МАРИЯ ТЮМЕРЕКОВАНЫҢ ХОЛА МЕДАЛЬЫ
15.08.2018
Хабарлар
Оланай кӱрес. Смоленск городта олаңай кӱреснең айғасчатхан ипчілер аразында Россия чемпионады ирткен. Анда пістің чир-суғҷыларыбыс араласханнарох.
Мария ТЮМЕРЕКОВА ӱзінчі орын ӱчӱн чиңіс тутча
Россия чемпионадында аралазарға хазнабыстың 34 регионынаң кӱресчілер чыылысханнар. Оларның аразында саблығ спорт устары, чоннар аразындағы класстығ спорт устары, спорт устары, спорт узына кандидаттар полғаннар. Марығда прай 124 кӱресчі араласчатханы искірілген.
Сибирьдегі федеральнай округтың командазы пу марығ тузында уғаа маңат тимненіс кӧзіткенін прайзы даа таныхтапча. Іди СФО-ның командазы пис алтын, сигіс кӱмӱс, он хола медаль утып алған. Тиңнестіріг: Москваның ӱс алтын, пір кӱмӱс, тӧрт хола медаль; Санкт-Петербургтың пір алтын, пір кӱмӱс медаль.
Сибирьнің піріктірілген командазының чидиине хозым иткеннер санында Мария Тюмерекованы адирға чарир. Чир-суғҷыбыс иң ниик 50 кг кӧдірімде харбасхан. Пуох кӧдірімде кӱрескеннер аның ӧӧрелері Надежда Саражакова паза Алёна Асочакова. Уғаа кӱстіг кӱресчілер чыылыс парғанын таныхтирға кирек. Прай 24 кізі саналған. Оларның алтызы - чоннар аразындағы класстығ спорт устары. Кибістегі тоғазығлар хайди хазыр парғанын пу даа кӧзідім чахсы киречілепче: чоннар аразындағы класстығ спорт устарының пірдеезі сыйыхтығ орынға сых полбин халған.
Мария Тюмерекова, Ағбандағы В.И.Чарковтың адынаң олимп резерві училищезінің ӱгренҷізі, позының узын улуғлар аразында пастағызын на сынады тиирге чарир. Ағаа 18 ле час. Олох арада аны кибісте наа кізі тіп полбассың. Мария пісті хаҷаннаң сығара чалтырама чиңістерінең ӧріндір парир. Саарбахтар, чииттер аразында харбазып, сыбыра сыйыхтығ орыннарға сыхчаң, ӧӧнінде ибзер алтын медальлығ айланҷаң.
Хайдар даа парчатса, тренері Владимир Чучунов аннаң хада чӧрче, марығлар тузында хайдағ микелернең тузаланарын чоохтапча, тузалығ чӧптернең полысча. Смоленсксер Владимир Гаврилович хадох чӧрген. Хакасияның піріктірілген командазының устағҷызы полған Россияның саблығ тренері Марат Кичеев.
Таныхтирға кирек, иң ниик кӧдірімде пастағы тоғазығлар тузындох Санкт-Петербургтаң килген спорт узына кандидат Луиза Сулейманова прайзын чапсытхан. Ол 2013 чылда Европа чемпионы полған чоннар аразындағы класстығ спорт узы Валерия Чепсаракованы утып алған. Валерия Тағлығ Шор чирінең, Кемеровта харбазып пастаан.
Амды ол Москвада чуртапча, аның ӱчӱн кӱресче. Луиза Сулейманованы, тізең, чир-суғҷыбыс Надежда Саражакова утып алған. Надежданың алнынзар хаалиин Москвадаң килген Дарья Лексина тохтатхан. Дарьяны, тізең, Хызылчардағы кӱресчі Елена Вострикова утып алған.
Андағ оңдайнаң парған иң ниик кӧдірімде хазыр харбазығлар. Мария Тюмерекова пастағы тоғазығлар тузында саннарнаң чиңістер тутхан, финалзар ізестіг хаалапчатхан. Іди ағаа чоннар аразындағы класстығ спорт узы Надежда Соколованаң тоғазарға киліскен. Анзы - Новгород облазынаң. Мария аны саннаң утып алған, чарым финалға сыххан. Анда чир-суғҷыбысха Санкт-Петербургтаң килген Анжелика Ветошкинанаң тоғазарға киліскен. Саннарнаң утыр салып, Мария хола медаль ӱчӱн Кристина Понамареванаң харбазарға тимненібіскен.
- Кристина - Брянск облазынаң. Уғаа чахсы кӱресчі. Чоннар аразындағы класстығ спорт узы. Тоғазығ аар, сидік парары ідӧк тее пілдістіг полған. Кӱресчілернің хайзы даа медаль утып аларға сағынча, - чоохтапча Россияның саблығ тренері Марат Кичеев.
Марат Семёновичтің сӧстерінең, Мария хола медаль ӱчӱн харбасчатхан туста маңат тимненіс кӧзіткен. Чоннар аразындағы класстығ спорт узын, нанға кӧдіріп, силгенде, марығ чарғыҷызы сіліг мике ӱчӱн иң пӧзік сан пирген. Пу чидігде тохтабин, чир-суғҷыбыс, чапчаң хайынып, Кристинаның кірер-парар чирін тар иткен, саннар чыып турған. Хаҷан 10:0 саннаң утчатханда даа, Мария пазох ла хынчатхан микезін тузаланған, саңай сас ойда тастаан. Іди ол, Россия чемпионадында улуғлар аразында пастағызын на аралазып, хола медаль утып алған. Алғыстапчабыс Марияны мындағ чидігнең.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде