НИНҶІДЕҢ ПАСТИ ТАС КИРТЕРІНЕ ТЕЕРЕ
09.11.2018
Хабарлар
Карина ТОРТОБАЕВА пластилиннең хоос тимнепче.
Марығ. Олған хоос школаларының ӱгренҷілері республикадағы декоративно-прикладной чайаачы тоғыстар мариинда араластылар.
Хоос узаныс тоғызына олғанны ӧӧнінде школада ӱгредіп пастапчалар. Істеніс уроктарында хызыҷахтар тағырирға, палғирға, чібекнең хоостирға ӱгренчетселер, оолағастар ағас киртерге паза пасха ниме-нооларны пос холынаң идерге пастапчалар.
Амды олған-узах айғасчатхан декоративно-прикладной пос узаныс-тың кӧрімнері илееде алғыдыл пар-тыр. Мындағ ӱгредігні республикада олғаннарның искусство школаларын-да апарчалар.
Анзын декоративно-прикладной чайаачы узанысча марығлар иртірілчеткені киречілепче. Ирткен кӱннерде республикадағы олғаннарның национальнай искусство школазында мындағ марығ парған. Ол пӱӱл пизінҷі хати иртті. Хакасияның культура министерствозы паза республиканың искусство школазы полызиинаң иртірілчеткен марығ чайаачы палаларны ілезіне сығарча, чон кибірлерін пос узаныс пастыра узарадар, национально-региональнай компонентті хайраллир паза тилідер ӱчӱн аны чуртасха киргеннер.
Марығда 10 - 13, 14 - 17 частығ 32 олған араласхан. Олар Ағбандағы, Харатастағы, Саяногорсктағы искусство школаларының ӱгренҷілері полчалар. Асхыс аймааның кічіг устары мындағ ӱс тее школадаң араласханнар: Асхыстағы, Пилтірдегі, Ӱс чулдағы. Марыға декоративно-прикладной узаныстың мындағ кӧрімнері чарлалтыр: нинҷінең хоостиры, гобелен, ағас, тас киртері, батик, керамика.
Марығ ӱс чардыхха чарылған. Пастағызын олғаннарның тоғыстарының кӧзідии полған, аның соонаң наа тоғысты тимниріне тӧрт час пирілген, анаң тоғыстарының презентациязы парған. Кӧзідіге сығарылған чайаачы тоғыстар хоостыра ол-пу пала нименең узанчатханын сизінерге чарир. Олғаннар постарының 3-4 тоғызын ағылтырлар. Сызырдаң, тойдаң, теердең, тастаң, чіптердең аймах-пасха ӧкерек чайаачы тоғыстарны тимнепчелер. Узанысха кирек нимелерні чир-чайааннаң аларға чарир. Пістің чирібіс, тізең, андағ нимее пай.
Палалар, тӧрт час аразына тимнелген тоғыстарын жюри араласчыларына кӧзідіп, оларны арачылааннар. Жюриде Н.Ф.Катановтың адынан Хакас хазна университедінің декоративно-прикладной искусство кафедразының доценті Татьяна Коваль, С.П.Кадышевтің адынаң культура кінінің ДПИ пӧлиинің устағҷызы Светлана Патачакова паза Харатастағы олған хоос школазының директоры Надежда Яблочкова полғаннар.
Тиксі кӧрзе, олғаннарның тоғыстары прай даа кӧстеглерҷе тимнелтір. Хай пірее кӧрімҷе пір ле пала араласханы таныхталған. Кӧзідімге, Асхыстағы искусство школазының ӱгренҷізі Катя Кыржинакова макраме оңдайынаң ипчі чазанҷыхтарын ӱр салған. Олох школазар чӧрчеткен Артём Чебодаев теердең хоос нимелер чайапча. Оолағас пу марығда карандаштарны турғысчаң ідісті тимнебіскен.
Ағас паза тас киртерінең, керамиканаң илееде олған айғасчаттыр. «Керамика» номинацияда иң кічіг 9 частығ Самир Субраков полған полар. Ол Ӱс чулдағы искусство школазының ӱгренҷізі полча. Оолағас поғо тимнептір, ағаа ӱзінҷі орын пирілген.
Республикадағы искусство школазының ӱгренҷізі Василиса Нагель ікі абдыра уғаа чахсы тимнеп салтыр. Оларны тӧрт саринаң Хакасияның танығлары чазапча. Мындағ хоос оңдайнаң республиканың омазын чарыдарға чарир. Василисаа пастағы орын пирілген.
Хызыҷахтар ӧңніг чаҷыннардаң коллаж-аппликациялар, пластилиннең, хой тӱгінең хоостар чайапчалар. Оларзар кӧре, сын сырларнаң тимнелген хоостар тіп сағынарзың. Мындағ тоғыстарның ӧӧні ӧңнерні килістіре таллап пілері полар. Саяногорсктағы «Колорит» хоосчылар школазында олғаннарны таста хоостар саларға ӱгретчелер. Хызыҷахтар даа пу кирекнең айғасчаттырлар. Ағаснаң узанар марығда ӧӧнінде оолағастар араласханнар, че пастағы орын Валерия Ермаковаа пирілген.
Марығда пастағы ӱс орын алғаннарға «лауреат» аттығ дипломнар читірілген. Тӧртінҷі орыннар пирілгенӧк, олар «дипломант» атха турысханнар. Пасхазы араласхан ӱчӱн таныхтатхан.
Автор :
Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде