ЧИИТТЕРНЕҢ АЛЫНҶА КОМИТЕТ ТОҒЫНАР
19.11.2018
Хабарлар
Хакасияның Ӧӧркі Чӧп президиумы 14 ноябрьда теестегі чыылиин иртірген. Ӧӧн сурығларның пірсі Ӧӧркі Чӧпте наа комитет тӧстирдеңер полған - чииттер политиказынҷа Республиканың парламентінде паза пір комитет тӧстир пӧгіннен «Хакас Республиканың Ӧӧркі Чӧп комитеттерінеңер (комиссияларынаңар)» законзар алызығлар кирчеткен закон проектінең Ӧӧркі Чӧп кнезі Владимир Штыгашев таныстырған. Таныхтирға кирек, ол закон проектінің авторлары Ӧӧркі Чӧп депутаттарының ӧмезі полча: Владимир Штыгашев, Светлана Могилина паза Валерий Старостин.
Владимир Николаевичтің чооғынаң, амғы туста чииттер политиказы сурығларынаң Ӧӧркі Чӧптің аймах комитеттеріне айғазарға килісче. Россияның Хазна Думазында физическай культураҷа, спортча, туризмҷе паза чииттер киректерінҷе комитет хаҷанох тоғынча. Ідӧк кӧбізі регионнарның закон сығарҷаң органнарында чииттер киректерінҷе алынча комитеттер тӧстел парған. Конституционнай законодательствоҷа комитеттің кнезі Светлана Могилинаның хоза искірии хоостыра Россияның 85 субъектінің 62-зінде андағ комитеттер пар. Экологияҷа, чир-чайаан ис-пайынҷа паза аннаң тузаланарынҷа комитеттің кнезі Валерий Старостин чииттернең тоғынҷаң алынҷа комитет тӧстир чӧпнең 2016 чылдох, Россияда Чиитер чылы полғанда, сыхханын таныхтаан.
Наа комитет физическай культураҷа, спортча, туризмҷе паза чииттер политиказынҷа адалар тіп кӧрілче. Ӧӧркі Чӧп кнезі Владимир Штыгашевтің таниинаң, комитет тӧстир сурығ сағам нинҷе ахча киректелер сурығ чох ӱзӱріге сығарылча. Пілдістіг, наа комитет тударына ахча киректелер. Аннаңар, пу сурығ сессия ӱзӱриине сығарылза, таластар поларға айабас.
Паза пу чыылығда президиумдағылар теестегі сессияны иртірҷең кӱнні чарадыға алыбысханнар. Сессияны 28 ноябрьда иртірерге чарат салғаннар. Ӧӧн паза аар сурығларның пірсі республика бюджедінеңер закон проекті полар тіп кӧрілче.
- Паза піске иртер сессияда Хакасияның кізі праволарынҷа уполномоченнайын табарға кирек, - сессия оой нимес иртердеңер сизіндіріп, искірген Ӧӧркі Чӧп кнезі. - Пістің 7 кандидат пар, оларның полғанынҷа ла ӱн пиріс иртірерге кирек полар.
Владимир Штыгашев ідӧк Хакасияның пазына табылған Валентин Коноваловнаң тоғасханын искірген.
- Пілдістіг, ағаа ам полыс пирерге кирек, - таныхтаан Владимир Николаевич.
Ӧӧркі Чӧп кнезі кӧрізінең, амды наа устағҷаа аймах чӧптер пирҷең кізілер паза партиялар кӧп табылар.
- Че ам партиялар тоғызы тоозыл парған, - сағыс-кӧрізінең ӱлескен Штыгашев. - Амды аның пір ле партия поларға кирек - Хакасия табығҷылары.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде