грамм полтыр, амды ол 2800 грамм пасча. Хыринда палазының чуртазын ал халар оңдай парына ӧрінчеткен іӌе часкалығ турча. Хости пу наада ла тӧреен паза пір ыңааӌах чатча. Кӧдірімі - 650 грамм на. Аны кӧріп, пастыхтар чоохтанӌаң даа сӧстерін чідіргеннер.
- Чон хазии - пастағы орында. Ол, тізең, іӌенің паза паланың хазиинаң пасталча. Реанимацияда чатчатхан ыңааӌахтарның чуртазын ал халар ӱчӱн мының алнында Москвазар МЧС вертолёдынаң апарӌаңмыс. Амды піс оларны пос чирінде имнепчебіс. Перинатальнай кіннер пӱдірии программазы Сибирьде прай даа толдырыл парған Норильск городтаң пасха. Олар амғы тусха килістіре оборудованиеліглер, анда пӧзік пілістіг специалисттер істенчелер. Ол хайдағ даа регионға уғаа кирек пӱдіріг, - таныхтаан Сергей Меняйло. - Аның ӧӧн салтары - палаларның паза іӌелернің чуртазын хайраллап халары.
Перинатальнай кін ӱр тимге сығарылған полза даа, амды ол толдыразынаң тоғынча. Мында ипчілерге, іӌе поларға сағынчатханнарға уғаа истіг оңдайлар тӧстелгеннер. Пӱӱнгі кӱнге теере анда 2000 азыра пала тӧреен. Часкалығ іӌелернің пірсі - Анна Земцова. Сӧбіренің пастағы пала тӧреен - Елена хызыӌах. Іӌезі перинатальнай кіндегі оңдайларға паза имӌілернің хайиина чӧпсінче:
- Кінде сынында уғаа чахсы оңдайлар тӧстелтір, имнег туразында чатчатханым пілдіртпеен дее, - тіпче чиит іӌе. - Республикада амғы тусха килістіре перинатальнай кін пӱдірілгені ӧріністіг.
Сергей Меняйло тоғыс чорығынаң Хакасияда пастағызын на полбады. Полған на сай ол наа предприятие, учреждение тоғызынаң танысча, оларның тоғызынаң палғалыстығ сидік сурығларны федеральнай синде пӧкчең оңдайлар табар пӧгіннең санға алып одырча. Сӱт ас-тамаа сығарызындағы сидік сурығлардаң пасха пу чорыхта республикадағы олған имнег туразынзар оборудование аларына федеральнай кіннең хабазығны ӧскірері хайыға алылған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде