АНЫМҶОХ, ШКОЛАҶААМ!
25.05.2018
Хабарлар
Халғанҷы саң. Пу кӱннерде Хакасияның школаларында халғанӌы саң сыңыразы истілді. Ӱгредіг чылы тоозылча. Аны хоостыра Н.Ф.Катановтың адынаң национальнай гимназия-интернатта пайрамнығ линейка ирткен.
АХ БАНТИКТІГ ХЫЗЫҶАХТАР, ГАЛСТУКТЫҒ ООЛЛАР. ПУ ОЛАРНЫҢ ПАЙРАМЫ. АМДЫ ОЛАР 11 ЧЫЛ ИРТКЕН ЧОЛЛАРЫНЫҢ ХАЛҒАНҢЫ ХААЛАҒЛАРЫН ИТЧЕЛЕР. ӦРІНІСТІГ, ЧЕ ОЛОХ ТУСТА ЧӰРЕКСІНІСТІГ. ӰР НИМЕСТЕҢ ООЛ-ХЫСТАР АЛНЫНДА АЙМАХ ЧОЛЛАР АЗЫЛАР, ШКОЛА ТУЗЫ, ТІЗЕҢ, СООНА ЛА ХАЛЫП ОДЫРАР.
ПАЙРАМНЫҒ ЛИНЕЙКАНЫ ХАКАС НАЦИОНАЛЬНАЙ ГИМНАЗИЯ-ИНТЕРНАТТЫҢ ДИРЕКТОРЫ МАРИНА САГАТАЕВА АСХАН. ОЛ ШКОЛА ТООСЧАТХАННАРНЫ, АЛҒЫСТАП, ХАЗНА СЫНЫХТАҒЛАРЫН ЧАХСЫ ТУДАРҒА АЛҒААН.
Мындағ танығлығ кӱнде ідӧк улуғ аалӌы полған Хакасияның пазы Виктор Зимин. Таныхтирға кирек, ол национальнай гимназияны позының хайиинда тутча.
- Сірерні хынығ студент тузы сағыпча. Че пастап халғанӌы сынағны иртерге кирек - ол хазна сыныхтағлары. Мин пілчем, сірер аны турыстығ иртерзер. Сыныхтағларны чахсы тудыңар, пӧзік балларға чидіңер. Олғаннар, ӱгретчілеріңні ундутпаңар, оларнаң тоғазыңар. Сірерге Хакасияның иң чахсы школазында ӱгренерге оң полған, - таныхтаан республика пазы Виктор Зимин.
Ідӧк аалӌылар аразында Хакасияның ӱгредіг паза наука министрі Лариса Гимазутина, Н.Ф.Катановтың адынаң хакас хазна университедінің ректоры Татьяна Краснова, Хазна Думазының депутады Надежда Максимованың полысчызы Любовь Аёшина полғаннар. Прайзы олар школа тоосчатханнарны алғыстирға килгеннер.
Пӱӱл национальнай гимназиянаң ӱс класс анымӌохтасча. Олар - 71 оол-хыс. Прайзы олар ӱр ниместең улуғлар чолын пазарлар.
- Ам даа оңнапчам, хайди пеер 5-ӌі классха килгем. Школа уғаа улуғ пілдірчеткен, мин анда астых парарынаң чочынғам. Класста, тізең, 30 кізі полған. Хайди оларның аттарын ундут салбастаңар матап сағыссыраам. Че ӱгретчлер паза воспитательлер хаӌан даа хости полғаннар, піске хабасханнар, - чӱрексініснең чоохтаан 11 класс тоосчатхан Татьяна Сагатаева.
Я, ӱгретчілернің тоғызы улуғ. Нинӌе кӱс салчалар ӱгренӌілеріне, нинӌе тус хоратчалар. Аннаңар пу кӱнде олар аар чӱрекнең палаларын уйадаң сығарчалар. Харахтар суғланча, ӱн сірлесче. Че халғанӌы сӧстер хайди даа истілче. Амды ӱгренӌілерге оларның чооғы улам на аарлығ пілдірче полар.
Олох туста аалӌылар аразында іӌе-пабалар иркелерінең ӧкерсінчелер. Оларның ідӧк ӱлӱкӱн - палалары постаң пол пардылар.
- Минің оолғым 11 класс тоосча. Аның ӱчӱн ӧріністіг, че олох туста чӱреем ағырча. Улуғ кізі чолын пасча нооза, - тіпче Владимир Тюкпиеков.
Пӱӱл ол ікінӌі палазын улуғ чолға сығарча, че чӱрекке анзынаң ниик ле полбинча. Паба кізі полған на палазы ӱчӱн сағыссырапча.
Хайдағ даа пайрам теелбек-кӧг чох иртпинче. Олар чонның кӧңнін улам на кӧдірчелер. Че тус читкенде, халғанӌы саң сыңыри тӱскен. Саң ӱгренӌілерге, ӱгредіг чылы тоозылып, тынағ тузы чағдапчатханын искірген. Аннаңар оларның ӧрінізі пілдістіг. Че школа тоосчатханнарға ол саң хазна сыныхтағлары чағдапчатханын сизіндірген паза олған тузы тоозылчатханын таныхтаан. Че иң хомзыныстығ, пу саң оларға паза сығдырабас.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде