КӰННІ ӰДЕСКЕНІ
29.06.2018
Хабарлар
Вячеслав КОЧЕЛОРОВ олғаннарны хазых ойнирға ӱгретче.
Пайрам. Пии аймаандағы Сос пилтірі аал хыринда орныхчатхан тигір алтындағы «Сос пилтірі» музейде Кӱн пазы ӱлӱкӱн ирткен.
Хандых айының 22 кӱнінде Сос пилтіріндегі музейзер иирде аалҷылар чыылысханнар. Музей устағҷызы Татьяна Тюкпиекова, ӱлӱкӱнні пастап, сарчынға чаламалар палғирға хығырған.
Аның алнында Татьяна Георгиевнадаң сурған полғам, ӱлӱкӱнні кем иртірче тіп. Аймах устаа иртірче теен.
Пайаа кізілер анда-мында пазыс чӧрчеткеннерінде, кӧп тее кӧрінмееннер. Че чалама палғирға килгеннерінде, чон илееде чыыл парғаны кӧріндіре полған. Татьяна Георгиевна, иптп чоохтап, кпбір иртірген.
Кӧбізі орыстар полған. Олар пістің оңдайыбысты хайдаң пілчеңнер. Чалама палғабызып, аймах мастер-класстар кӧрерге парғабыс. Александр Черноусов олғаннарны хакас теелбектеріне ӱгрет парча. Аны хоостыра ползаң, теелбекке оой ла ӱгреніп алғадағ.
Пір тадар иб хыринда хакас кӧгенеен кис салған Вячеслав Кочелоров позының хыринда нинче-де чиит оол чыып алтыр. Хазых ойнап парчалар. Пастап ікӧлең не ойнааннар, пасхазы кӧр турған. Чиит ооллар соонаң олғаннар одырыбысханнар. Олар, ойынны чапчаң сизініп, матап ойнап парчалар. Охчаадаң атарға кізі ідӧк кӧп чыыл партыр. Ӱзігі чох атчатханнар.
Ас-тамахнаң стол чазир мастер-класс ирткен. Устар хайдағ чиисті хайди тимнепчеткенін чоохтааннар. Соонаң столларны паалир тус читкен. Кізілер азынада ӱс пасха ӧңніг талоннар алып алғаннар. Хайдағ столда ас-тамах татхыннығ, талонны ағаа пирчелер. Оларны хоостыра баллар пирілче.
Мына ӧӧн сцена хыринзар хығырчалар. Ӱлӱкӱн азылчатханын чарлапчалар. Чоох тутханнар Пии аймааның пазы Юрий Курлаев, Улуғ Нонып аал чӧбінің пазы Андрей Челтыгмашев паза даа пасхазы.
Сцена устары концерт кӧзіткеннер. Мағаа Улуғ Ноныптағы олған сады тоғынчыларының ойыны кӧңніме кірген.
Кӱн хоньібысхан, чонны кӱнні ӱдезерге хығырчалар. Ӧнетін орында от тамызыбысханнар. Анаң кибірли кӱнні ӱдескеннер. Пу кӱнде кӱн иң узун, мыннаң мындар хызырылар.
Кӱнні ӱдезібіскен соонаң пазох ӧӧн сцена хыринзар парғабыс. Ойыннарда аралазып, чиңіс тутханнарға сыйыхтар читіргеннер. Столны артых чииснең салғаннарны таныхтааннар. Іди ӱзінҷі орында хызыл хара суғдағылар, ікінҷі орында куйбышевтегілер полыбысханнар. Пастағы орынға Кирбі аалдағылар турысханнар.
Анаң олғаннар устарын кӧзіткеннер: тахпахтар, сарыннар толдырғаннар, кибелістер чоохтааннар. Орты харааға теере дискотека ирткен.
Иртен, кӱнні удурлап, от тамысханнар. Анаң Хызыл хайазар чӧргеннер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде