ЧОН КӰЗІН ПИКТЕП...
29.06.2018
Хабарлар
Танығлығ кирек. Асхыс аймаандағы Ӱӱ тағ пазында тас турғызылған.
Танығлығ киректеңер, пістің газетаның редакциязынзар киліп, искірген Егор Егорович Капсаргин. Ол род пазы полча паза халых тоғыснаң айғасча. Тынағдағы кізі хайдаң ол тас сых килген паза хайдағ пӧгіннең аны Ӱӱ тағ пазында турғыс салғаннаңар чарыт пирген:
- Ирт тағда аймах чаалазығларда чуртастарын пир салған матырларыбысха мемориал турғысчатханда, Владислав Михайлович Торосов Сизой аалдаң тастар ағылған. Оларны Ирт тағзар ағылғанда, пір тас артых пол парған. Че Олег Асапович Топоев аны артых тас нимес теен, ол 20 чыл мының алнындох Ӱӱ тағ пазында турғызыларға кирек полтыр. Іди піс хамнар полызиинаң Ӧӧркі чайааннардаң ол тасты ікі чыл аразына кирек орында турғызарға, тузында турғыссабыс - тас чонға кӱс хозар тіп сурыныстарын алғабыс.
Хайдағ даа сағысты чуртасха кирерге ахча кирек. Пістің кӧбізі, тізең, тынаға сых парған, хайдаң пістің ахча полтыр. Пу киректің пастағҷылары - родтар пастары Олег Асапович Топоев, мин, Семён Натурович Сагалаков, чон имҷізі Лидия Даниловна Челтыгмашева паза хакас кӧг инструменттерінің узы Пётр Яковлевич Топоев - ӱлгӱлерзер айланарға чаратхабыс.
Хакасияның национальнай паза территориальнай политика министрі Михаил Анатольевич Побызаков республика пазы Виктор Михайлович Зиминнең тоғазарға полыс пирген. Устағҷы пісті чылығ удурлаан. Тоғазығда Виктор Михайлович хакас чонның кибірлеріне киртінчеткенін паза тудынчатханын читірген паза хайдағ даа синдегi ӱлгӱлерзер полызығ сурап айланзабыс, ӱндезерлер тіп сӧс пирген. Піс пос чоныныңох кізілерінзер айланғабыс. Іди тасты турғызарға Ӱӱ тағ пазынзар читірерінең палғалыстығ сурығларны Михаил Анатольевич Побызаков паза Асхыс аймаа пазы Абрек Васильевич Челтыгмашев чахсы полысханнар. 24 июньда Ӱӱ тағ пазында тас турғызыл парған.
Чоохтирға кирек, пу тусха теере Ӱӱ тағ пазында сарчын турған, хайзын сайбағӌылар ӧртееннер, кискеннер. Егор Егоровичтің таниинаң, чуртағӌыларға кибірли тағ тӧзіндегі сарчын турчатхан ызых орында тохтап, тассар айланарға чарир. Кізінің кӧңні полза, тағ пазынзар даа сығарға чарир.
Автор :
Пазып алған Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде