ІЗЕПТЕ - ХЫЗЫЛ ПАСПОРТ
15.06.2018
Хабарлар
Танығлығ кӱн. 12 июньда - Россия кӱнінде - Хакасияның пазы Виктор Зимин иң чахсы ӱгренчеткен ӱгренҷілерге паспорттар читірген.
Россия Федерациязының гражданині полчатханын таныхтапчатхан паспорттарны алғаннар ӱгредігде айдастар, олимпиадаларның, чайаачы паза спорт марығларының чиңісчілері, школалардағы халых пірігістерінің ӧткін араласчылары. Правительство туразында пу пайрамнығ чыылығда Хакасия пазы Виктор Зиминнең хада аның орынчызы Ирина Смолина, Хакасияның ӱгредіг паза наука министрі Лариса Гимазутина, аның орынҷызы Юрий Сагалаков паза ӱгренҷілернің паба-іҷелері полғаннар.
Республика пазы Виктор Зимин, ӱгренҷілерзер алғыстас сӧстерінең айланып, таныхтаан:
- Пӱӱн пістің хазнаның улуғ ӱлӱкӱні полча. Мындағ кӱнде Россия гражданині полчатхан паспортты алғаны уғаа поғдархастығ. Сірер, олғаннар, илбек Россияда чуртапчазар! Хыныңар постарыңның тӧреен чиріңерге, паба-іҷелеріңні, ӱгретчілеріңні улуғлаңар, пурунғыларыбыстың кибірлерін ундутпаңар. Сірер ӱгредігде, спортта иң артыхтары полчазар. Сірерні ӱгредіп, ӧскірчеткен паба-іҷелеріңе паза ӱгретчілеріңе улуғ алғызым читірчем. Часкалығ полыңар!
Анаң Хакасия пазы олғаннарға хызыл ӧңніг паспорттар паза улуғ нимес сыйыхтар читірген. Оларның санында полған Ағбандағы лицейнің ӱгренҷізі Алина Карамчакова. Алина Ағбандағы лицейде 7 класс тоосхан. Ол маңат ӱгренче паза настольнай тенниснең айғасча. Тенниснең 2-чі класстаң сығара ойнапча. Ол ойынға аны тренер Ирина Доменко кӧніктірче. Республикада спорт марығларында пастағы орыннарға даа турысча. Пабазы Андриан Алексеевич паза іҷезі Александра Юрьевна ікізі дее имҷі полчалар.
Россия кӱнінде паспорт алған ӱгренҷілерні ідӧк алғыстаан ӱгредіг паза наука министрі Лариса Гимазутина. Олғаннар даа постарының алғыстас сӧстерін читіргеннер. Анаң ӱгренҷілер Хакасия пазы Виктор Зиминнең хада сомға суурынғаннар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде